mpressive ... ABCD

mpressive ... ABCD

Date:17/05/2019
హైద్రాబాద్ ముచ్చట్లు:
మెగా ఫ్యామిలీ నుంచి మూడో తరానికి చెందిన నటుల్లో అల్లు శిరీష్ ఒకరు. ‘గౌరవం’ సినిమాతో కథానాయకుడిగా పరిచయమైన శిరీష్ ఇంకా కమర్షియల్ హీరోగా నిలదొక్కుకోలేదు. ‘కొత్తజంట’, ‘శ్రీరస్తు శుభమస్తు’ సినిమాలు హిట్ టాక్ తెచ్చుకున్నా శిరీష్ మార్కెట్‌ను మాత్రం పెంచలేకపోయాయి. దీంతో ఒక మంచి కమర్షియల్ సినిమా చేయాలనే ఉద్దేశంతో మలయాళ సినిమా ‘ఏబీసీడీ’ని ఎంపిక చేసుకున్నారు. సంజీవ్ రెడ్డి అనే దర్శకుడితో ఈ చిత్రాన్ని తెలుగులో రీమేక్ చేశారు. రుక్సార్ ధిల్లాన్ హీరోయిన్‌గా నటించిన ఈ చిత్రం మే 17న ప్రేక్షకుల ముందుకు వచ్చింది. తెలుగు వ్యక్తి అయిన విద్యా ప్రసాద్ (నాగబాబు) అమెరికా వెళ్లి అక్కడ వ్యాపారవేత్తగా స్థిరపడతారు. మిలయనీర్‌గా ఎదుగుతారు. ఆయన ఏకైక కొడుకు అరవింద్ ప్రసాద్ అలియాస్ అవి (అల్లు శిరీష్) చిన్నప్పటి నుంచి డబ్బులో పెరిగి జల్సాలకు, రిచ్ కల్చర్‌కు అలవాటుపడతాడు. డబ్బును మంచినీళ్లలా ఖర్చుపెడుతుంటాడు. అవికి డబ్బు, జీవితం విలువ తెలియాలనే ఉద్దేశంతో విద్యా ప్రసాద్ తన కొడుకుని ఇండియా వెళ్లి ఎంజాయ్ చేయమని నమ్మించి హైదరాబాద్‌కు పంపుతారు. తన కజిన్ బాల షణ్ముగం అలియాస్ బాషా(భరత్)తో కలిసి అయిష్టంగా అవి హైదరాబాద్‌కు వస్తాడు. ఇక్కడికి వచ్చిన తరవాత అవికి అసలు విషయం తెలుస్తుంది. నెలకి ఇద్దరూ కలిసి రూ.5వేలతో సరిపెట్టుకోవాల్సి వచ్చింది. అమెరికాలో లక్షలు ఖర్చుపెట్టే అవి ఇలాంటి పరిస్థితుల్లో ఏం చేశాడు?
అతనికి ఎదురైన పరిస్థితులేంటి? యువ రాజకీయ నాయకుడు భార్గవ్ (రాజా)ను ఎదుర్కొని యూత్ ఐకాన్‌గా ఎలా మారాడు అనేదే సినిమా.కష్టం, డబ్బు, జీవితం విలువేంటో తెలుసుకోమని బిలియనీర్లు తమ కొడుకుల్ని సామాన్యుల మధ్యకి పంపిన సంఘటనలు గతంలో మనం చూశాం. దీన్ని ప్రధానాంశంగా ఎన్నుకొని మలయాళంలో తెరకెక్కించిన సినిమా ‘ఏబీసీడీ’. దానిలో కొద్దిపాటి మార్పులు చేసి తెలుగు ప్రాంతీయతకు తగ్గట్టుగా దర్శకుడు సంజీవ్ రెడ్డి రీమేక్ చేశారు. కథ వరకు సినిమా బాగానే ఉన్నా కథనం పెద్ద మైనస్‌గా మారింది. ప్రేక్షకుడిని సినిమాలో లీనంచేసేలా సన్నివేశాలను తీర్చిదిద్దలేకపోయారు దర్శకుడు. సినిమా ప్రారంభం నుంచి శుభం కార్డు పడేంత వరకు చాలా సాఫీగా ఓ సీరియల్‌లా సాగింది. మధ్య మధ్యలో భరత్ కాస్త నవ్వించే ప్రయత్నం చేసినా అది విఫలయత్నమే