262 ప్రమాదాలు…,62 మరణాలు

-ఈ రోడ్డు..మహా డేంజర్

ముంబై  ముచ్చట్లు:


సైరస్ మిస్త్రీ కారు ప్రమాదం దేశాన్ని ఉలిక్కి పడేలా చేసింది.. 100 కి.మీల ముంబై-అహ్మదాబాద్ జాతీయ రహదారిపై ఈనెల 4వ తేదీన పాల్ఘర్‌కి సమీపంలో సూర్యా నది వంతెనపై జరిగిన ప్రమాదంలో సైరస్ మిస్త్రీ కన్నుమూశారు. అయితే థానేలోని ఘోడ్‌బందర్ నుంచి పాల్ఘర్ జిల్లాలోని దప్చరి వరకున్న ఈ జాతీయ రహదారి ఇప్పటి వరకు ఎంతో మంది ప్రాణాలను బలిగొన్నట్టు పోలీసు అధికారుల సమాచారంలో వెలుగులోకి వచ్చింది. ఈ ఏడాది ఇదే రహదారిపై 262 ప్రమాదాలు జరిగాయని, ఆ ప్రమాదాల్లో 62 మంది ప్రజలు తమ ప్రాణాలను కోల్పోయారని పోలీసు అధికారులు తెలిపారు. 192 మంది ప్రజలు తీవ్రంగా గాయపడినట్టు పేర్కొన్నారు.పాల్ఘర్ జిల్లాలో సైరస్ మిస్త్రీ కారు ప్రమాదం జరిగిన తర్వాత.. ఈ జాతీయ రహదారి ప్రధానాంశంగా నిలిచింది. రోడ్ల అధ్వాన పరిస్థితులు, సరియైన సిగ్నలింగ్ సిస్టమ్ లోపించడం, కారు సేఫ్టీ వంటి ఎన్నో విషయాలు ప్రస్తుతం చర్చనీయాంశంగా మారాయి. ఇదే రహదారిపై ఇంత మంది ప్రాణాలు కోల్పోవడం కూడా ప్రజల్లో భయాందోళనను రేకెత్తిస్తోంది.మిస్త్రీ కారు ప్రమాదం ఓవర్‌స్పీడ్, డ్రైవర్ ఎర్రర్ జడ్జిమెంట్ సరిగ్గా చేయలేకపోవడం వంటి కారణాల చేత జరిగినా కూడా.. రోడ్డు నిర్వహణ లోపాలు, సరియైన సిగ్నల్ సిస్టమ్ లేకపోవడం, స్పీడ్‌ను నియంత్రించే చర్యలు లోపించడం వంటివి కూడా ఈ ప్రమాదాలకు కారణమవుతున్నాయని అధికారులు చెబుతున్నారు.సైరస్ మిస్త్రీ ప్రమాదానికి గురయైన స్థలం చరోటికి దగ్గర్లో ఉంది. ఇదే ప్రాంతంలో ఈ ఏడాది ప్రారంభం నుంచి 34 సీరియస్ యాక్సిడెంట్లు జరిగాయని మహారాష్ట్ర జాతీయ రహదారులు అధికారులు తెలిపారు. ఈ యాక్సిడెంట్లలో 25 మంది చనిపోయినట్టు వెల్లడించారు.

 

 

 

ఈ మరణించిన వారిలో మిస్త్రీ కూడా ఉన్నారు. మిస్త్రీ మెర్సిడెస్ బెంజ్ కారులో ప్రయాణిస్తూ కూడా ప్రమాదానికి గురికావడం, అక్కడికక్కడే ప్రాణాలు కోల్పోవడం తీవ్ర విచారకరంగా మారింది.మిస్త్రీ మరణించిన చరోటి ప్రాంతం ప్రమాదాలకు బ్లాక్ స్పాట్‌గా నిలుస్తోంది. ముంబైకి వెళ్లే మార్గంలో ఇది దాదాపు 500 మీటర్లలో ఉంటుందని మహారాష్ట్ర జాతీయ రహదారి పోలీసు అధికారులు తెలిపారు. ముంబై వైపుకి ప్రయాణించే ఆ రోడ్డులో సూర్య నదికి ముందు మలుపులు, ఇరుకైనదిగా ఉంటుందని అన్నారు.మరోవైపు జాతీయ రహదారులపై భద్రతా ప్రమాణాలకు సంబంధించిన విషయాలను చూసుకునే వారి నిర్లక్ష్యం వల్లే ఈ ప్రమాదాలు జరుగుతున్నాయని మరో అధికారి చెప్పారు. నేషనల్ హైవే అథారిటీ ఆఫ్ ఇండియా, ప్రైవేట్ ఏజెన్సీలు కలిసి ఈ రహదారులను నిర్వహించేందుకు టోల్‌ను కలెక్ట్ చేస్తూ ఉంటాయని పేర్కొన్నారు. మార్గదర్శకాల ప్రకారం.. ప్రతి 30 కి.మీలకు ఒక అంబులెన్స్, ఒక క్రేన్, పెట్రోలింగ్ వెహికిల్స్ ఉండాలన్నారు. సెప్టెంబర్ 4న జరిగిన మిస్త్రీ కారు ప్రమాదం తర్వాత.. మహారాష్ట్ర పోలీసులు రహదారులపై చేపట్టే సేఫ్టీ చర్యలపై నిపుణుల సలహా కోరుతూ సెంట్రల్ బోర్డు రీసెర్చ్ ఇన్‌స్టిట్యూట్‌కి లేఖ రాశారు. వీరి సలహాలపై సేఫ్టీ చర్యలను అమల్లోకి తీసుకురావాలని చూస్తున్నారు. అలాగే జాతీయ రహదారిపై రోడ్డు సేఫ్టీ ఆడిట్ చేపట్టాలని కూడా సెంట్రల్ ఇన్‌స్టిట్యూట్ ఆఫ్ రోడ్డు ట్రాన్స్‌పోర్టు‌ను కోరారు.

 

Tags: 262 accidents…,62 deaths

Leave A Reply

Your email address will not be published.