ఓటింగ్ పెరగాలంటే…. కఠిన చట్టాలే అవసరమా

-ఓటింగ్ పెరగాలంటే…. కఠిన చట్టాలే అవసరమా

Date:02/12/2020

హైదరాబాద్ ముచ్చట్లు:

జీహెచ్‌ఎంసీలో ఓటర్లు బద్దకాన్ని ప్రదర్శించారు. హైదరాబాద్ ఎన్నికల్లో పోలింగ్ 50 శాతానికి తక్కువగానే నమోదైంది. ఓటింగ్ తగ్గడానికి ప్రధాన కారణాలు..ఎన్నికలు 15 రోజులుగా రాష్ట్రంలో సందడి రేపాయి. టీఆర్‌ఎస్, బీజేపీ, ఎంఐఎం, కాంగ్రెస్ పార్టీల మాటలయుద్ధంతో ప్రచారం హోరెత్తింది. తీవ్రమైన పోటీ నేపథ్యంలో ఓటింగ్ బాగా పెరుగుతుందని ఆశించారు. దీనికి తోడు రాష్ట్ర ప్రభుత్వం, జీహెచ్‌ఎంసీ ప్రచారం విస్తృతంగా ప్రచారం నిర్వహించాయి. ఓటు వేయాలంటూ పలువురు సెలబ్రిటీలు కూడా పిలుపునిచ్చారు. స్వచ్ఛంద సంస్థలు అవగాహన కల్పించాయి. కానీ, ఎప్పటిలాగే హైదరాబాద్ వాసులు ఊసూరుమనిపించారు. ఊహించిన స్థాయిలో పోలింగ్ జరగలేదు.ఈసారి పోలింగ్ 50 శాతం దాటుతుందని భావించారు. హెచ్‌ఎండీఏ జీహెచ్‌ఎంసీ గా ఆవిర్భవించిన తర్వాత తొలిసారిగా 2009లో జరిగిన ఎన్నికల్లో 42.04% పోలింగ్ నమోదైంది. ఆ తర్వాత 2016లో జరిగిన ఎన్నికల్లో 45.29% పోలింగ్ నమోదైంది. ఈసారి హోరాహోరీ పోరు నేపథ్యంలో పోలింగ్ 50 శాతానికి పైగా ఉంటుందని అంచనా వేశారు. అయితే.. ఈసారి ఎన్నికల్లో 45.71 శాతం పోలింగ్ నమోదైంది. కిందటిసారి కంటే ఇది చాలా స్వల్పంగా పెరిగింది.అంతగా అవగాహన కల్పించినా.. ఓటర్లు బద్దకం వీడకపోవడానికి కారణమేంటి? పోలింగ్ మందకొడిగా నమోదు కావడానికి ఏయే అంశాలు ప్రభావం చూపాయి. ఈ అంశం ఇప్పుడు హాట్ టాపిక్‌గా మారింది. హైదరాబాద్‌లో ఏ ఎన్నికలు జరిగినా పోలింగ్ శాతం తక్కువగానే ఉంటోంది. దానికి ప్రధాన కారణం ఒకటుంది.

 

 

