2014లో 7వేల 778 మెగావాట్లు

– 2022లో 17వేల 228 మెగావాట్ల

హైదరాబాద్ ముచ్చట్లు:


బహిరంగ విపణిలో తెలంగాణా ప్రభుత్వం చేస్తున్న విద్యుత్ కొనుగోళ్లు, అమ్మకాలపై కేంద్ర ప్రభుత్వం నిషేధం విధించడం ప్రస్తుతం చర్చనీయాంశమైంది. కేంద్రం తీసుకున్న తాజా నిర్ణయంతో.. తెలంగాణలో విద్యుత్తు కోతలు విధించే పరిస్థితి తలెత్తవచ్చని నిపుణులు చెబుతున్నారు. విద్యుత్తు కొనుగోలు, అమ్మకాలపై ఇప్పటికే రాష్ట్ర ప్రభుత్వం కోర్టు నుంచి స్పష్టమైన ఆదేశాలు పొందిందని.. కోర్టు తీర్పును ఉల్లంఘించి కేంద్రం ఈ నిర్ణయం తీసుకుందని టీఆర్ఎస్  నేతలు చెబుతున్నారు. రాష్ట్రాన్ని చీకట్లోకి నెట్టేందుకు కేంద్ర ప్రభుత్వం కుట్ర చేస్తోందని ఆరోపిస్తున్నారు. వాస్తవాలను కప్పిపుచ్చి బకాయిల పేరుతో బద్నాం చేస్తున్నారని ఫైర్ అవుతున్నారు. దాదాపు ఏడేళ్లుగా తెలంగాణలో ఎప్పుడూ లేని అనుమానాలు వ్యక్తమవుతున్నాయి. ఎక్కడ చూసినా.. విద్యుత్తు సరఫరాపైనే చర్చ జరుగుతోంది. ఈ సమయంలో.. అసలు తెలంగాణలో కరెంటు ఉంటుందా అనే ప్రశ్నల నుంచి.. అసలు కరెంటు పోతుందా అనే స్థాయి వరకు ఎలా ఎదిగింది అనేది ఇప్పుడు హాట్ టాపిక్ గా మారింది. తెలంగాణ  ప్రత్యేక రాష్ట్రంగా ఏర్పడిన తర్వాత విద్యుత్తు విషయంలో జరిగిన అభివృద్ధిపై ఆరా తీస్తున్నారు. కేంద్రం చెప్పింది నిజమే అయితే.. వ్యవసాయానికి, పరిశ్రమలకు ఇలా కరెంటు ఎలా సరఫరా చేయగలుగుతున్నారని ప్రజలు చర్చించుకుంటున్నారు.ఇటీవల మన దేశంలోని మెజారిటీ రాష్ట్రాలు విద్యుత్తు రంగంలో తీవ్ర సంక్షోభాన్ని ఎదుర్కొన్నాయి. కానీ కొత్తగా ఏర్పడ్డ తెలంగాణ మాత్రం విద్యుత్తు కాంతుల్లోనే వెలిగిపోయింది. దీని గురించి టీఆర్ఎస్ నేతలు గర్వంగా చెబుతారు. ఆ మధ్య జరిగిన టీఆర్ఎస్ ప్లినరీలోనూ సీఎం కేసీఆర్ కీలక వ్యాఖ్య చేశారు. దేశంలో కరెంట్ ఉంటే వార్త.. తెలంగాణలో కరెంట్ పోతే వార్త అని వివరించారు.

 

 

 

నిజానికి అప్పుడు పరిస్థితి కూడా అలాగే ఉంది. ఆఖరికి దేశ రాజధాని ఢిల్లీలోనూ కరెంటు కోతలు ఎదుర్కొన్నారు. కానీ.. తెలంగాణలో మాత్రం.. వ్యవసాయం, పరిశ్రమలు, గృహా అవసరాలు సహా అన్ని రంగాలకు నిరంతరాయంగా విద్యుత్ సరఫరా అయ్యింది.తెలంగాణ ప్రత్యేక రాష్ట్రంగా ఎర్పడక ముందు.. విద్యుత్తు రంగంలో పెద్ద దెబ్బ తగులుతుందని అంచనా వేశారు. కానీ.. తెలంగాణలో కరెంటు సరఫరా చేసిన విధానాన్ని చూసి.. అలా అన్నవారే మెచ్చుకున్నారు. కరెంట్ కోతలు లేని తెలంగాణను చూసి ఆశ్చర్యపోతున్నారు. ఈ విషయంలో ఎవరు అవునన్నా.. ఎవరు కాదన్నా.. ముఖ్యమంత్రి కేసీఆర్ దార్శనికతను తీసిపారేయలేం. ఇంధన రంగం ప్రాముఖ్యతను గ్రహించిన కేసీఆర్.. పవర్ పొజిషన్‌ను మెరుగుపరచుకోవడంపై ఫోకస్ పెట్టారు. దాని ఫలితాలను తెలంగాణ ప్రజలకు అందించారు. అప్పుడప్పుడు ట్రిప్పింగ్, ట్రాన్స్‌మిషన్ వల్ల ఏర్పడ్డ అంతరాయాలు మినహా.. పెద్దగా కరెంట్ సమస్య రాలేదు. సరైన ప్రణాళిక, బొగ్గు వనరుల సమర్థవంతమైన నిర్వహణ కారణంగా మాత్రమే తెలంగాణ తన గరిష్ట డిమాండ్‌ను ఎలాంటి ఇబ్బంది లేకుండా చేరుకుంది.తెలంగాణలో విద్యుత్తు ఉత్పత్తి 2014లో 7వేల 778 మెగావాట్లు ఉండేది. అది 2022లో 17వేల 228 మెగావాట్లకు పెరిగింది. సోలార్ పవర్‌ను 74 మెగావాట్ల నుంచి 4వేల 512 మెగావాట్లకు పెంచారు. ఈ నేపథ్యంలో ఈ ఏడాది ఎండాకాలంలో కొన్ని రోజులుగా రాష్ట్రంలో విద్యుత్ వినియోగం విపరీతంగా పెరిగింది. అయినా ఎటువంటి లోటు లేకుండా 204.566 మిలియన్ యూనిట్ల గరిష్ట డిమాండ్‌ను తెలంగాణ తీర్చింది. అన్ని థర్మల్ పవర్ ప్లాంట్‌లలో తగినన్ని బొగ్గు నిల్వలను ఉంచుకోవడం ద్వారా.. బొగ్గు కొరతను అధిగమించింది.దేశం మొత్తం బొగ్గు కోసం కేంద్రాన్ని అభ్యర్థించిన రోజుల్లోనే..

