గోదావరిలో ఆక్రందనలు…

Date:16/05/2018
ఏలూరు ముచ్చట్లు:
మాటలకందని విషాదం.. గోదావరి తీరంలో ఆక్రందనలు.. వాడపల్లి సమీపంలో మునిగిన లాంచీని ఎట్టకేలకు ఒడ్డుకు చేర్చారు. అందులో చిక్కుకొని సజీవ జలసమాధి అయినవారి మృతదేహాలను ఒక్కొక్కటిగా వెలికితీస్తుంటే.. కుటుంబసభ్యులు, బంధువుల రోదనలు మిన్నంటాయి. ఇప్పటివరకూ 4 మృతదేహాలను వెలికితీశారు. ప్రమాదంలో మొత్తం 30 మందికి పైగా చిక్కుకున్నారు. తూర్పు గోదావరి జిల్లా మండలం మంటూరు సమీపంలో గోదావరి నదిలో ప్రాంతంలో సుమారు 50 మంది ప్రయాణికులతో వెళ్తున్న పడవ మునిగిపోయింది. భారీ వర్షం, పెను గాలుల ధాటికి తిరగబడిన లాంచీ.. బరువు ఎక్కువగా ఉండటంతో 60 అడుగుల లోతులో ఇసుకలో కూరుకుపోయింది. ప్రమాదం జరిగిన వెంటనే 16 మంది గోదావరిలో ఈదుకుంటూ ఒడ్డుకు చేరుకున్నారు. మరో 30 మందికి పైగా గల్లంతయ్యారు. ఎన్డీఆర్‌ఎఫ్‌ బృందాలు, నేవీ సిబ్బంది మంగళవారం రాత్రి నుంచి గాలింపు చేపట్టారు. పడవ 60 అడుగుల లోతులో ఇసుకలో కూరుకుపోవడం, చుట్టూ చిమ్మ చీకటి ఉండటంతో సహాయ కార్యక్రమాలకు తీవ్ర ఇబ్బందులు తలెత్తాయి. బుధవారం ఉదయం తర్వాత గానీ సహాయ చర్యలు ఊపందుకోలేదు. అయిదారు మరబోట్లు, హెలికాప్టర్ సాయంతో గాలింపు చర్యలు చేపట్టిన అధికారులు ఎట్టకేలకు గోదావరి గర్భంలో లాంచీని గుర్తించారు. మృతదేహాలు కూడా పడవలోనే చిక్కుకుపోవడంతో సహాయ బృందాలకు సవాల్‌గా మారింది. లాంచీకి తాళ్లు కట్టి భారీ క్రేన్ల సాయంతో దాన్ని ఒడ్డుకు తీసుకొచ్చారు. అందులో చిక్కుకుని ఉన్న మృతదేహాలను వెలికితీశారు. బుధవారం మధ్యాహ్నం ఘటనా స్థలికి చేరుకున్న ముఖ్యమంత్రి చంద్రబాబు నాయుడు సహాయ కార్యక్రమాలను దగ్గరుండి పర్యవేక్షించారు. అంతకుముందే అక్కడికి వెళ్లిన హోంమంత్రి చినరాజప్ప సహాయ కార్యక్రమాలను దగ్గరుండి పర్యవేక్షించారు. ఆయన వెంట పలువురు మంత్రులు, అధికారులు ఉన్నారు. తూర్పుగోదావరి జిల్లా కలెక్టర్‌ కార్తికేయ గత రాత్రి నుంచి అక్కడే ఉండి సహాయ చర్యలను పర్యవేక్షించారు.బాధితుల్లో తూర్పు గోదావరి జిల్లా ఏజన్సీ ప్రాంతానికి చెందిన గిరిజనులే ఎక్కువగా ఉన్నారు. దేవీపట్నం మండలం కె.కొండూరు, కచ్చులూరు, తాళ్లూరు, కొండమొదలు గ్రామాలకు చెందిన వారు ఈ ప్రమాదంలో జల సమాధి అయ్యారు. వీరంతా వివిధ పనుల నిమిత్తం రంపచోడవరం, దేవీపట్నం ప్రాంతాలకు వచ్చి తిరిగి వెళ్తున్నారు. కొందరు చికిత్స కోసం రంపచోడవరం ఆస్పత్రికి, మరికొందరు ఆధార్‌ సమస్య పరిష్కార నిమిత్తం, ఇంకొందరు బియ్యం, నిత్యావసరాల కొనుగోలుకు, మరికొందరు రేషన్‌కార్డుల దరఖాస్తు కోసం దేవీపట్నం వెళ్లారు. పనులు చక్కబెట్టుకొని తిరిగి ఊళ్లకు వెళ్తుండగా ఈ ప్రమాదం సంభవించింది. ప్రమాదం జరిగిన ప్రాంతం రెండు కొండల మధ్య ఉంది. దాదాపు రెండు తాడి చెట్ల లోతులో (60 అడుగులు) నీరుంది. ఆ సమయంలో ఈదురుగాలులతో పాటు భారీ వర్షం కూడా మొదలవ్వడంతో లాంచీ ఆపేసి లంగరు వేయాల్సిందిగా ప్రయాణికులు గగ్గోలు పెట్టారు. కానీ, వారి మాటలు పట్టించుకోని సరంగి (డ్రైవర్) మొండిగా ముందుకు పోనివ్వడంతో ప్రమాదం జరిగి పేదల ఇళ్లలో తీరని వేదన మిగిల్చింది. ఘటన తర్వాత ఈదుకుంటూ ఒడ్డుకు చేరుకున్న డ్రైవర్ నేరుగా పోలీసుల వద్దకు వెళ్లి లొంగిపోయాడు.
Tags:The shots in Godavari …

Leave a Reply

Your email address will not be published. Required fields are marked *