బెదిరింపులకు దిగుతున్న ఇమ్రాన్

Date:31/08/2019

న్యూఢిల్లీ ముచ్చట్లు:

ఐక్యరాజ్యసమితి భద్రతా మండలిలో కశ్మీర్ అంశాన్ని చైనా సాయంతో చర్చకు వచ్చేలా చేసినా ఆ ఆనందం పాకిస్థాన్‌కు ఎంతసేపూ నిలవలేదు. వీటో అధికారం గల రష్యా, ఫ్రాన్స్ సహా అగ్రరాజ్యాలు పాక్ వాదనను తోసిపుచ్చాయి. కశ్మీర్ అంశంలో జోక్యం చేసుకోడానికి అగ్రరాజ్యాలు ఆసక్తి చూపకపోవడంతో పాకిస్థాన్ లోలోపల రగిలిపోతుంది. అన్ని దేశాలు భారత్‌ను సమర్ధించేలా వ్యవహరించడంతో అది మరింత ద్వేషం పెంచుకుంటోంది. ఈ నేపథ్యంలో ప్రపంచదేశాలను ఉద్దేశించి పాక్ ప్రధాని ఇమ్రాన్ చేసిన వ్యాఖ్యలు చర్చనీయాంశమవుతున్నా. భారత్, పాక్‌ల మధ్య వివాదానికి కారణమై కశ్మీర్ అంశంలో ఒకవేళ అంతర్జాతీయ సమాజం జోక్యం చేసుకోకపోతే అణు యుద్ధానికి దారితీస్తుందని పాకిస్థాన్ ప్రధాని ఇమ్రాన్ ఖాన్ బెదిరింపులకు పాల్పడ్డారు.

 

 

 

 

న్యూయార్క్ టైమ్స్‌కు శుక్రవారం ఇచ్చిన ఇంటర్వ్యూలో ఇమ్రాన్ ఇలాంటి వ్యాఖ్యలు చేశారు. కశ్మీర్, అక్కడ ప్రజలపై భారత్ చేస్తున్న దౌర్జన్యాలకు ప్రపంచ దేశాలు ఒకవేళ అడ్డుకట్టవేయకపోతే అణ్వాయుధ దేశాలైన భారత్, పాక్‌ల మధ్య ప్రత్యక్ష యుద్ధానికి దారితీస్తే పరిణామాలు తీవ్రంగా ఉంటాయని ఇమ్రాన్ వ్యాఖ్యానించారు. ఈ సందర్భంగా అణ్వాయుధాల ప్రయోగంపై ఇటీవల కేంద్ర రక్షణ మంత్రి రాజ్‌నాథ్ చేసిన వ్యాఖ్యలను ఉటంకించారు. ఈ రోజు వరకు తొలుత అణ్వాయుధాలను ప్రయోగించకూడదనేని తమ సిద్ధాంతమని… అయితే, పరిస్థితులను బట్టి నిర్ణయం మారుతుందని రాజ్‌నాథ్ అన్నారని, ఇలాంటి ప్రకటనలే భారత నేతలు పదే పదే చేస్తున్నారన్నారు.

 

 

 

 

తమ ఆర్ధిక ప్రయోజనాలను దెబ్బతీయడానికి ప్రయత్నిస్తూ అణ్వాయుధాల వినియోగంపై తమను రెచ్చగొట్టేందుకు ప్రయత్నిస్తున్నారని ఇమ్రాన్ విమర్శించారు. కశ్మీర్ అంశంపై చర్చలను ప్రారంభించడానికి భారత్ కనీసం ప్రయత్నించడంలేదని, ఆ సంకుచిత మనస్తత్వం నుంచి వారు బయటకు రావాలని విమర్శించారు. కశ్మీరీల స్వీయ నిర్ణయాధికారాన్ని గౌరవిస్తామని భద్రతా మండలి తీర్మానంలో హామీ ఇచ్చామని, దీనిపై ఇప్పటికే తాము పలు వ్యూహాలతో సిద్ధంగా ఉన్నామని అన్నారు. దీనిపై భారత తొలి ప్రధాని జవహర్‌లాల్ నెహ్రూ వాగ్దానం చేశారని ఇమ్రాన్ పేర్కొన్నారు.

 

 

 

 

అయితే, ఐరాస భద్రతా మండలి తీర్మానం ఇతర అంశాల్లో పీఓకేను ఖాళీచేయాలన్న అంశాల గురించి దాటవేసిన ఇమ్రాన్.. కశ్మీర్ విషయంలో భారత్ తన నిర్ణయాన్ని మార్చుకుని, కర్ఫ్యూ ఎత్తివేసి, బలగాలను వెనక్కు తీసుకున్నప్పుడే చర్చలు మొదలుపెడతామన్నారు. భారత్‌తో వ్యాపార ప్రయోజనాల దెబ్బతింటాయనే కారణంతో కశ్మీర్ లోయలో పరిస్థితుల గురించి అంతర్జాతీయ సమాజం నోరువిప్పడంలేదంటూ ఇమ్రాన్ ఆరోపణలు చేశారు.

 

 

 

 

 

 

అంతేకాదు, ‘వాణిజ్య, వ్యాపార ప్రయోజనాల కంటే ముందు అంతర్జాతీయ సమాజం ఆలోచించడం అత్యవసరం.. మ్యూనిచ్ వివాదమే రెండో ప్రపంచ యుద్ధానికి దారితీసింది. ప్రస్తుతం మళ్లీ అదే ముప్పును ప్రపంచం ఎదుర్కోబోతుంది, కానీ ఈసారి అణు యుద్ధానికి దారితీస్తుందని’ పాకిస్తాన్ ప్రధాన మంత్రి హెచ్చరించారు.

నవంబర్ లో అయోధ్య తీర్పు

Tags: Imran, who descends to threats

Leave a Reply

Your email address will not be published. Required fields are marked *