Railway is changing ...

రైల్వే మారుతోంది…

Date:19/06/2018
ముంబై ముచ్చట్లు:
భారత రైల్వే కొత్త పుంతలు తొక్కుతోంది. టికెట్ల బుకింగ్ నుంచి.. ఆహారం వరకు ప్రతి ఒక్క అంశంపై ప్రత్యేకంగా శ్రద్ధ పెడుతోంది. ఐఆర్‌సీటీసీ ఇటీవల అందుబాటులోకి తెచ్చిన కొత్త వెబ్‌సైట్ ద్వారా టికెట్ల బుకింగ్ సులభతరమైంది. అలాగే, రైళ్లలో అందించే సేవల్లో కూడా మార్పులు తెచ్చేందుకు శ్రీకారం చుట్టింది. కొత్త ఆలోచనలతో ముందుకెళ్తోంది. క్యాష్ అక్కర్లేదు.. కార్డ్ చాలు: రైళ్ల వెళ్లేవారికి ఏమైనా చిరుతిళ్లు లేదా ఆహారం కొనుగోలు చేయాలంటే చిల్లర సమస్య బాగా వేదిస్తోంది. రైళ్లలో ఆహారాన్ని ఎక్కువ ధరలకు విక్రయిస్తున్నారనే ఫిర్యాదులు కూడా వస్తున్న నేపథ్యంలో ప్రభుత్వం పీవోఎస్ మెషిన్లను అందుబాటులోకి తేవాలని నిర్ణయించింది. ఈ నేపథ్యంలో ప్రయాణికుడు చెల్లించే ప్రతి పైసాకు బిల్లు వస్తుంది. అలాగే, వ్యాపారుల నిలువ దోపిడీకి కూడా అడ్డుకట్టపడుతుంది. ఆర్డర్ చేసిన ఆహారానికి బిల్లు లభించకపోతే.. వారికి ఎలాంటి ఛార్జీలు వేయమని రైల్వే ప్రకటించింది.
మహిళల భద్రతకు ‘సేఫ్టీ బటన్’: రైళ్లలో ప్రయాణించే మహిళల కోసం రైల్వే ప్రత్యేకంగా దృష్టిపెట్టింది. ఈ సందర్భంగా బోగీల్లో ‘సేఫ్టీ బటన్’ను అందుబాటులోకి తెస్తున్నారు. దీన్నీ రైళ్లలో గార్డ్ కోచ్‌కు అనుసంధించారు. రైల్లో ఏదైనా సమస్య వస్తే.. మహిళలు వెంటనే ఈ బటన్ ప్రెస్ చేయాలి.
ఫుడ్ వెండింగ్ మెషిన్స్: రైల్వే తొలిసారిగా కొయంబతూర్ – బెంగళూరు ఉదయ్ ఎక్స్‌ప్రెస్‌లో ఫుడ్ వెండింగ్ మెషిన్లను అందుబాటులోకి తెచ్చింది. ఇందులో మీకు నచ్చిన ఆహారాన్ని ఎంచుకుని, సరిపడా నగదును మెషిన్‌లో వేస్తే చాలు. ఈ సదుపాయాన్ని మిగతా రైళ్లలో కూడా అందుబాటులోకి తేవాలని రైల్వే భావిస్తోంది.
మరింత పరిశుభ్రంగా: ఏసీ కోచ్‌ల్లో శుభ్రమైనా దుప్పట్లు, బ్లాంకెట్లు లభించడమనేది ఓ కల. అయితే, రైల్వే దీన్ని నిజం చేస్తామని హామీ ఇస్తోంది. మొరటుగా ఉండే బ్లాంకెట్ల స్థానంలో తేలికైన నైలాన్, ఉలెన్ బ్లాంకెట్లను ఇవ్వాలని నిర్ణయించింది.
పరిశుభ్ర ఆహారం: రైల్లో ఉండే ప్యాంట్రీ కార్లలో సీసీటీవీ కెమేరాలను ఏర్పాటు చేయాలని రైల్వే నిర్ణయించింది. ప్రయాణికులకు నాణ్యమైన, రుచికరమైన ఆహారం ఇవ్వాలని ఆదేశించింది. ప్రిమియం రైళ్లలో ఈ విధానాన్ని ప్రయోగాత్మకంగా ప్రవేశపెట్టనుంది.
