రుణాల ఎంపిక ఎట్లా..? 

Date:14/03/2018
మచిలీపట్నం  ముచ్చట్లు:
నిరుద్యోగ యువత జీవనోపాధికి ప్రభుత్వం వివిధ కార్పొరేషన్ల ద్వారా మంజూరు చేస్తున్న రాయితీ రుణాలు అర్హులైన లబ్ధిదారులకు అందడం లేదు. రుణ కేటాయింపులు వందల్లో ఉంటే ఆశించే లబ్ధిదారుల సంఖ్య వేలల్లో ఉంటోంది. రుణ లక్ష్యాలకు ఒక పరిమితి అవసరం కాబట్టి సరిపెట్టుకోవచ్చు అనుకున్నా… లబ్ధిదారుల ఎంపిక విషయంలో చోటుచేసుకుంటున్న పైరవీలు ప్రభుత్వ లక్ష్యాన్ని నీరుగార్చేలా చేస్తున్నాయి.ప్రభుత్వం వివిధ వర్గాల సంక్షేమాన్ని దృష్టిలో ఉంచుకుని ఆయా కార్పొరేషన్ల ద్వారా రాయితీ రుణాలు, బ్యాంకు అనుసంధాన రుణాలు మంజూరు చేస్తున్న విషయం తెలిసిందే. ప్రతి ఏడాది ఎస్సీ, బీసీ, కార్పొరేషన్ల ద్వారా వేల సంఖ్యలో బ్యాంకు లింకేజి రుణాలు ఇస్తున్నారు. వీటితో పాటు ఎస్టీ, కాపు, బ్రాహ్మణ కార్పొరేషన్ల పరంగా కూడా రుణాలు కేటాయిస్తున్నారు. వార్షిక లక్ష్యాల మేరకు రుణాలు మంజూరు చేస్తున్నా బ్యాంకర్ల సహకారం అంతగా లేకపోవడంతో మంజూరైన పథకాలు గ్రౌండింగ్‌ చేసే విషయంలో వెనుకబాటు తప్పడం లేదు. ముఖ్యంగా ఎస్సీ, బీసీ, కాపు కార్పొరేషన్ల పరంగా మంజూరయ్యే యూనిట్ల సంఖ్య ఎక్కువగానే ఉండే పరిస్థితుల్లో మండలాల కేటాయింపులు కూడా అందుకు తగ్గట్టుగానే ఉంటున్నాయి. ఏ కార్పొరేషన్‌కు సంబంధించిన రుణానికైనా లబ్ధిదారులను జన్మభూమి కమిటీలే ఎంపిక చేయాల్సి ఉంటుంది. లబ్ధిదారుల ఎంపిక ప్రతి ఏడాది ఉండే ప్రక్రియే కాబట్టి కమిటీ సభ్యులపై ఒత్తిడి అంతగా ఉండేది కాదు. ప్రభుత్వం తాజాగా ఆర్థికంగా వెనుకబడిన తరగతుల (ఈబీసీ) వారి కోసం తొలిసారిగా సబ్సిడీ రుణాలను ప్రకటించింది. రూ.2 లక్షల యూనిట్‌ అంచనాలో రూ. లక్ష బ్యాంకు రుణం కాగా మరో లక్ష రూపాయలు రాయితీగా ఇవ్వనున్నారు.ఈ రుణాల కోసం వైశ్య, రెడ్డి, కమ్మ, తదితర కులాలకు చెందిన వారు దరఖాస్తు చేసుకోవచ్చు. ఆయా వర్గాలకు తొలి సారిగా రుణాలు ఇవ్వడంతో పాటు రూ.లక్ష సబ్సిడీ ఉండటంతో దాదాపు అన్ని గ్రామాల్లో రుణాల కోసం భారీ ఎత్తున డిమాండ్‌ నెలకొంది. ఫలితంగా లబ్ధిదారుల ఎంపిక ప్రక్రియ జన్మభూమి కమిటీలకు తలనొప్పులు తెచ్చిపెడుతోంది.ఈబీసీ రుణాల కోసం ఆశావహులు అధిక సంఖ్యలో ఉండగా ప్రభుత్వం జిల్లాకు కేవలం 638 యూనిట్లు మాత్రమే కేటాయించింది. ఇందులో 523 యూనిట్లు గ్రామీణ ప్రాంతాలకు మిగిలిన 115 యూనిట్లు పట్టణ ప్రాంత వాసుల కోసం నిర్ణయించారు. జిల్లా వ్యాప్తంగా 7,353  మంది దరఖాస్తు చేసుకున్నారు. జిల్లాలోని 9 పురపాలక సంఘాలు, నగర పంచాయతీల నుంచి 1,615 దరఖాస్తులు, 49 మండలాల నుంచి 5,738 దరఖాస్తులు అందాయి. పురపాలక సంఘాల పరంగా అత్యధికంగా విజయవాడ నుంచి 367, మచిలీపట్నం నుంచి 360, జగ్గయ్యపేట 251, గుడివాడ 204, నందిగామ 197, తిరువూరు 127, పెడన 55, నూజివీడు 31, ఉయ్యూరు 23 దరఖాస్తులు వచ్చాయి. మండలాల వారీగా చూస్తే అత్యధికంగా వత్సవాయి నుంచి 