పరిస్థితి మళ్లీ మొదటికి వచ్చిన కాంగ్రెస్ లెక్క

 Date:22/10/2018
హైదరాబాద్ ముచ్చట్లు:
ఓ వైపు టీఆర్ఎస్ పార్టీ 107 మంది అభ్యర్థుల పేర్లను ప్రకటించి ఎన్నికల ప్రచారంలో దూసుకెళ్తుంటే.. మహాకూటమి మాత్రం ఇంకా సీట్ల సర్దుబాటు దశలోనే ఉంది. కూటమిలోని పార్టీల మధ్య సయోధ్య కుదరకపోవడంతో లెక్క తేలడం లేదు. దీంతో ఆయా పార్టీల నేతల్లో టెన్షన్ మొదలైంది. సీట్లు ఆశిస్తున్న ఆశావహుల్లో సైతం ఆందోళన నెలకొంది.
మహాకూటమిలో సీట్ల కేటాయింపు కొలక్కివచ్చినట్లు చెబుతున్నా.. కాంగ్రెస్ పార్టీ తమకు చాలా తక్కువ సీట్లను కేటాయిస్తుందనే ఆందోళన వ్యక్తమవుతున్నట్లు తెలుస్తోంది. ఇప్పటికే కాంగ్రెస్ ఆధ్వర్యంలో పలు దఫాలు రహస్య సమావేశాలు ఏర్పాటు చేసుకున్న కూటమి నేతలు.. సీట్ల విషయంలో ఎక్కడా తగ్గడం లేదు.
తెలంగాణలోని 119 నియోజవర్గాలకు గాను.. 100 సీట్లలో కాంగ్రెస్ పార్టీ తొలుత భావించింది. 19 సీట్లను మిగతా పార్టీలకు సర్దుబాటు చేయాలని అనుకుంది.
అన్ని తక్కువ సీట్లను కేటాయిస్తే.. కూటమి ఎందుకనే ప్రశ్నలు రావడంతో మూడు అంకెలు తగ్గి.. 22 సీట్లు ఇచ్చేందుకు కాంగ్రెస్ సిద్ధమైంది. అయితే, ఇది కూడా తమకు గిట్టుబాటు కాదని మిత్రపక్షాలు తెగేసి చెప్పేయడంతో పరిస్థితి మళ్లీ మొదటికి వచ్చినట్లు తెలుస్తోంది. టీడీపీకి 12, టీజేఎస్కు 7, సీపీఐకు 3 సీట్లు కేటాయించాలనేది కాంగ్రెస్ లెక్క. అయితే, టీడీపీ 12 సీట్లు తమకు సరిపోవని తెలంగాణలో తమకు మరో ఎనిమిది స్థానాల్లో బలం ఉందని మొత్తం 20 సీట్లు కేటాయించాలని డిమాండు చేస్తున్నట్లు తెలిసింది.
సోమవారం టీడీపీ అధినేత చంద్రబాబు ఆధ్వర్యంలో జరిగిన సమావేశంలో కూడా ఈ విషయం చర్చకు వచ్చింది. ఈ విషయంపై తాను కాంగ్రెస్ పార్టీ పెద్దలతో మాట్లాడతానని బాబు చెప్పారు. ముఖ్యంగా కూకట్పల్లి, శేరిలింగంపల్లి స్థానాలపై పట్టుబట్టాలని టీడీపీ భావిస్తోంది. ఈ స్థానాలపై కూటమిలో ఇంకా ఏ నిర్ణయం తీసుకోక ముందే టీడీపీ అభ్యర్థులను సిద్ధం చేసుకోవడం గమనార్హం. ఆయా స్థానాల్లో తమకు గెలుపు అవకాశాలు ఉన్నాయని టీడీపీ వాదిస్తోంది.
119 నియోజకవర్గాల నుంచి సర్వే రిపోర్టులు తెచ్చుకున్న కాంగ్రెస్ పార్టీ.. గెలిచే అవకాశాలు ఉన్న అభ్యర్థులకే సీట్లు ఇవాలనే లక్ష్యంతో ఉంది. దాని ప్రకారమే టీడీపీ, టీజేఎస్, సీపీఐలకు సీట్లను సర్దుబాటు చేస్తున్నట్లు తెలిసింది. ఈ విషయంలో టీజేఎస్ నుంచి అభ్యంతరాలు వ్యక్తమవుతున్నట్లు సమాచారం. తమకు 17 స్థానాలు కావాలని ఆ పార్టీ కోరుతోంది.
సీపీఐ కూడా 12 స్థానాల కోసం ఒత్తిడి తెస్తోంది. ఇందుకు కాంగ్రెస్ సానుకూలంగా స్పందించకపోవడంతో ఆ పార్టీలు రెండు బయటకు వచ్చేస్తాయనే వదంతలు కూడా వస్తున్నాయి. అయితే, ఆయా పార్టీల నేతలు తాము కూటమి నుంచి బయటకు వెళ్లబోమని చెబుతున్నారు. ప్రస్తుతం టీడీపీ అధినేత చంద్రబాబు కూడా హైదరాబాద్లోనే ఉన్న నేపథ్యంలో సోమవారం ఈ చర్చలు కొలిక్కి వచ్చే అవకాశాలు కనిపిస్తున్నాయి.
Tags:The Congress reorganized the situation again

Leave a Reply

Your email address will not be published. Required fields are marked *