హాట్ బ్యూటీ రాయ్ లక్ష్మీ ‘వేర్ ఈజ్ ది వెంకటలక్ష్మి’

Hot Beauty Roy Lakshmi 'Where Is the Venkatlakshmi'
 Date:15/03/2019
హైద్రాబాద్ ముచ్చట్లు:
ఖైదీ నెం.150 చిత్రంలో రత్తాలు.. రత్తాలు ఐటమ్ సాంగ్తో కుర్రకారు బొత్తాలు విప్పించిన సీనియర్ హాట్ బ్యూటీ రాయ్ లక్ష్మీ ‘వేర్ ఈజ్ ది వెంకటలక్ష్మి’ అంటూ శుక్రవారం నాడు ప్రేక్షకుల ముందుకు వచ్చింది. కావాల్సినంత గ్లామర్.. అంతకు మించి అనుభవం అన్నీ ఉన్నా రాయ్ లక్ష్మీకి ఇప్పటి వరకూ సరైన హిట్ పడలేదు. హీరోయిన్గా ఐటమ్ గర్ల్ గా పలు చిత్రాల్లో మెరిసినా.. అదృష్టం మాత్రం కలసిరాలేదు. దీంతో తొలిసారి కథానాయిక ప్రాధాన్యం ఉన్న చిత్రంలో నటించింది. రాయ్ లక్ష్మి ప్రధాన పాత్రలో నటించిన హారర్ బేస్డ్ రొమాంటిక్ చిత్రంలో పూజిత పొన్నాడ, కార్తీక్, ప్రవీణ్, మధునందన్, బ్రహ్మాజీ, జబర్దస్త్ మహేష్ ముఖ్య పాత్రలు పోషించారు. కిషోర్ (లడ్డా) దర్శకత్వం వహించగా.. ఏబీటీ క్రియేషన్స్ బ్యానర్పై ఎం.శ్రీధర్ రెడ్డి, హెచ్.ఆనంద్ రెడ్డి, ఆర్కే రెడ్డి సంయుక్తంగా ఈ చిత్రాన్ని నిర్మించారు. హరి గౌర సంగీతం సమకూర్చారు. టీజర్, ట్రైలర్, సాంగ్స్తో ఆడియన్స్ నుండి మంచి రెస్పాన్స్ రాబట్టిన ‘వెంకటలక్ష్మి’ థియేటర్స్లో ప్రేక్షకుల్ని ఏ మేరకు మెప్పించిందో సమీక్ష ద్వారా తెలుసుకుందాం. తూర్పుగోదావరి జిల్లా బెల్లంపల్లి అనే గ్రామంలో జరిగే కథ ఇది. అనాధలైన చంటి (ప్రవీణ్), పండు (మధునందన్)లు అల్లర చిల్లరగా తిరుగుతూ బాధ్యత లేకుండా ఊరి జనాన్ని ఇబ్బందులు పెడుతుంటారు. వీరిని అన్నపూర్ణ పెంచి పెద్ద చేస్తుంది. చంటి, పండులకు ఆ ఊరి ప్రెసిడెంట్ కొడుకు శేఖర్ (రామ్ కార్తీక్) మంచి స్నేహితుడు. శేఖర్ తొలిచూపులోనే పక్క ఊరికి చెందిన గౌరీ (పూజితా పొన్నాడ) ప్రేమలో పడతాడు. గౌర అన్నయ్య వీరారెడ్డి నరరూప రాక్షసుడు కావడంతో శేఖర్ని దూరం పెడుతుంది గౌరి. స్నేహితుడు ప్రేమకు సాయం చేయాలనుకున్న చంటి, పండులు గౌరిని కిడ్నాప్ చేసి శేఖర్ వద్దకు తీసుకువస్తారు. అయితే మధ్య కమిట్మెంట్ జరిగితే పెళ్లికి ఇబ్బంది ఉండదని శేఖర్, గౌరీలకు మత్తుమందు కలిపిన బొండాలను ఇస్తారు. ఆ మత్తులో శారీరకంగా ఒకటౌతారు శేఖర్-గౌరీలు. ఇదంతా శేఖర్ తన స్నేహితులతో కలసి కావాలనే చేశాడని అతన్ని అసహ్యించుకుని దూరం అవుతుంది. ఇంతలో బెల్లంపల్లి ఊరికి టీచర్గా వెంకటలక్ష్మి (రాయ్ లక్ష్మీ) వస్తుంది. ఆమె అందాన్ని చూసి అట్రాక్ట్ అయిన పండు, చంటిలు వెంకటలక్ష్మికి వసతి కల్పిస్తారు. ఆమెను పెళ్లి చేసుకోవాలని ప్రయత్నిస్తున్న చంటి, పండులకు వెంకటలక్ష్మి మనిషి కాదని దెయ్యం అని తెలుస్తుంది. ఎవరికీ కనిపించని వెంకటలక్ష్మి పండు చంటిలకు మాత్రమే కనిపించి.. తనకు గౌరీ అన్నయ్య వీరారెడ్డి దగ్గర ఉన్న పెట్టెని తెచ్చి ఇవ్వాలని అప్పటి వరకూ మిమ్మల్ని వదిలే ప్రసక్తే లేదని వెంకటలక్ష్మి భయపెడుతుంది. సినిమా