343, నందిగామలో 258, వీరులపాడులో 218 మంది దరఖాస్తు చేసుకున్నారు. ప్రభుత్వం మంజూరు చేసిన యూనిట్లకు వచ్చిన దరఖాస్తులకు పొంతన లేకపోవడంతోఅధికారులు ఆయా మండలాలు, పురపాలక సంఘాల నుంచి వచ్చిన దరఖాస్తులను బట్టి రమారమి తొమ్మిది నుంచి పది శాతం యూనిట్లను మాత్రమే కేటాయించారు. అంటే విజయవాడకు సంబంధించి 367 దరఖాస్తులకు 26 యూనిట్లు, మచిలీపట్నంలో 360 దరఖాస్తులకు 26 యూనిట్లు చొప్పున దక్కాయి. కొన్ని మండలాలకు అతి తక్కువ యూనిట్లు దక్కాయి. అవనిగడ్డకు 9. గుడ్లవల్లేరుకు 6, చల్లపల్లి 7, గూడూరు 3, పెడన 3, విజయవాడ రూరల్‌ 5, ఉయ్యూరు 4 చొప్పున కేటాయించారు. దాదాపు 27 మండలాలకు పదిలోపు యూనిట్లు మాత్రమే మంజూరు చేశారు. యూనిట్లు అతి తక్కువగా ఉండటంతో మండలాల్లోని ఎక్కువ శాతం గ్రామాలకు ఒక్క యూనిట్‌ కూడా ఇవ్వలేని పరిస్థితి నెలకొంది.
ఈబీసీ వర్గాలకు రూ.లక్ష రాయితీతో తొలిసారిగా రుణాలు ఇస్తుడంటంతో దాదాపు అన్ని గ్రామాల్లో వాటి దక్కించుకునేందుకు పోటీ ఎక్కువగా ఉంది. ఎలాగైనా రుణం దక్కించుకోవాలన్న తాపత్రయంతో దరఖాస్తుదారుల రాజకీయ పైరవీలు జన్మభూమి కమిటీలకు శిరోభారంగా మారాయి. కొన్ని గ్రామాల్లో రుణం దక్కించుకోవడం ద్వారా తమ పరపతి చాటుకోవాలనుకుంటున్న అధికార పక్ష నాయకులు తమవంతు ప్రయత్నాలను ముమ్మరం చేశారు. కొన్ని మండలాల్లో ఉన్న అరకొర యూనిట్లను సర్దుబాటు చేసుకునే విషయంలో జన్మభూమి కమిటీ సభ్యుల మధ్య విభేదాలు పొడసూపేందుకు కారణంగా నిలుస్తున్నాయి. అందివచ్చిన అవకాశాన్ని సద్వినియోగం చేసుకోవాలనే తపనతో కొన్ని ప్రాంతాల్లో కమిటీ సభ్యులు కొందరు తమకు ఒక యూనిట్‌ కావాలని పట్టుబడుతున్నారు. మరోపక్క ఉన్న కొద్ది యూనిట్లు ఎవరికో ఒకరికి కట్టబెడితే మిగిలిన దరఖాస్తుదారుల నుంచి ప్రతికూలతను ఎలా ఎదుర్కోవాలనే సంశయం మండల స్థాయి ప్రజాప్రతినిధులను పట్టి పీడిస్తోంది.జన్మభూమి కమిటీ సభ్యుల సిఫార్సులకే పూర్తి న్యాయం చేయలేని పరిస్థితుల్లో ఎమ్మెల్యేలు, కొందరు అధికార పక్ష ప్రముఖులు వారి పరంగా పంపుతున్న జాబితాలు లబ్ధిదారుల ఎంపిక పక్రియను మరింత సంక్షిష్టంగా మారుస్తున్నాయి. గుడివాడ డివిజన్‌ పరిధిలోని ఓ నియోజకవర్గ స్ధాయి ప్రజాప్రతినిధి తన నియోజకవర్గ పరిధిలోని ఓ మండలానికి మంజూరైన 9 యూనిట్లకు గాను 14 మంది పేర్లను సిఫార్సు చేయడంతో ఆ మండల పాలకవర్గానికి ఏంచేయాలో పాలుపోక అసలు ఎంపిక పక్రియనే తాత్కాలికంగా పక్కన పెట్టారంటే పరిస్థితులు ఏవిధంగా ఉన్నాయో అర్ధం చేసుకోవచ్చు. మరికొన్ని నియోజకవర్గాల్లోని మండలాల్లో కూడా దాదాపుగా ఇదే పరిస్థితి ఉందన్న ఆరోపణలున్నాయి. మొత్తం మీద కరవమంటే కప్పకు కోపం విడవమంటే పాముకు కోపం అన్నట్టుగా ఎంపిక పక్రియ మారిందన్న వాఖ్యలు దాదాపు అన్ని చోట్లా విన్పిస్తోంది.
Tags: How to Choose a Loan?

Leave a Reply

Your email address will not be published. Required fields are marked *