కులాంతర వివాహం చేసుకున్నాం ఆశ్రయం కల్పించండి

Date:19/09/2018
నెల్లూరు ముచ్చట్లు:
కులాంతర వివాహం చేసుకున్న తమకు చంపేస్తామంటూ బెదిరింపులు వస్తున్నాయని నవ దంపతులు విజయవాడలో మీడియాను ఆశ్రయించారు. మిర్యాలగూడలో ప్రణయ్‌ హత్య తర్వాత ఆందోళనకు గురయ్యామని తెలిపారు. ఆరునూరైనా కట్టుకున్న వాడితోనే బతుకుతానని తేల్చి చెప్పినా.. తన తల్లిదండ్రులు వినిపించుకోవడంలేదని యువతి ఆవేదన వ్యక్తం చేసింది.
నెల్లూరు జిల్లా గూడూరుకు చెందిన బండి సత్యంరెడ్డి, పద్మావతి దంపతుల కుమార్తె శివదీప్తి రెడ్డి (23), కడపకు చెందిన మురహరి విజయ్‌కుమార్‌ (31) కొన్నేళ్లుగా ప్రేమించుకున్నారు. అయితే వీరి కులాలు వేర్వేరు కావడంతో దీప్తిరెడ్డి తల్లిదండ్రులు వివాహానికి అంగీకరించలేదు. దీంతో జూలై 26న వీరిద్దరూ కర్నూలులోని ఓ చర్చిలో ప్రేమ వివాహం చేసుకున్నారు.
కులాంతర వివాహంతో పరువు పోయిందని భావిస్తున్న తల్లిదండ్రులు తమను బెదిరిస్తున్నారని దీప్తిరెడ్డి మీడియాకు తెలిపింది. తమను చంపడానికి రౌడీషీటర్లకు డబ్బులిచ్చి బెదిరింపులకు గురిచేస్తున్నారని ఆవేదన వ్యక్తం చేసింది. తమ బంధువుల్లో కొందరు పోలీసు శాఖలో ఉన్నత పదవుల్లో ఉన్నారని, వారి సాయంతో తమ వివరాలను సేకరించి వేధింపులకు గురిచేస్తున్నారని తెలిపింది.. తాను లాండ్రీ నిర్వహించుకుంటూ కుటుంబాన్ని పోషిస్తున్నానని విజయ్ కుమార్ తెలిపాడు.
తాము ప్రేమ వివాహం చేసుకున్న తర్వాత దీప్తి తల్లిదండ్రులు ఆమెను తీసుకెళ్లడానికి ప్రయత్నించారని, బంధువులతో రాయభారం చేశారని చెప్పాడు. అయితే.. దీప్తి తనతోనే ఉంటానని తేల్చి చెప్పిందని విజయ్ వివరించాడు. ఆ తర్వాత నుంచి ఇళ్లు కూల్చేస్తాం, బాంబులు వేస్తామంటూ తమను బెదిరిస్తున్నారని అతడు ఆందోళన వ్యక్తం చేశాడు.దీప్తి తల్లిదండ్రులు మాట్లాడదామని పిలిస్తే తిరుపతి వెళ్లాం. దీప్తిని తమతో పంపించాలని వాళ్లు కోరారు.
అందుకు అంగీకరించలేదు. విజయ్‌ను నేను ఇష్టపడి పెళ్లి చేసుకున్నా.. చావైనా, బతుకైనా అతడితోనే అని దీప్తి వారికి తేల్చి చెప్పింది. ఆ తర్వాత నుంచి చంపేస్తామంటూ బెదిరిస్తున్నారు’ అని విజయ్ చెప్పాడు. దీప్తి తండ్రి చాలా ధనవంతుడని, తమను ఏమైనా చేయొచ్చని ఆందోళన వ్యక్తం చేశాడు. డీజీపీని కలిసి రక్షణ కల్పించాల్సిందిగా కోరనున్నట్లు తెలిపాడు.
నల్గొండ జిల్లా మిర్యాలగూడలో పెరుమాళ్ల ప్రణయ్‌ దారుణ హత్య తర్వాత తెలుగు రాష్ట్రాల్లో ప్రేమ వివాహం చేసుకున్న జంటలు భయాందోళనకు గురవుతున్నారు. తల్లిదండ్రులను, కట్టుబాట్లను దాటి ఒక్కటైన వారు ప్రాణాలను గుప్పిట్లో పెట్టుకుని జీవిస్తున్నారు. మిర్యాలగూడ హత్య తర్వాత పోలీసు స్టేషన్లలోనూ ఈ తరహా ఫిర్యాదులు పెరుగుతున్నాయి.
Tags:Make a shelter and get married

Leave a Reply

Your email address will not be published. Required fields are marked *