35 శాతం వృద్ధితో ఐసీఐసీఐ సెక్యూరిటీస్ 

Date:17/04/2018
ముంబై ముచ్చట్లు:
ఐసీఐసీఐ బ్యాంకు అనుబంధ కంపెనీ, ఐసీఐసీఐ సెక్యూరిటీస్‌ గత ఆర్థిక సంవత్సరం నాలుగో క్వార్టర్‌ ఆర్థిక ఫలితాలు అంచనాలను మించాయి. 2016-17 ఆర్థిక సంవత్సరం క్యూ4లో రూ.381 కోట్లుగా ఉన్న ఆదాయం గత ఆర్థిక సంవత్సరం క్యూ4లో 35 శాతం వృద్ధితో రూ.515 కోట్లకు పెరిగిందని ఐసీఐసీఐ సెక్యూరిటీస్‌ తెలిపింది. నికర లాభం రూ.83 కోట్ల నుంచి 91 శాతం వృద్ధి చెంది రూ.159 కోట్లకు ఎగసిందని పేర్కొంది. ఎక్కువ బ్రోక‌రేజీ ఆదాయం, ఇత‌ర సేవ‌ల నుంచి వ‌చ్చిన ఆదాయం కార‌ణంగా ఐసీఐసీఐ స‌మీక్షిస్తున్న త్రైమాసికంలో చెప్పుకోద‌గ్గ ఆదాయం సాధించిందని విశ్లేష‌కులు పేర్కొన్నారు.ప‌న్ను చెల్లించ‌క ముందు ఆదాయం(ఎబిటా) 86 శాతం పెరుగుదలతో రూ.260 కోట్లకు వృద్ధి చెందిందని తెలిపింది. రూ.5 ముఖ విలువ గల ఒక్కో షేర్‌కు రూ.3.90 డివిడెండ్‌ను ఇవ్వనున్నామని పేర్కొంది. ఇక ఆర్థిక సంవత్సరం పరంగా చూస్తే, 2016-17 ఆర్థిక సంవత్సరంలో రూ.1,404 కోట్లుగా ఉన్న ఆదాయం గత ఆర్థిక సంవత్సరంలో 32 శాతం వృద్ధితో రూ.1,859 కోట్లకు, అలాగే నికర లాభం 65 శాతం వృద్ధితో రూ.558 కోట్లకు పెరిగాయని తెలిపింది. గత ఆర్థిక సంవత్సరంలో మొత్తం 4.6 లక్షల మంది కొత్త క్లయింట్లు జత అయ్యారని, దీంతో మొత్తం వినియోగదారుల సంఖ్య 40 లక్షలకు పెరిగిందని వివరించింది. స్టాక్‌ మార్కెట్లో లిస్టైన తర్వాత కంపెనీ తొలిసారిగా వెల్లడించిన ఫలితాలు ఇవి ఆర్థిక ఫలితాలు అంచనాలను మించడంతో బీఎస్‌ఈలో  ఐసీఐసీఐ సెక్యూరిటీస్‌ షేర్‌ 1.5 శాతం లాభంతో రూ.429 వద్ద ముగిసింది.
Tags:ICICI Securities with 35% growth

Leave a Reply

Your email address will not be published. Required fields are marked *