అచంచల ప్రేమాభిమానాలకు ప్రతీక… దేశ్‌ రత్నభారత తొలి రాష్ట్రపతి రాజేంద్రప్రసాద్‌ జయంతి సందర్భంగా…

హైదరాబాద్‌ ముచ్చట్లు:

డాక్టర్‌ బాబూ రాజేంద్రప్రసాద్‌… భారతదేశ మొట్టమొదటి రాష్ట్రపతిగా ప్రసిద్ధుడు. రాజేంద్రప్రసాద్‌ గొప్ప స్వాతంత్య్ర సమరయోధుడు, భారత రాజ్యాంగ నిర్మాణ శిల్పి. 1948 నుండి 1950 వరకు భారత రాజ్యాంగ ముసాయిదా తయారీ కోసం ఏర్పాటైన సంఘానికి అధ్యక్షత వహించిన మేథావి. భారతదేశానికి స్వాతంత్య్రం వచ్చాక ఏర్పడిన తొలి ప్రభుత్వంలో కొద్ది కాలం పాటు కేంద్ర మంత్రిగా కూడా ఆర్పీ పని చేసాడు. భారతదేశ స్వాతంత్య్ర సమరంలో ఒక ముఖ్య నాయకుడుగా ఆయన పోషించిన పాత్ర ప్రశంసనీయమైనదిగా ఇప్పటికీ చెబుతుంటారు. ప్రజలు ఇతనిని ప్రేమగా, గౌరవంగా ‘బాబూ’ అని పిలిచేవారు. రాజేంద్ర ప్రసాద్‌ బీహార్‌ రాష్ట్రంలో శివాన్‌ జిల్లాలోని జిర్దేయి గ్రామంలో 1884 లో డిసెంబరు మూడున జన్మించాడు. అతని తండ్రి మహదేవ్‌ సహాయ్‌ సంస్కృతం, పర్శియను భాషలలో పండితుడు. తల్లి కమలేశ్వరీ దేవి ఎప్పుడూ రామాయణం నుండి కథలు వివరించేది. ఐదవ ఏటనే పర్షియన్‌ భాషను నేర్చుకోవడానికి ఒక మౌల్వీ దగ్గరకు పంపించబడ్డాడు. ఛాప్రా ప్రభుత్వ పాఠశాలలో ప్రాధమిక విద్యాభ్యాసం చేసాడు. 12 సంవత్సరాల వయసులోనే రాజ్‌వంశీ దేవీని వివాహం చేసుకున్నాడు. అటు తరువాత విద్యకై పాట్నాలో తన అన్న మహేంద్ర ప్రసాద్‌ వద్ద ఉంటూ ఆర్‌.కె.ఘోష్‌ పాఠశాలలో చదువుకున్నాడు. మరల ఇంకోసారి ఛాప్రా ప్రభుత్వ పాఠశాలలో చేరి కలకత్తా విశ్వవిద్యాలయ ప్రవేశ పరీక్షలో ప్రథమ శ్రేణిలో ఉత్తీర్ణుడయ్యాడు. అప్పుడు కలకత్తా ప్రెసిడెన్సీ కాలేజీలో చేరాడు. మొదట్లో సైన్సు విద్యార్ధి. అతని అధ్యాపకులలో జగదీష్‌ చంద్రబోసు, ప్రఫుల్ల చంద్ర రాయ్‌ మొదలగువారు ఉన్నారు. కాకపోతే తరువాత సాంఘిక శాస్త్రంపై మక్కువ పెంచుకుని అటువైపు తన దృష్టి మరల్చాడు.ఆర్థిక శాస్త్రంలో ఎం.ఎ. చదివాక,బి.ఎల్‌. ఆ తర్వాత ఎం.ఎల్‌. పూర్తి చేసి డాక్టరేట్‌ కూడా పొందాడు. రాజేంద్ర ప్రసాద్‌ చదువుతున్నప్పుడు తన అన్నతో కలిసి ఇడెన్‌ హిందూ హాస్టలులో నివసించేవాడు, అన్నతో కలిసి స్వదేశీ ఉద్యమాన్నీ నడిపాడు. 1911లో కాంగ్రెసులో చేరాడు. కానీ అతని కుటుంబ పరిస్థితి ఏమంత బాగాలేదు. కుటుంబం తన సహాయానికై ఎదురు చూస్తున్న తరుణంలో, స్వాతంత్య్ర సమరంలో పాల్గొనేందుకు అన్నగారిని అనుమతి అడిగాడు. అతడు అందుకు ఒప్పుకోకపోవటం వలన 1916లో బీహార్‌, ఒరిస్సా రాష్ట్రాల హైకోర్టులలో చేరాడు. ఏదైనా విచారణ జరుగుతున్నప్పుడు, తన వాదనకు వ్యతిరేకంగా ఎవరైనా ఉదాహరణలు చూపలేకపోయినప్పుడు, న్యాయమూర్తులు రాజేంద్రప్రసాదునే ఉదాహరణ ఇవ్వమని అడిగేవారు. న్యాయవాదిగా జీవితాన్ని ప్రారంభించిన అనతికాలంలోనే స్వాతంత్య్ర పోరాటంవైపు ఆకర్షితుడయ్యాడు.1918లో ‘సర్చ్‌ లైట్‌’ అనే ఆంగ్ల పత్రికను, ఆ తర్వాత ‘దేశ్‌’ అనే హిందీ పత్రికనూ నడిపాడు. 