భద్రతకు ‘నిఘా’ నేత్రాలు: రైళ్లో ప్రయాణికుల భద్రత కోసం బోగీల్లో సీసీటీవీ కెమేరాలను ఏర్పాటు చేయనున్నారు. వీటిలో రికార్డయ్యే ఫూటేజీలను రైల్వే ప్రొటెక్షన్ ఫోర్స్ పరిశీలిస్తుంది. దాదాపు 12 లక్షలకు పైగా సీసీటీవీ కెమేరాలను రైళ్లలో ఏర్పాటు చేయాలని ప్రభుత్వం నిర్ణయించింది.
రైల్వే డెబిట్ కార్డ్: నగదు రహిత చెల్లింపులను ప్రోత్సహించేందుకు రైల్వే-స్టేట్ బ్యాంక్ ఇండియా సంయుక్తంగా డిబెట్ కార్డును అందుబాటులోకి తేవాలని ప్రభుత్వం నిర్ణయించింది. ఈ కార్డు ద్వారా ఆన్‌లైన్లో టికెట్లు బుక్ చేసుకునేవారికి ఎటువంటి అదనపు ఛార్జీలు పడవు. వృద్ధులకు, మహిళలకు కింది సీట్లు: టికెట్ల రిజర్వేషన్లలో వృద్ధులకు, మహిళలకు కింది సీట్లు (లోయర్ బర్త్స్) కేటాయించేలా ఐఆర్‌సీటీసీ మార్పులు చేసింది. 60 ఏళ్లు పైబడిన వృద్ధులు, 45 ఏళ్లు పైబడిన మహిళలు ఐఆర్‌సీటీలో ప్రత్యేక కోటా కింద ఈ సదుపాయాన్ని సద్వినియోగం చేసుకోవచ్చు.
యాప్స్‌తో సహకారం: ప్రయాణికుల నుంచి ఫిర్యాదులు స్వీకరించేందుకు ‘రైల్ మదద్’, ‘రైల్ మెను’ అప్లికేషన్లు(యాప్స్) అందుబాటులోకి తెచ్చింది. అలాగే, రైళ్లలో ఆహార ధరల వివరాలను కూడా వీటిలో తెలుసుకోవచ్చు.
ఎక్కాల్సిన రైల్వే స్టేషన్ మార్చుకోవచ్చు: ముందుగా బుక్ చేసుకున్న రైల్వే స్టేషన్ నుంచి కాకుండా వేరొక రైల్వే స్టేషన్ నుంచి రైలు ఎక్కాల్సి వస్తే ఐఆర్‌సీటీసీ ద్వారా మార్పులు చేసుకోవచ్చు.
సాధారణ టికెట్లకు రైల్వే యాప్: రిజర్వేషన్ లేని (అన్ రిజర్వ్‌డ్) టికెట్ల కోసం రైల్వే ప్రత్యేక యాప్‌ను అందుబాటులోకి తెచ్చింది. సాధారణ టికెట్లుతో పాటు ప్లాట్‌ఫాం టికెట్లను కూడా ఈ యాప్ ద్వారా కొనుగోలు చేసుకోవచ్చు. అవసరం లేదనుకుంటే రద్దు చేసుకోవచ్చు కూడా. ‘యూటీఎస్ ఆన్ మొబైల్’ పేరుతో రైల్వే సమాచార వ్యవస్థ కేంద్రం (క్రిస్) యాప్‌ను అందుబాటులోకి తెచ్చింది. గూగుల్ ప్లే స్టోర్ లేదా విండోస్ స్టోర్ నుంచి దీన్ని ఉచితంగా డౌన్లోడ్ చేసుకుని ఇన్‌స్టాల్ చేసుకోవాలి. ఈ టికెట్లను ప్రత్యేకంగా ముద్రించాల్సిన అవసరం లేదు. టికెట్లు తనిఖీ సిబ్బంది అడిగినప్పుడు యాప్‌ ద్వారా బుక్ చేసుకున్న టికెట్‌ను చూపిస్తే చాలు.
Tags:Railway is changing …

Leave a Reply

Your email address will not be published. Required fields are marked *