Crude oil at the bottom of 60 dollars

60 డాలర్ల దిగువన  క్రూడ్ ఆయిల్ 

Date:14/01/2019
ముంబై ముచ్చట్లు:
ముడి చమురు ధరలు తగ్గాయి. బ్రెంట్ క్రూడ్ ధర సోమవారం బ్యారెల్‌కు 60 డాలర్ల దిగువకు పడిపోయింది. చైనా వాణిజ్య గణాంకాలు బలహీనంగా నమోదు కావడం ప్రతికూల ప్రభావం చూపింది. ప్రపంచంలోనే అతిపెద్ద వర్తక దేశమైన చైనాలో ఎగమతులు, దిగుమతులు తగ్గాయి. అంతర్జాతీయ మార్కెట్‌లో బ్రంట్ క్రూడ్ ఆయిల్ ఫ్యూచర్స్ ధర బ్యారెల్‌కు 59.78 వద్ద ట్రేడవుతోంది. మునపటి ట్రేడింగ్ సెషన్‌తో పోలిస్తే బ్రెంట్ ధర ఏకంగా 1.2 శాతం మేర క్షీణించింది. అమెరికా వెస్ట్ టెక్సాస్ ఇంటర్మీడియట్ (డబ్ల్యూటీఐ) క్రూడ్ ఫ్యూచర్స్ ధర బ్యారెల్‌కు రూ.50.96 వద్ద కదలాడుతోంది. మునపటి ట్రేడింగ్ సెషన్‌తో పోలిస్తే డబ్ల్యూటీఐ ధర కూడా 1.2 శాతం మేర తగ్గింది. చైనా ఎగుమతులు వార్షిక ప్రతిపదికన చూస్తే డిసెంబర్ నెలలో 4.4 శాతం క్షీణించాయి. గత రెండేళ్లలో చూస్తే ఒక నెలలో ఈ మేర ఎగుమతులు పడిపోవడం ఇదే తొలిసారి. చైనా ఆర్థిక వ్యవస్థ మరింత నెమ్మదించొచ్చనే అందోళనలు మొదలయ్యాయి. అదే సమయంలో దిగుమతులు కూడా 7.6 శాతం తగ్గాయి. 2016 జూలై నుంచి చూస్తే దిగుమతులు ఈ స్థాయిలో పడిపోవడం ఇదే తొలిసారి. చైనా వాణిజ్య గణాంకాల వల్ల క్రూడ్ ఫ్యూచర్స్ ధర తగ్గిందని ట్రేడర్లు పేర్కొన్నారు. అలాగే ఆసియా స్టాక్ మార్కెట్‌లపై ప్రతికూల ప్రభావం పడిందని తెలిపారు. ప్రపంచ ఆర్థిక వ్యవస్థ నెమ్మదిస్తోందని ఎకనమిక్ రీసెర్చ్ సంస్థ టీఎస్ లంబార్డ్ తెలిపింది. ఆయిల్ ధరల్లో పాజిటివ్ ట్రెండ్ ఉండకపోవచ్చని అంచనా వేసింది. అమెరికా, యూరప్, చైనా భవిష్యత్ ఆర్థిక గణాంకాలు బలహీనంగా ఉన్నాయని, ఇలాంటి నేపథ్యంలో క్రూడ్ ధరల్లో పెరుగుదల ఉండకపోవచ్చని డెన్మార్క్‌లోని సాక్సో బ్యాంక్ కమోడిటీ స్ట్రాటజీ హెడ్ ఓలే హన్సెన్ తెలిపారు. బ్రెంట్ ధర 64 డాలర్లకు, డబ్ల్యూటీఐ ధర 55 డాలర్లకు మించి పెరగకపోవచ్చని పేర్కొన్నారు.
Tags:Crude oil at the bottom of 60 dollars

Leave a Reply

Your email address will not be published. Required fields are marked *