అది.. నాన్ లోకల్స్. అంటే.. హైదరాబాద్‌లో ఉద్యోగం, ఉపాధి కోసం వచ్చి తాత్కాలికంగా నివాసం ఉంటున్నవారు. ఒక అంచనా ప్రకారం.. హైదరాబాద్ జనాభాలో సగం మంది ఇలా వచ్చినవారే. వీరిలో 70 శాతం మందికి ఇక్కడ ఓటు ఉంది. చాలా మందికి అటు సొంతూర్లలోనూ ఓటు ఉంది.ఇలా రెండు ఓట్లు ఉన్న వారంతా హైదరాబాద్‌లో జరిగే ఎన్నికల్లో ఓటేయడానికి అంతగా ఆసక్తి చూపడంలేదు. పైగా పోలింగ్ రోజు సహా రెండు, మూడు రోజులు సెలవులు వస్తే.. సొంతూర్లకు పయనమవుతున్నారు. లేదా ఎక్కడికైనా టూర్లకు వెళ్లడానికి ప్రాధాన్యం ఇస్తున్నారు. లేకపోతే.. బంధువులతో కలిసి సరదాగా గడపడానికి ప్లాన్ చేస్తున్నారు.హైదరాబాద్‌లో నివాసం ఉండే వారిలో చాలా మంది ఆంధ్రప్రదేశ్ రాష్ట్రానికి చెందిన వారున్నారు. వారిలో చాలా మందికి ఇక్కడ ఓటు ఉందన్న విషయం బహిరంగ రహస్యమే. అయితే.. ఈసారి పోలింగ్ రోజుతో కలిపి వరుసగా నాలుగు రోజులు సెలవులు వచ్చాయి. ఇంకేం.. వారిలో చాలా మంది ఏపీలోని తమ సొంతూర్లలో వాలిపోయారు. పైగా వారికి ఏపీలో జరిగే ఎన్నికలపై ఉన్నంత ఆసక్తి.. హైదరాబాద్‌లో జరిగే ఎన్నికలపై లేదనేది విశ్లేషకుల అభిప్రాయం. తెలంగాణలోని వివిధ జిల్లాల నుంచి వచ్చి హైదరాబాద్‌లో నివాసం ఉంటున్న వారిలో చాలా మంది కూడా ఇంచుమించు ఇదే కారణంతో ఓటింగ్‌కు దూరమవుతున్నారు.దీనికితోడు ఈసారి ఎన్నికలపై కరోనా ప్రభావం ఉంది.

 

 

 

పైగా.. ఆయా సంస్థలు వర్క్ ఫ్రమ్ హోమ్ ఇవ్వడంతో చాలా మంది ఉద్యోగులు, సాఫ్ట్‌వేర్ ఇంజనీర్లు తమ సొంతూర్ల నుంచే పనిచేస్తున్నారు. అలాంటి వారంతా పోలింగ్‌కు దూరమయ్యారు. హైదరాబాద్ నగరం నడిబొడ్డులోని ప్రధాన ప్రాంతాల్లో పోలింగ్ బాగా తగ్గడానికి కారణమిదే.ప్రధాన సిటీలోని ప్రాంతాలతో పోలిస్తే.. శివారు ప్రాంతాల్లో పోలింగ్ కాస్త ఎక్కువగా నమోదైంది. శివారు ప్రాంతాల్లో కొత్తగా స్థిర నివాసాలు ఏర్పాటు చేసుకుంటున్న వారి సంఖ్య కొన్నేళ్లుగా పెరుగుతోంది. వీరంతా ఓటు హక్కు వినియోగించుకున్నట్లు తెలుస్తోంది. అంతేకాకుండా.. ఇలాంటి ప్రాంతాల్లో అద్దెకు ఉంటున్న వారిలో ఎక్కువ మంది కూలీలు, కార్మికులు ఉన్నారు. వారిలో చాలా మంది రేషన్ ఇక్కడే తీసుకుంటున్నారు. ఓటు హక్కు కూడా ఇక్కడే వినియోగించుకుంటున్నారు.ఏ మాటకామాట చెబితే.. విద్యావంతులు, యువకుల కంటే అంతగా విజ్ఞానం లేనివారు, నిరక్షరాస్యులే ఓటు హక్కు చక్కగా వినియోగించుకుంటున్నారు.

 

 

 

ఎన్నికలు, స్టార్ హీరో సినిమా విడుదల, క్రికెట్ మ్యాచ్ ఒకే రోజు ఉంటే.. చాలా మంది ఓటర్లు ఎన్నికల్లో ఓటు వేయడానికి చివరి ప్రాధాన్యం ఇస్తారనేది విశ్లేషకులు చెప్పే మాట. అంటే వినోదానికే ప్రాధాన్యం ఇస్తారు. ఓటు వేయడం వారికి చివరి ఆప్షన్. మరి అలాంటి వారిని పోలింగ్ కేంద్రాలకు రప్పించాలంటే, పోలింగ్ కనీసం 70 శాతం నమోదు కావాలంటే కఠిన నిబంధనలు ఉండాల్సిందే. సైబరాబాద్ సీపీ సజ్జనార్ అభిప్రాయపడినట్లు ఓటు హక్కు వినిగించుకోనివారిని వివిధ సంక్షేమ పథకాలు, అవకాశాలకు దూరం చేయాల్సిందే.

అనంత రేసులో జొన్నలగడ్డ పద్మావతి

Tags: If voting is to increase …. do we need strict laws?

Leave a Reply

Your email address will not be published. Required fields are marked *