దేశాన్ని కుదిపేసిన ఆర్థిక స్కాములు

Date:15/02/2018
ముంబై ముచ్చట్లు:
ఆర్థిక నేరాలు మన దగ్గర సర్వసాధారణం అయిపోయాయి. స్వాతంత్ర్యం వచ్చిన తొలినాళ్లలోనే ఆర్మీ వాహనాల కొనుగోలులో ముడుపులు స్వీకరించినట్లు అప్పటి ప్రధాని నెహ్రూపై ఆరోపణలు వచ్చాయి. అయితే కాలం గడిచే కొద్ది కంభకోణాలకు పాల్పడే విధానాలు, అనుసరిస్తున్న పద్ధతులు, ఖాజేస్తున్న మొత్తం అన్నీ మారిపోయాయి. ఇరవై ముప్పై కోట్ల నుంచి ప్రారంభమైన కుంభకోణాల పరంపర ఇప్పుడు లక్షల కోట్లకు చేరింది. వ్యవస్థలోని లోపాలే మోసగాళ్లకు పెట్టుబడులు అవుతున్నాయి. ప్రభుత్వంలోని పెద్దల సాయంతో సమాజంలో పెద్దమనుషులుగా చలామణి అవుతున్న మాయగాళ్లు చేసిన కుంభకోణాలు అన్నీ ఇన్నీ కావు. మరి ఈ నేపథ్యంలో దేశ చరిత్రలో అందర్ని విస్మయానికి గురి చేసిన పది కుంభకోణాల వివరాలు తెలుసుకుందామా… హవాలా కుంభకోణం అప్పట్లో ఇదొక సంచలనాత్మక కుంభకోణం. 1996లో బ‌య‌ట‌ప‌డిన ఈ కుంభ‌కోణంలో చాలా మంది బ‌డా నాయ‌కుల‌కు ప్ర‌మేయం ఉన్న‌ట్లు ఆరోపణలు గుప్పుమన్నాయి. రాజ‌కీయ నాయ‌కులు, ఉన్నతాధికారులతో పాటు కాశ్మీర్‌లోని హిజ్బుల్‌ తీవ్ర‌వాదుల‌కు సైతం ఈ హ‌వాలా రూపంలో డ‌బ్బులు ముట్టాయి. అప్పట్లో బీజేపీ అగ్రనేత ఎల్.కె.అద్వానీపై కూడా ఆరోపణలు వచ్చాయి. హర్షద్ మెహతా స్టాక్ మార్కెట్ కుంభకోణం .1992లో వెలుగులోకి వచ్చిన ఈ కుంభకోణం మేధావులనే ఆలోచనలో పడేసింది. షేర్‌మార్కెట్‌లోని లోపాలనే పెట్టుబడిగా చేసుకొని ‘హర్షద్ మెహతా’ తన మాస్టర్‌మైండ్‌తో కుంభకోణానికి తెరలేపారు. షేర్‌మార్కెట్ బ్రోకర్‌గా కెరీర్ ప్రారంభించిన హర్షద్ మెహతా బ్యాంకింగ్ సిస్టమ్‌లోని లోపాలను బాగా అధ్యయనం చేసి కుంభకోణానికి స్కెచ్ వేశారు. 90 దశకంలోనే రూ. 4 వేల కోట్ల కుంభకోణానికి పాల్పడ్డారు.ఈ దెబ్బకు అటు కేంద్ర ప్రభుత్వం ఇటు స్టాక్ మార్కెట్ రెండు రక్షణలో పడిపోయాయి. క్యాపిటల్ మార్కెట్ 0.1 మిలియన్ కోట్ల మేర నష్టపోయింది. దీంతో సరళీకరణ ఆర్థిక విధానాలను అమలులోకి తీసుకొచ్చిన ఆర్థికవేత్తలే ఆత్మరక్షణలో పడిపోయారు. ఆతర్వాత హర్షద్ మెహతా చూపిన బాటలోనే నడిచి కేత‌న్ ప‌రేఖ్ రూ.1000 కోట్ల కుంభకోణానికి పాల్పడ్డారు. సి.