Private bus that killed the Rowdy Ranga

రౌడీ రంగాను చంపేసిన ప్రైవేట్ బస్సు

Date:08/10/2018
బెంగళూర్  ముచ్చట్లు:
బెంగళూరు ప్రాంతంలో గతంలో భయోత్పాతం సృష్టించిన ‘రౌడీ రంగా’ బస్సు ప్రమాదంలో మరణించింది. వేగంగా దూసుకొచ్చిన బస్సు బలంగా ఢీకొట్టడంతో దుర్మరణం పాలైంది. కర్ణాటకలోని కొడగు జిల్లా మడికేరి వద్ద సోమవారం వేకువజామున ఒంటి గంట సమయంలో జరిగిన ప్రమాదంలో ఈ మదపుటేనుగు మృతి చెందింది. ప్రమాదంలో తీవ్రంగా గాయపడిన గజరాజుకు వెటర్నరీ వైద్యులు చికిత్స అందించారు. అయినా ఫలితం లేకపోయింది. ‘రంగా’గా పిలిచే ఈ ఏనుగు వయసు 38 ఏళ్లు అని అటవీ అధికారులు వెల్లడించారు. బెంగళూరు సమీపంలోని భనతారకుప్పె ప్రాంతంలో గతంలో ఈ ఏనుగు బీభత్సం సృష్టించింది.
ఇద్దరు వ్యక్తులను చంపేసింది. నాటి నుంచి ఈ మదగజాన్ని ‘రౌడీ రంగా’గా వ్యవహరిస్తున్నారు. ఈ ఏనుగు మైసూరు ప్యాలెస్‌లో కొంత కాలం సేవలు అందించినట్లు తెలుస్తోంది. మనుషులపై దాడి చేస్తుండటంతో ఈ గజరాజును రెండేళ్ల కిందట బెంగళూరు సమీపంలోని నాగర్‌హోళ్ అటవీ ప్రాంతం నుంచి కొడగు సమీపంలోని మాథిగోడ ఎల్‌ఫాంట్ క్యాంప్‌కు తరలించారు. ఈ క్యాంప్‌లో గతంలో మరో రెండు ఏనుగులు కూడా ఇలాగే ప్రమాదం కారణంగా మరణించాయి. ఈ నేపథ్యంలో ఈ అటవీ ప్రాంతం నుంచి వెళ్లే రహదారిని మూసేయాలని స్థానికులు డిమాండ్ చేస్తున్నారు. ప్రమాదానికి కారణమైన ‘కల్పక’ ట్రావెల్స్ బస్సు డ్రైవర్‌ను పోలీసులు అరెస్టు చేశారు. ఘటనపై కేసు నమోదు చేశారు.
Tags:Private bus that killed the Rowdy Ranga

Leave a Reply

Your email address will not be published. Required fields are marked *