'Chandranna Prankkettu' from Ugadi

ఉగాది నుంచి ‘చంద్రన్న పెళ్లికానుక’

Date: 04/01/2018

అమరావతి ముచ్చట్లు:

ఈ ఏడాది ఉగాది నుంచి చంద్రన్న పెళ్లి కానుక పథకాన్ని ప్రారంభిస్తున్నట్లు ఆంధ్రప్రదేశ్ ముఖ్యమంత్రి నారా చంద్రబాబు నాయుడు ప్రకటించారు. చంద్రన్న పెళ్లి కానుక కింద ఎస్టీలకు రూ.50వేలు, ఎస్సీలకు రూ.40వేలు, బీసీలకు రూ.30వేలను పెళ్లి సమయంలోనే వారి ఖాతాల్లో జమచేస్తామని చెప్పారు. 2018లో రాష్ట్రంలో లక్ష పెళ్లిళ్లకు సాయం చేయాలని లక్ష్యంగా పెట్టుకున్నట్లు వెల్లడించారు.. గతంలో కంటే భిన్నంగా ప్రజల్లో చైతన్యం, ప్రజా భాగస్వామ్యం ఉండేలా జన్మభూమి కార్యక్రమాన్ని రూపొందించామని తెలిపారు. రాష్ట్రంలో కొత్తగా 4 లక్షల మందికి ఫించన్లు ఇవ్వనున్నట్లు చంద్రబాబు వెల్లడించారు. దీంతో మొత్తం 50 లక్షల మందికి ఫించన్లు ఇచ్చినట్లవుతుందన్నారు. దేశంలో ఏ రాష్ట్రంలోనూ ఇంత మందికి ఫించన్లు ఇవ్వడం లేదని చెప్పారు. పాఠశాల విద్యార్థులకు ఇబ్బందులు లేకుండా రూ.1617 కోట్లతో ఉపకార వేతనాలు అందిస్తున్నామని సీఎం తెలిపారు. కొత్తగా 1.50 లక్షల మందికి రేషన్‌ కార్డులు అందిస్తున్నామని, 19 లక్షల ఇళ్ల నిర్మాణం జరుగుతోందని చెప్పారు. చేనేత వస్త్రాలను ప్రోత్సహించేందుకు సగం ధరకే చీర, ధోవతి ఇచ్చే పథకాన్ని ప్రవేశపెడతామని వివరించారు. మైనారిటీలు, క్రైస్తవులను కొత్త పథకాల ద్వారా ఆదుకుంటున్నామన్నారు. మరుగుదొడ్లు వాడనివారు మనుషులు కాదని, పశువులతో సమానమని సీఎం చంద్రబాబు అన్నారు. అందుకే రాష్ట్రంలో మరుగుదొడ్ల నిర్మాణాన్ని ప్రతిష్టాత్మకంగా తీసుకున్నామని చెప్పారు. తాము అధికారంలోకి వచ్చేసరికి రాష్ట్రంలో 30 శాతం కూడా మరుగుదొడ్లు లేవని, ఇప్పుడు ఆరు జిల్లాల్లో 100 శాతం మరుగుదొడ్లు నిర్మించగలిగామన్నారు. ఇతర జిల్లాల్లోనూ వచ్చే మార్చి 31 నాటికి 100 శాతం పూర్తి చేస్తామని చెప్పారు. సంక్రాంతికి రంగంలోకి దిగే జూదగాళ్లకు సీఎం హెచ్చరికలు జారీ చేశారు. కోళ్ల పందేలు, ఎడ్ల పందేల పేరిట రూ.లక్షల్లో పందేలు కాస్తే చూస్తూ ఊరుకోమని హెచ్చరించారు.

Tags: ‘Chandranna Prankkettu’ from Ugadi

Leave a Reply

Your email address will not be published. Required fields are marked *