ఆర్.బన్సాలీ కుంభకోణం మ్యూచువల్ ఫండ్స్ ద్వారా నగదు సేకరించి నకిలీ కంపెనీల్లో పెట్టుబడి పెట్టినట్లు చూపిస్తూ సి.ఆర్.బన్సాలీ 1995లోనే 1200 కోట్ల కుంభకోణానికి బీజం వేశారు. 1993 నుంచి 1996 వరకు మూడేళ్ల కాలంగా ఏకంగా 133 నకీలీ కంపెనీలనే సృష్టించాడు. ఈ తతంగాన్ని సెక్యూరిటీ ఎక్జేంజ్ బోర్డ్ ఆఫ్ ఇండియా పసిగట్టే సరికి జరగాల్సిన నష్టం జరిగిపోయింది. సంజయ్ అగర్వాల్ కుంభకోణం ‘హోం ట్రేడ్’ కంపెనీని స్థాపించి కోట్లాది రూపాయలు వెచ్చించి కనీవినీ ఎరుగని రీతిలో హృతిక్ రౌషన్, సచిన్ టెండుల్కర్, షారుఖ్ ఖాన్ లాంటి దిగ్గజాలతో అడ్వటైజ్ చేసుకున్నారు సంజయ్ అగర్వాల్. ఇలా అందరి నమ్మకాన్ని చూరగొన్న తర్వాత 25 కార్పోరేట్ బ్యాంకుల నుంచి ఏకంగా 600 కోట్లు అప్పులు తీసుకొని చేతులెత్తేశాడు. ఎన్.ఎస్.ఇ.ఎల్ స్కాం సరుకుల కొనుగోలు, అమ్మకాలను కాగితాల మీద చూపించి ఇన్వెస్టర్ల డబ్బను కాజేసిన కుంభకోణం ఇది. ‘ఫైనాన్సియ‌ల్ టెక్నాల‌జీస్ ఇండియా లిమిటెడ్’ ప్రమోట్ చేసిన ‘ఎన్ఏఎఫ్ఈ’ అనే కంపెనీ ఈ కుంభకోణానికి పాల్పడింది. బ్రోక‌ర్లు సాయంతో ట్రేడింగ్ వ్య‌వ‌స్థ‌ను ఓ ఆట ఆడుకున్న ఉదంతం ఇది. క్ల‌యింట్ల కోడ్ల‌ను దాదాపు 3 ల‌క్ష‌ల సార్లు అన‌ధికారంగా మార్చారు. అత్య‌వ‌స‌ర‌మైన‌ప్పుడు మాత్ర‌మే మార్చాల్సిన కోడ్లను లక్షలసార్లు మార్చి లెక్కకు మించిన లావాదేవీలు సృష్టించి డబ్బులు కాజేశారు. సత్యం కుంభకోణం బ్యాలెన్స్ షీట్ లో అంకెల గారిడీతో అందర్ని ఎలా బురిడీ కొట్టించవచ్చో ఈ కుంభకోణం ద్వారా తెలిసింది. రామలింగరాజు సంవత్సరాల తరబడి క్రమ పద్ధతిలో కంపెనీ లాభ నష్టాలను మార్చుకుంటూ అందర్నీ మోసం చేశారు. ఏకంగా రూ.8 వేల కోట్ల రూపాయలకు తప్పుడు లెక్కలు చూపినట్లు తేలింది. దీంతో రామలింగరాజు జైలు పాలయ్యారు. శారదా చిట్ ఫండ్ కుంభకోణం చిట్ ఫండ్ సంస్థ స్థాపించి ప్రజల నుంచి పెద్ద మొత్తంలో చిట్టీలు కట్టించుకొని సంస్థ ఛైర్మన్ సుదీప్తా సేన్ చేతులెత్తేశారు. పశ్చిమ బెంగాల్, ఒడిశా ప్రజలు భారీగా చిట్టీలు కట్టి మోసపోయారు. పలు మీడియా సంస్థలు