1921లో మహాత్మా గాంధీతో ఒకమారు సమావేశం తరువాత, విశ్వవిద్యాలయంలో తన సెనేటర్‌ పదవికి రాజీనామా చేశాడు. పాశ్చాత్య చదువులను బహిష్కరించమని గాంధీజీ పిలుపునిచ్చినపుడు తన కుమారుడు మృత్యుంజయ ప్రసాదును విశ్వవిద్యాలయ చదువు మానిపించి వెంటనే బీహార్‌ విద్యాపీఠ్‌లో చేర్చాడు. ఈ విద్యాపీఠాన్ని1921లో తన మిత్రబృందంతో కలిసి స్థాపించి భారతీయ సంస్కృతి ఉట్టిపడేలా నడిపాడు. 1924లో బీహారు బెంగాల్‌లలో వచ్చిన వరదలలో అన్నీ కోల్పోయిన అభాగ్యులను ఆదుకోవడంకోసం తనవంతు సహాయాన్ని ముందుండి అందించాడు. జనవరి 15, 1934న బీహారులో భూకంపం వచ్చినప్పుడు రాజేంద్రప్రసాద్‌ జైలులో ఉన్నాడు. రెండురోజుల అనంతరం అతనిని విడిచిపెట్టారు. బయటకు రాగానే అతను నిధులను సేకరించడం మొదలుపెట్టాడు. అలా భూకంప బాధితుల సహాయార్ధం అతను సేకరించిన నిధులు (38 లక్షలు) అప్పట్లో వైస్రాయి సేకరించిన నిధులకు మూడింతలున్నాయి. రాజేంద్రప్రసాద్‌ 1934 అక్టోబరులో బొంబాయిలో జరిగిన అఖిల భారత కాంగ్రెసు మహాసభలకు అధ్యక్షునిగా ఎన్నికయ్యాడు. అలాగే 1939లో నేతాజీ సుభాష్‌ చంద్రబోస్‌ రాజీనామా చేసిన తరువాత, 1947లో ఇంకోసారి మొత్తం మూడుసార్లు ఆ పదవిని చేపట్టాడు. భారతదేశానికి స్వాతంత్య్రం వచ్చిన తరువాత రాజేంద్ర ప్రసాదును రాష్ట్రపతిగా ఎన్నుకున్నారు. దేశానికి మొట్టమొదటి రాష్ట్రపతిగా స్వతంత్య్రంగా మెలిగి, ప్రధానిని గానీ పార్టీని గానీ రాజ్యాంగ నిర్మాణంలో జోక్యంచేసుకోనివ్వలేదు. అలా తన తరువాత వచ్చిన అందరు రాష్ట్రపతులకు ఉదాహరణగా నిలిచారు. 12 సంవత్సరాలపాటు భారత రాష్ట్రపతిగా సేవలందించి 1962న పదవీ విరమణ చేసారు. హిందీ, సంస్కృతం, ఉర్దూ, పర్షియన్‌, ఇంగ్లీషు భాషల్లో పండితుడైన రాజేంద్రప్రసాద్‌ హిస్టరీ ఆఫ్‌ చంపారన్‌ సత్యాగ్రహ, ఇండియా డివైడెడ్‌, ఆత్మకథ, ఎట్‌ ది ఫీట్‌ ఆఫ్‌ మహాత్మా వంటి గ్రంథాలను రచించారు. అనంతర కాలంలో భారతదేశంలో అత్యంత గౌరవనీయమైన భారతరత్న పురస్కారాన్ని రాజేంద్రప్రసాదుకు ప్రకటించారు. పదవీ విరమణ తర్వాత కొన్ని నెలలకు అనగా సెప్టెంబర్‌ 1962లో అతని భార్య రాజ్‌వంశీ దేవి చనిపోయింది. మరణానికి నెలరోజుల ముందు తనకుతానే ఒక ఉత్తరం రాసుకున్నారు, అందులో ఇలా చెప్పారు… ”నేను అంతిమ దశకు చేరువైనట్లు అనిపిస్తూంది, ఏదైనా చేసే శక్తి అంతమవుతుంది, నా ఉనికే అంతమవుతుంది.” ఫిబ్రవరి 28, 1963న రాం రాం అంటూ కన్ను మూశారు. దేశ ప్రజలలో ఆయనకు ఉన్న అచంచలమైన ప్రేమాభిమానాల వలన ఆయనను ‘దేశ్‌ రత్న’ అని పిలిచేవారు.

Tag : deshana-bharatamana-symbols-deshn-ratnobharta-is-the-first-president-of-rajendra-prasad-jayanthi

Leave a Reply

Your email address will not be published. Required fields are marked *