Lashkar Yoha Thoiba was hit by the Congress

కాంగ్రెస్ కు జై కొట్టిన లష్కర్ యే తోయేబా

Date:22/06/2018
శ్రీనగర్ ముచ్చట్లు:
జమ్మూ కశ్మీర్‌లో పీడీపీ సంకీర్ణ ప్రభుత్వానికి బీజేపీ మద్దతు ఉపసంహరించడంతో మొహబూబా ముఫ్తీ సీఎం పదవి నుంచి తప్పుకున్న విషయం తెలిసిందే. అనంతరం ప్రభుత్వ ఏర్పాటుకు ఏ పార్టీలు సుముఖంగా లేకపోవడంతో జమ్మూ కశ్మీర్‌లో గవర్నర్ పాలనకు రాష్ట్రపతి ఆమోదం తెలిపారు. ముఫ్తీ రాజీనామా చేసిన మర్నాడే గవర్నర్ పాలన ప్రారంభమైంది. జమ్మూ కశ్మీర్‌లో గవర్నర్ పాలన విధించడాన్ని కాంగ్రెస్ నేత గులాం నబీ అజాద్ తప్పుబట్టిన విషయం తెలిసింది. దీనికి అనూహ్యంగా పాకిస్థాన్ తీవ్రవాద సంస్థ లష్కరే తొయిబా మద్దతు పలుకుతూ ఓ ప్రకటన వెలువరించడం గమనార్హం. గవర్నర్ పాలనను వ్యతిరేకిస్తూ లష్కరే తోయిబా చీఫ్ మహ్మద్ షా పేరిట మీడియాకు ఓ ప్రకటన అందింది. కశ్మీర్‌లో తాము గవర్నర్ పాలనను తీవ్రంగా వ్యతిరేకిస్తున్నామని, రాష్ట్రంలో నరమేధం జరిగే అవకాశాలు ఉన్నాయని అందులో తెలిపింది. మాజీ ముఖ్యమంత్రి గులాం నబీ ఆజాద్‌, ఇతర కాంగ్రెస్ నేతల అభిప్రాయాలతో తాము ఏకీభవిస్తున్నామని, పెద్దసంఖ్యలో అమాయకులను ఊచకోత కోసేందుకే గవర్నర్ పాలన విధించారని ఆరోపించింది. గవర్నర్ పాలన విధించి 1990ల నాటి పరిస్థితులను మరోసారి గుర్తుకు తెస్తున్నారని, మౌలిక సదుపాయాలను అణగదొక్కి, అమాయకుల నరమేధానికి భారత సర్కారు ప్రయత్నిస్తోందని లష్కరే తొయిబా అధికార ప్రతినిధి డాక్టర్ అబ్దుల్లా ఘాజ్వీ ద్వారా వచ్చిన ఈ-మెయిల్‌లో స్పష్టం చేశారు. లోయ, జమ్మూలో ఆర్‌ఎస్ఎస్ ఎజెండాను అమలుచేయడంలో మాజీ సీఎం మొహబూబా ముఫ్తీ బాగా తోడ్పాటునందించారని విమర్శించారు. ఆపరేషన్ ఆలౌట్ లాంటి చర్యల ద్వారా కశ్మీరీలను అణగదొక్కడానికి బీజేపీ సర్కారు సైనిక చర్యలకు దిగుతోందని, 8 లక్షల మంది సైనికులు జమ్మూ కశ్మీర్‌లో అరాచకాలకు పాల్పడుతున్నారని ఆరోపించింది. కానీ కశ్మీర్ ప్రజల అపారమైన త్యాగాల వల్ల గతంలో చేపట్టిన ఆపరేషన్ ఆలౌట్ విఫలమైందని గుర్తిచేసింది. ఇక్కడ ప్రజలు బానిసలుగా బతుకుతున్నారని, భారత సైన్యం ప్రధాన అజెండాను బయటపెట్టడానికి ప్రయత్నించినందునే జర్నలిస్టు బుఖారీని హత్య చేయించారని దుయ్యబట్టడం విశేషం. అంతేకాదు కాస్త ఆలస్యమైనా కశ్మీర్‌లో మానవ హక్కుల ఉల్లంఘనపై ఐక్యరాజ్యసమితి నిజాన్ని తెలుసుకుందని లష్కరే తోయిబా వ్యాఖ్యానించింది. రంజాన్ సందర్భంగా పాటించిన కాల్పుల విరమణ కూడా ఓ డ్రామాగా అభివర్ణించిన ఉగ్రవాద సంస్థ, ఉద్దేశపూర్వకంగానే రహస్య లక్ష్యం కోసం చేసిందే కానీ, శాంతి పరిరక్షక అభివృద్ధికి కాదని స్పష్టం చేసింది. గత నాలుగేళ్లుగా భారత్‌లో వ్యక్తిగత స్వేచ్చ కూడా లేకుండా పోయిందని విమర్శించింది.
కాంగ్రెస్ కు జై కొట్టిన లష్కర్ యే తోయేబా http://www.telugumuchatlu.com/lashkar-yoha-thoiba-was-hit-by-the-congress/
Tags:Lashkar Yoha Thoiba was hit by the Congress

Leave a Reply

Your email address will not be published. Required fields are marked *