స్థాపించి రాజకీయ నేతల ప్రాపకం సంపాదించి వారి అండదండలతో రూ.4 వేల కోట్ల వరకు డిపాజిట్లు సేకరించి ఆతర్వాత చేతులు ఎత్తేశారు. సుబ్రతోరాయ్ ‘సహారా ఇండియా పరివార్ ఇన్వెస్టర్’ ఫ్రాడ్ కేసు పేరుతో ఈ కుంభకోణం సంచలనమే సృష్టించింది. సెబీ నిబంధనలను బుట్టదాఖలు చేస్తూ సహారా హౌసింగ్ బాండ్స్ పేరుతో బాండ్లు ఇవ్వడం ద్వారా ఏకంగా 24 వేల కోట్లు సేకరించారు. సుప్రీంకోర్టు జోక్యం చేసుకుంటే కాని ఈ కుంభకోణం కేసు దర్యాప్తులో ఎలాంటి పురోగతి రాలేదు. చివరకు సుబ్రతో రాయ్ జైలు పాలయ్యారు.తేల్గీ స్టాంపు పేపర్ల కుంభకోణం ఎలాగైన డబ్బులు సంపాదించాల్సిందే అని అనుకునే వాళ్లు ఎన్ని రకాల మార్గాలను ఎంచుకుంటారో చెప్పేందుకు ఈ కుంభకోణమే సజీవ సాక్ష్యం. కేంద్రం తన ప్రిటింగ్ ప్రెస్‌లలో స్టాంప్ పేపర్లను ముద్రిస్తుంది. అయితే ఈ స్టాంప్ పేపర్లను ముద్రించే యంత్రాలు పాతబడడంతో వాటిని తుక్కు కింద అమ్మేసింది. ఆ యంత్రాలను ప్రభుత్వం నుంచి వేలం పాటలో కొనుక్కొని వాటి ద్వారా నకిలీ స్టాంప్ పేపర్లు ముద్రించి ఏకంగా 12 రాష్ట్రాల్లో అమ్మేశాడు. అధికార పార్టీ నేతలు, ఉన్నతాధికారుల సాయంతో ఏకంగా రూ.20 వేల కోట్ల కుంభకోణానికి తెరలేపారు.2జీ స్పెక్ట్రమ్కాదేది కుంభకోణానికి అనర్హం అని నిరూపించిన కుంభకోణం ఇది. కార్పోరేట్ కంపెనీలకు లబ్ది చేకూర్చేందుకు సర్కారు ఖజానాకు లక్షలాది కోట్ల రూపాయల మేర నష్టం కలిగించిన కుంభకోణం ఇది. స్పెక్ట్రం కేటాయింపులను ఇష్టారీతిన జరిపి మాజీ మంత్రి డి.రాజా జైలు పాలయ్యారు. అయితే ఇటీవలే వచ్చిన సుప్రీంకోర్టు తీర్పుతో నిర్దోషిగా బయటపడ్డారు. 2014 ఎన్నికలప్పుడు 2జీ స్పెక్ట్రమ్ కుంభకోణాన్ని భారీగా ప్రచారం చేసుకొని లబ్ది పొందిన ప్రధాని మోడీ …. దోషులను పట్టుకోవడంపై ఎలాంటి ఆసక్తి చూపలేదు. లోలోపలి మతలబులతో మోడీ రాజీ పడి దేశం చరిత్రలోని అతిపెద్ద కుంభకోణాన్నిచూసిచూడనట్లు వ్యవహరించారనే ఆరోపణలు భారీగా వచ్చాయి.
Tags The economic scams that have shattered the country

Leave a Reply

Your email address will not be published. Required fields are marked *