గ్రావిటీ మూవీ   కంటే..చంద్రయాన్ ఖర్చే తక్కువ

Date:21/02/2018
నెల్లూరు ముచ్చట్లు:
తక్కువ ఖర్చుతో అంతరిక్ష పరిశోధనల్లో అద్భుతాలను సృష్టిస్తోన్న భారత అంతరిక్ష పరిశోధనా సంస్థ (ఇస్రో) మరోసారి చంద్రుడిపై యాత్ర కోసం సమాయాత్తం అవుతోంది. ఈ ఏడాది ఏప్రిల్‌లో చంద్రయాన్-2 ప్రయోగాన్ని చేపట్టే యోచనలో ఉన్నట్లు ఇస్రో ఛైర్మన్ కె శివన్ తెలిపారు. రూ.800 కోట్ల వ్యయంతో చంద్రయాన్-2 ప్రయోగం చేపట్టనున్నారు. 2014లో వచ్చిన హాలీవుడ్‌ సైంటిఫిక్ మూవీ ఇంటర్‌స్టెల్లర్‌ కోసం రూ.1,064 (165 మిలియన్ డాలర్లు) ఖర్చుచేస్తే, చంద్రయాన్-2 కోసం ఇస్రో కేవలం కేవలం రూ.800 కోట్లే ఖర్చుచేయడం గమనార్హం. 2013లో నిర్వహించిన చంద్రయాన్- 1 ప్రాజెక్టు ఖరీదు కూడా అదే ఏడాది గ్రావిటీ సినిమా వ్యయం కంటే తక్కువ కావడం విశేషం. అప్పట్లో ఈ ప్రాజెక్టు కోసం ఇస్రో రూ.470 కోట్లు ఖర్చుచేస్తే, సినిమా కోసం రూ.644 కోట్లు (100 మిలియన్ డాలర్లు) వెచ్చించారు.
తక్కువ వ్యయంతో ఇస్రో ప్రయోగాలను చేపట్టి పెద్ద మొత్తంలో విజయాలను సాధిస్తోంది. తక్కువ వయ్యంతోనే భారీ ప్రాజెక్టులను ఎలా విజయవంతం చేస్తోందనే అంశంపై ఇస్రో ఛైర్మన్ స్పందించారు. ప్రయోగానికి ముందు వ్యవస్థను సరళీకృతం చేసి, సంక్లిష్టమైన అంశాలను సూక్ష్మీకరిస్తామని, నాణ్యతా ప్రమాణాల విషయంలో రాజీలేకుండా వ్యవహరిస్తామని ఆయన తెలిపారు. దీంతో నిర్వహణ వ్యయం తగ్గి, అనుకున్న ఫలితాలు సాధ్యమవుతున్నాయని ఆయన తెలియజేశారు. స్పేస్‌క్రాఫ్ట్, లేదా రాకెట్ పనితీరును ప్రతి దశలోనూ క్షుణంగా పరిశీలిస్తామని పేర్కొన్నారు. అందువల్ల వృధాను నివారించే అవకాశం ఉంటుంది… ఈ ఏడాది ఏప్రిల్‌లో ప్రయోగం చేపట్టాలని భావిస్తున్నామని.. వాతావరణ పరిస్థితులను బట్టి తేదీని వెల్లడిస్తామని శివన్ అన్నారు.వాతావరణం అనుకూలించని కారణంగా ఏప్రిల్‌లో వాయిదా పడితే నవంబరులో ప్రయోగిస్తామని ఆయన చెప్పారు. చంద్రుడి దక్షిణ ధ్రువంపై 100 కి.మీ. ఎత్తున ఆర్బిటార్‌ను ఉంచుతామని, ముందుగానే గుర్తించిన స్థలంలో చంద్రుడిపై ల్యాండర్‌ను దించుతామని శివన్ స్పష్టంచేశారు. ఈ ప్రాంతంలో పెద్ద పెద్ద శిలలు అనేక బిలియన్ సంవత్సరాల నుంచి ఉన్నాయని, వీటి గురించి విశ్లేషించి, అవగాహన చేసుకోడానికి ఈ ప్రయోగం సహకరిస్తుందని ఆయన వ్యాఖ్యానించారు. చంద్రయాన్-2 ప్రాజెక్టుకు సంబంధించిన సిమ్యులేషన్ టెస్ట్‌లు బెంగళూరు, మహేంద్రగిరి, చిత్రదుర్గ లాంటి వివిధ ప్రాంతాల్లో ఇస్రో కేంద్రాల్లో మొదలయ్యాయి. ల్యాండింగ్ సమయంలో ఆటంకాలను అధిగమించడానికి చంద్రుడి ఉపరితలాన్ని పోలిన కృత్రిమ వాతావరణాన్ని సృష్టించి పరీక్షలు నిర్వహిస్తున్నట్లు ఇస్రో చైర్మన్ శివన్ తెలిపారు.
Tags; Gravity movie is less than Chandranan Kharke

Leave a Reply

Your email address will not be published. Required fields are marked *