ఆజాంఖాన్ వ్యాఖ్యల కాంట్రావర్శీ

Date:15/04/2019
 లక్నో ముచ్చట్లు :
రాంపూర్ నుంచి బీజేపీ తరఫున పోటీచేస్తోన్న నటి, మాజీ ఎంపీ జయప్రదపై సమాజ్‌వాదీ పార్టీ నేత ఆజంఖాన్‌ దిగజారుడు వ్యాఖ్యలు చేసిన విషయం తెలిసిందే. అజంఖాన్ వ్యాఖ్యలపై తీవ్ర దుమారం రేగుతోంది. ఆయనపై బీజేపీ నేతలు పోలీసులకు ఫిర్యాదు చేయడంతో కేసు నమోదు చేశారు. అజంఖాన్‌పై ఐపీసీ సెక్షన్ 509 కింద కేసు నమోదుచేసినట్టు పోలీసులు తెలిపారు. అటు జాతీయ మహిళా కమిషన్‌ కూడా తీవ్ర ఆగ్రహం వ్యక్తం చేస్తూ ఆయనకు నోటీసులు జారీ చేసింది. దీనిపై నటి జయప్రద మాట్లాడుతూ.. అజంను ఎన్నికల్లో పోటీకి అనర్హుడిగా ప్రకటించండి.. ఎందుకంటే ఇలాంటి వారు ఎన్నికైతే ప్రజాస్వామ్యం ఏమవుతుంది.. సమాజంలో మహిళలకు చోటే ఉండదని అన్నారు. ఇలాంటి వారు ఉంటే మహిళలకు రక్షణ ఎక్కడుంటుంది, చావే శరణ్యమని, అప్పుడు మీకు సంతృప్తికరంగా ఉంటుందా? భయపెడితే రాంపూర్ వదిలి వెళ్లిపోతానని అనుకుంటున్నారా? కానీ, తాను వెళ్లే ప్రసక్తేలేదని ఉద్ఘాటించారు. ఇది తనకు కొత్తేం కాదని, 2009 ఎన్నికల్లో ఎస్పీ నుంచి పోటీచేసినప్పుడు కూడా ఇలాంటి పరిస్థితే ఎదురయ్యిందని జయప్రద గుర్తుచేసుకున్నారు. అప్పుడు కూడా అజంఖాన్ తనపై అనుచిత వ్యాఖ్యలు చేసినా ఎవరూ మద్దతు ఇవ్వలేదని అన్నారు. రాంపూర్‌లో జయప్రద ప్రత్యర్థిగా పోటీచేస్తోన్న ఎస్పీ నేత ఆజంఖాన్‌ ఆ నియోజకవర్గంలో ఆదివారం నిర్వహించిన ఎన్నికల ప్రచార సభలో ఆమెపై అనుచిత వ్యాఖ్యలు చేశారు.
గతంలో జయప్రదను తానే రామ్‌పూర్ తీసుకొచ్చానని, ఆమెను ఎవరూ తాకకుండా జాగ్రత్తలు తీసుకున్నానని వ్యాఖ్యానించారు. అంతేకాదు ఆమె తానెలా కాపాడానో ప్రజలకు తెలుసునని జయప్రదను ఉద్దేశించి వ్యాఖ్యలు చేశారు. ఆమె నిజస్వరూపం తెలుసుకునేందుకు 17 ఏళ్లు పట్టిందని, కానీ జయప్రద ఖాకీ అండర్‌వేర్ వేసుకుందనే విషయాన్ని 17 రోజుల కిందట గ్రహించానని అవమానకరంగా మాట్లాడారు. అంతేకాదు, ‘ఢిల్లీలోని ఓ దేవాలయానికి వెళ్లిన బీజేపీ అభ్యర్థి, అక్కడ దైవదర్శనం అనంతరం మీడియాతో మాట్లాడుతూ.. అక్కడున్న ఓ దానవుడిని అంతచేయడానికి రామ్‌పూర్ వెళ్తున్నానని వ్యాఖ్యానించారు.. దానవుడు అంటే తనకు అర్థం తెలిక మా హిందూ స్నేహితులను అడిగితే రాక్షసుడని వారు చెప్పారు.. నేను రాక్షసుడ్నే కాబట్టి చంపేయండి.. నా గుండెలకు 150 బుల్లెట్లను గురిపెట్టండి.. బయటవారిని పంపడం కాదు దుమ్ముంటే తనను చంపడానికి ఆమెకే అవకాశం ఇస్తున్నాను’అని సవాల్ విసిరారు. ఈ వేదికపై ఎస్పీ చీఫ్ అఖిలేశ్ యాదవ్‌తోపాటు పలువురు సీనియర్ నేతలు కూడా ఉండటం గమనార్హం. ఆజంఖాన్‌ వ్యాఖ్యలపై పెను దుమారం రేగింది. మహిళలను కించపరుస్తూ మాట్లాడిన ఆయనపై చర్యలు తీసుకోవాలని పలువురు డిమాండ్‌ చేస్తున్నారు.
అటు జాతీయ మహిళా కమిషన్‌ కూడా దీనిపై ఆగ్రహం వ్యక్తం చేస్తూ ఆజంఖాన్‌కు నోటీసులు పంపింది. ఆయనపై కఠిన చర్యలు తీసుకోవాలంటూ ఈసీకి మహిళా కమిషన్ లేఖ రాసింది. అయితే, తాను అలాంటి వ్యాఖ్యలు చేయలేదని అజంఖాన్ సమర్ధించుకున్నారు. తాను తప్పుగా మాట్లాడలేదని తొమ్మిదిసార్లు ఎమ్మెల్యేగా పనిచేశాను.. ఏం మాట్లాడాలో నాకు తెలుసని అన్నారు. ఏ వ్యక్తిని ఉద్దేశించి, కించపరచడానికి తాను ఈ వ్యాఖ్యలు చేయలేదని, తప్పు చేశానని నిరూపిస్తే ఎన్నికల్లో పోటీ చేయబోనని ఆజం స్పష్టం చేశారు. నాలుగు రోజుల కిందట ఐఏఎస్ అధికారులను కూడా ఎగతాళి చేస్తూ అజంఖాన్ వివాదాస్పద వ్యాఖ్యలు చేశారు. ఐఏఎస్ అధికారులు భయపడవద్దు.. మాయావతి చెప్పులు శుభ్రంచేసుకోవచ్చు అంటూ అభ్యంతరకర వ్యాఖ్యలు చేయడంపై అధికారులు తీవ్రంగా మండిపడ్డారు.
Tags:Controversy of Azam Khan’s comments

Leave a Reply

Your email address will not be published. Required fields are marked *