ప్రారంభంలో బ్రహ్మాజీ ఇదే పెట్టెని తీసుకుని కారులో పారిపోతూ.. వీరారెడ్డి చేతిలో తన భార్యతో సహా హత్య చేయబడతాడు. ఈ పెట్టెకి బెల్లంపల్లి ఊరికి ఉన్న సంబంధం ఏంటి? లక్ష్మీరాయి ఆ పెట్టెకోసం ఎందుకు దెయ్యంగా మారింది? లక్ష్మీరాయి నిజంగానే చనిపోయిందా? బ్రహ్మాజీ – లక్ష్మీరాయికి ఉన్న రిలేషన్ ఏంటి అన్నది తెరపై చూడాలి. బ్రహ్మాజీని వీరారెడ్డి యాక్సిడెంట్ చేసి సజీవ దహనం చేసే ఇంట్రస్టింగ్ పాయింట్తో కథను ప్రారంభించిన దర్శకుడు ఆ టెంపోని ఇంటర్వెల్ బ్యాంగ్ వరకూ సాఫీగానే తీసుకువెళ్లాడు. ప్రవీణ్, మధు నందన్లతో కామెడీ పండిస్తూ.. ఫస్టాఫ్ అంతా అడల్ట్ కామెడీతో నడిపించాడు. వెంటలక్ష్మి ఎంట్రీ ఇచ్చాక కథ మరింత ఊపందుకుంటుందని భావించిన ప్రేక్షకులకు లేనిపోని ట్విస్ట్లతో కథను కిచిడీ చేశాడు. లాజిక్ లేని సీన్లతో ప్రేక్షకుల సహనానికి పరీక్ష పెట్టాడు. ముఖ్యంగా క్లైమాక్స్ సన్నివేశం దర్శకుడి పసలేని పనితనాన్ని బయటపెట్టింది. అప్పటి వరకూ కథను ఒక ట్రాక్లో నడిపించిన దర్శకుడు చివర్లో నాటకీయంగా మార్చేశారు. చివర్లో వచ్చే సన్నివేశాలు డైలాగ్లు కథపై సీరియస్నెస్ని దూరం చేసింది. డబుల్ మీనింగ్ డైలాగ్లు ద్వందార్ధాలతో కథకు మసాలా దట్టించే ప్రయత్నంలో అసలు కథ ట్రాక్ తప్పింది. పాత్రల పరంగా లీడ్ రోల్లో నటించిన రాయ్ లక్ష్మీ గ్లామర్తో ఆకట్టుకునే ప్రయత్నం చేసింది. అత్తిలి పాప ఐటమ్ సాంగ్తో పాటు చీర అందాలతో కనువిందు చేసింది. అయితే గతంతో పోల్చుకుంటే ఆమెలోని గ్లామర్ సొగసులు తగ్గినట్టే అనిపిస్తుంది. వయసు మీద పడిన ముదురు సుందరిగా అక్కడక్కడా తేలిపోయింది. మరోవైపు సెకండ్ హీరోయిన్ పూజితా పొన్నాడ రాయ్ లక్ష్మీని డామినేట్ చేసింది. గాఢమైన రొమాంటిక్ సన్నివేశాలు, లిప్లాక్లతో రెచ్చిపోయింది. మాస్ ఆడియన్స్ కోరుకునే మంచి మసాలా అందించింది. రామ్ కార్తీక్- పూజితల మధ్య కెమిస్ట్రీ వర్కౌట్ అయ్యింది. ఇక ఈ చిత్రంలో ప్రవీణ్, మధు నందన్లకు పూర్తి ప్రాధాన్యత ఉన్న పాత్రలు దక్కాయి. సినిమా కథ మొత్తం వీరి చుట్టూనే అల్లారు. పండు, చంటి పాత్రలను న్యాయం చేశారు. దెయ్యం చేతిలో తన్నులు తినే సన్నివేశాల్ని రక్తికట్టించారు. పూజితా పొన్నాడతో జోడీకట్టిన రామ్ కార్తీక్ పరిధిమేర బాగానే నటించారు. బ్రహ్మాజీ, అన్నపూర్ణలు ప్రాధాన్యత ఉన్న పాత్రల్లో నటించి మెప్పించారు. హరి గౌర అందించిన మ్యూజిక్ బాగానే ఉంది. అత్తిలి పాప సాంగ్తో పాటు రొమాంటిక్ సాంగ్లకు మంచి బీట్ ఇచ్చారు. నేపథ్య సంగీతం పర్వాలేదు. నిర్మాణ విలువలు సినిమా స్థాయికి తగ్గట్టు ఉన్నాయి. ఈ సినిమా నిడివి కూడా ప్రేక్షకులకు భారం అయ్యింది. ఎడిటర్ అక్కర్లేని సీన్లకు కత్తెర వేయలేదు.
Tags:Hot Beauty Roy Lakshmi ‘Where Is the Venkatlakshmi’

Leave a Reply

Your email address will not be published. Required fields are marked *