 

 

తెలంగాణలో అన్ని థర్మల్ విద్యుత్తు ఉత్పత్తి కేంద్రాల్లో కనీసం రెండు వారాల పాటు బఫర్ స్టాక్ నిల్వ ఉంది. అంటే.. కరెంటు విషయంలో తెలంగాణ అధికారులు ఎంత ముందు చూపుతో ఉన్నారో అర్థం చేసుకోవచ్చు. అంతే కాకుండా..థర్మల్ పవర్ ప్లాంట్ల ద్వారా తగినంత విద్యుత్తు ఉత్పత్తిని నిర్ధారించడం.. వివిధ పవర్ ప్లాంట్ల నుండి విద్యుత్తు కొనుగోలు కోసం ముందస్తు ఒప్పందాలు చేసుకుని తెలంగాణ ముందు చూపుతో వ్యవహరించింది. విద్యుత్ కొరతను అడ్డుకోవడానికి బహిరంగ మార్కెట్‌లో దాదాపు 45-55 మిలియన్ యూనిట్లను కొనుగోలు చేస్తోంది. ఫలితంగానే.. కరెంటు కోతలు లేని తెలంగాణ సాధ్యమైంది.తెలంగాణలో ట్రాన్స్‌మిషన్, డిస్ట్రిబ్యూషన్ నష్టాలను 2014లో 16.08 శాతం నుంచి 2020-21లో 11.46 శాతానికి తగ్గించారు. 2020-21లో రాష్ట్ర తలసరి విద్యుత్ వినియోగం 2వేల 12 యూనిట్లు కాగా.. జాతీయ తలసరి వినియోగం 1161 యూనిట్లుగా నమోదైంది. అంటే.. దాదాపు డబుల్. వినియోగం అలా ఉంది కాబట్టే.. వ్యవసాయం సహా.. ఇతర రంగాల్లోనూ తెలంగాణ ఎక్కడా తగ్గలేదు. కరోనా కుదుపు, రష్యా-ఉక్రెయిన్ యుద్ధంతో ప్రపంచం అంతా సంక్షోభం లోకి వెళ్లినా.. తెలంగాణ మాత్రం విద్యుత్తు విషయంలో తొణకలేదు.. బెణకలేదు.ఈ పరిస్థితుల్లో కేంద్రం కీలక నిర్ణయం తీసుకుంది. ఇంధన ఎక్స్ఛేంజీల నుంచి జరిపే రోజువారీ కరెంటు కొనుగోళ్లపై నిషేధం విధించింది. విద్యుదుత్పత్తి సంస్థల నుంచి కొన్న కరెంటుకు నిర్దేశిత వ్యవధిలో బిల్లులు చెల్లించలేదన్న కారణంతో.. ఈ చర్యలు తీసుకుంది. తెలంగాణ సుమారు 1600 కోట్ల రూపాయలు బకాయి పడిందని కేంద్ర ఇంధన శాఖ వెల్లడించింది. కానీ.. తెలంగాణ సాధించిన విద్యుత్తు ఘనతతో పోలిస్తే.. ఇది చాలా తక్కువ. ఒక రాష్ట్ర ప్రభుత్వానికి 16 వందల కోట్లు పెద్ద విషయం కూడా కాదు. అందుకే.. తెలంగాణపై బీజేపీ కక్ష కట్టిందని టీఆర్ఎస్ నేతలు ఆరోపిస్తున్నారు.

 

Tags: 7778 MW in 2014

Leave A Reply

Your email address will not be published.