కష్టాల్లో నుంచి తేరుకున్న కరేబియన్లు

– 295 పరుగులకు 7 వికెట్లు
Date:12/10/2018
హైద్రాబాద్ ముచ్చట్లు:
హైదరాబాద్‌లోని ఉప్పల్ స్టేడియంలో శుక్రవారం ఆరంభమైన రెండో టెస్టులో భారత్ జట్టుకి పర్యాటక వెస్టిండీస్ టీమ్‌ తొలిరోజు గట్టి పోటీనిచ్చింది. రోస్టన్ ఛేజ్ (98 బ్యాటింగ్: 174 బంతుల్లో 7×4, 1×6), కెప్టెన్ జేసన్ హోల్డర్ (52: 92 బంతుల్లో 6×4) అర్ధశతకాలు బాదడంతో ఈరోజు ఆట ముగిసే సమయానికి వెస్టిండీస్ జట్టు 7 వికెట్లు కోల్పోయి 295 పరుగులు చేసింది. క్రీజులో ప్రస్తుతం రోస్టన్‌తో పాటు దేవేంద్ర బిషూ (2 బ్యాటింగ్: 15 బంతుల్లో) ఉన్నాడు. భారత బౌలర్లలో కుల్దీప్ యాదవ్ (3/74), ఉమేశ్ యాదవ్ (3/83) ఆకట్టుకోగా.. అశ్విన్ (1/49) ఫర్వాలేదనిపించాడు. తొలి టెస్టు రెండు ఇన్నింగ్స్‌లోనూ వెస్టిండీస్ 181, 196 పరుగులకే కుప్పకూలిపోయిన విషయం తెలిసిందే.
ఈ టెస్టులో టాస్ గెలిచిన వెస్టిండీస్ కెప్టెన్ జేసన్ హోల్డర్ బ్యాటింగ్ ఎంచుకున్నాడు. అయితే ఓపెనర్లు క్రైగ్ బ్రాత్‌వైట్ (14), కీరన్ పొవెల్ (22) తొలి సెషన్‌ ఆరంభంలోనే పెవిలియన్ బాట పట్టగా.. అనంతరం వచ్చిన షై హోప్ (36: 68 బంతుల్లో 5×4) క్రీజులో ఉన్నంతసేపూ హిట్టింగ్‌కి ప్రయత్నించాడు. దీంతో.. చాకచక్యంగా బౌలింగ్ చేసిన టీమిండియా బౌలర్లు హోప్‌తో పాటు హెట్‌మెయర్ (12), ఆంబ్రిస్ (18)ని బోల్తా కొట్టించేశారు. దీంతో.. వెస్టిండీస్ 38.5 ఓవర్లు ముగిసే సమయానికి 113/5తో కష్టాల్లో పడింది.తొలి టెస్టు తరహాలో తక్కువ స్కోరుకే పరిమితమయ్యేలా కనిపించిన వెస్టిండీస్ జట్టుని రోస్టన్ ఛేజ్ అసాధారణ ఇన్నింగ్స్‌తో ఆదుకున్నాడు.
తొలుత షేన్ డార్విచ్ (30: 63 బంతుల్లో 4×4, 1×6)తో కలిసి వికెట్ల పతనాన్ని అడ్డుకున్న రోస్టన్ ఛేజ్.. బ్యాట్ ఝళిపిస్తూ వచ్చాడు. ఈ క్రమంలోనే అతను అర్ధశతకం పూర్తిచేసుకోగా.. జట్టు స్కోరు 182 వద్ద డార్విచ్ ఔటైపోయాడు. కానీ.. ఆ తర్వాత వచ్చిన కెప్టెన్ జేసన్ హోల్డర్‌తో కలిసి ఛేజ్ వెస్టిండీస్‌ స్కోరుని 280 దాటించేశాడు. మరికొద్దిసేపట్లో ఈరోజు ఆట ముగుస్తుందన్న దశలో హోల్డర్ ఔటవగా.. ఆఖర్లో బిషూ అతి జాగ్రత్తగా ఆడి 295/7తో ఆటని ముగించాడు.
Tags:Caribbean out of trouble

Leave a Reply

Your email address will not be published. Required fields are marked *