అయ్యింది. అవి, బాషా హైదరాబాద్ వచ్చిన తరువాత వాళ్లు ఇబ్బంది పడే సన్నివేశాల్లో మరింత కామెడీ, ఎమోషన్స్‌ చూపించే అవకాశం ఉన్నా దర్శకుడు సాదా సీదాగా నడిపించేశారు. కథలో బలమైన సంఘర్షణ లేకపోవడం పెద్ద లోటు. భార్గవ్, అవికి మధ్య గేమ్‌ను ఇంకాస్త ఆసక్తికరంగా తీర్చిదిద్ది ఉంటే సినిమా ఫలితం ఇంకోలా ఉండేది. సినిమాలో బాగా ఆకట్టుకున్న సన్నివేశం ఏదంటే కనీసం ఒక్కటైనా చెప్పలేని పరిస్థితి. క్లైమాక్స్ ఎపిసోడ్ కూడా అంత ఆసక్తిగా లేదు. హీరోహీరోయిన్ల మధ్య లవ్ ట్రాక్ కూడా సర్వ సాధారణంగానే ఉంది. ఎలాంటి కొత్తదనం లేదు. కమెడియన్ వెన్నెల కిషోర్ న్యూస్ ప్రెజెంటర్ పాత్రలో నవ్వించే ప్రతయ్నం చేశారు. సినిమాలో డైలాగులు కూడా చాలా సాదాసీదాగా ఉన్నాయి.
ఇక నటీనటుల విషయానికి వస్తే.. అల్లు శిరీష్ ఎప్పటిలానే హుషారుగా నటించారు. అమెరికన్ బోర్న్ కుర్రాడిలా చక్కగా సరిపోయారు. ఆయన నటనలో కొత్తగా నిరూపించుకోవాల్సినంత స్కోప్ ఈ పాత్రలో లేదు. ఇక బాల నటుడిగా తెలుగు ప్రేక్షకుల్ని కబుపుబ్బా నవ్వించిన భరత్ ఈ సినిమాతో క్యారెక్టర్ ఆర్టిస్టుగా మారారు. తన పాత్రకు పూర్తి న్యాయం చేశారు. వాస్తవానికి ఆయన పాత్రలో ఇంకాస్త కామెడీని జోడించి ఉంటే బాగుండేది. హీరోయిన్ రుక్సార్ ధిల్లాన్‌ పాత్రకు పెద్దగా స్కోప్ లేదు. ఉన్నంతలో బాగానే నటించింది. తన అందంతో మెప్పించింది. నాగబాబు, వెన్నెల కిషోర్, రాజా, శుభలేక సుధాకర్, కోట శ్రీనివాసరావు తదితరులు తమ పాత్రల పరిధిమేర నటించారు. ఈ సినిమాతో టాలీవుడ్‌లోకి అడుగుపెట్టిన కన్నడ సంగీత దర్శకుడు జుదా శాండీ అందించిన సంగీతం ఆకట్టుకుంది. ‘మెల్ల మెల్ల మెల్లగా’ అనే పాట ఆహ్లాదకరంగా ఉంది. మిగిలిన పాటలు పర్వాలేదనిపిస్తాయి. నేపథ్య సంగీతం కూడా బాగుంది. సినిమాటోగ్రఫి సినిమాకు ప్లస్‌ పాయింట్‌. కెమెరామెన్ రామ్ అమెరికాను ఎంత అందంగా చూపించారో.. హైదరాబాద్‌లోని మురికివాడను కూడా అంతే నేచురల్‌గా చూపించారు. ఎడిటర్ నవీన్ నూలి సినిమాను బాగానే కత్తిరించినా కథనంలో బలం లేకపోవడంతో ఆ పనితనం మనకు కనిపించదు. మధుర ఎంటర్‌టైన్మెంట్ నిర్మాణ విలువలు బాగున్నాయి. ఓ మంచి కథకు అస్సలు బలంలేని కథనాన్ని జోడించి ఒక సాదాసీదా సినిమాను తెరపై ఆవిష్కరించారు. భారీ అంచనాలతో సినిమాకు వెళ్తే నిరాస తప్పదు.
Tags: mpressive … ABCD

Leave a Reply

Your email address will not be published. Required fields are marked *