రగులుతున్న ఢిల్లీ

Date;27/02/2020

రగులుతున్న ఢిల్లీ

నాలుగోరోజకు చేరిన ఆందోళనలు, 34కు చేరిన మృతులు

న్యూఢిల్లీముచ్చట్లు:

ఈశాన్య ఢిల్లీలో చోటుచేసుకున్న హింసాత్మక ఘటనల్లో భారీగా ప్రాణ, ఆస్తి నష్టం సంభవించింది. కొన్ని చోట్ల ఇళ్లు, దుకాణాలను ఆందోళనకారులు ధ్వంసం చేశారు. అశోక్‌నగర్ ప్రాంతంలోని బడీ మసీదు సమీపంలో ఉన్న కాలనీలోకి చొరబడిన 1,000 ఆందోళనకారులు అక్కడ ముస్లింలపై దాడికి పాల్పడ్డారు. మసీదులో ప్రార్ధనలు చేసుకుంటున్నవారు ప్రాణాలు అరచేతిలో పట్టుకుని పరుగులు తీశారు. దుండగులు మసీదును కూడా వదలిపెట్టలేదు. ఈ ప్రాంతంలో మొత్తం 40 ముస్లిం కుటుంబాలకు నిలువనీడ లేకుండా పోయింది. నిరాశ్రయులైన ముస్లింలను అక్కడ హిందువులు అక్కున చేర్చుకుని మతసామరస్యానికి ప్రతీకగా నిలిచారు. పెద్ద మనసుతో ఆదుకుని మానవత్వమే తమ మతమని నిరూపించారు.హింసాత్మక ఘటనలో ఇంటికి కోల్పోయిన ఖుర్షీర్ అలామ్ అనే బాధితుడు మాట్లాడుతూ.. మంగళవారం మధ్యాహ్నం 1 గంట ప్రాంతంలో 1,000 మందితో కూడిన ఓ గుంపు తమ కాలనీలోకి ప్రవేశించి, మసీదులో ప్రార్ధనలు చేస్తున్నవారి ఈడ్చుకెళ్లిందన్నారు. నినాదాలు చేస్తూ మసీదులోకి చొరబడిన గుంపును చూసి ప్రాణభయంతో పరుగులు పెట్టామన్నారు. మసీదును కూడా అల్లరి మూకలు ధ్వంసం చేసినట్టు మహ్మద్ తయ్యాబ్ అనే వ్యక్తి తెలిపారు. మసీదు పైభాగంలో జాతీయ జెండాలు, కాషాయ జెండాలను ఉంచారని, వీటిని బుధవారం ఉదయం అధికారులు తొలగించినట్టు తెలియజేశారు.ఆస్తులను ధ్వంసం చేయవద్దని స్థానికులు ఎంతగా ప్రాధేయపడినా వినిపించుకోలేదని, వారంతా బయట వ్యక్తులేనని రాజేశ్ ఖాత్రీ అనే స్థానికుడు తెలిపాడు. ముఖాలను కనిపించకుండా మాస్కులు ధరించి, ఇనుప రాడ్ల చేతబట్టుకుని లోనికి ప్రవేశించిన దుండగులు దుకాణాలను ధ్వంసంచేసి నిప్పంటించారన్నాడు. తర్వాత ఇళ్లను ధ్వంసంచేశారన్నారు. అక్కడ నివసిస్తున్న ఆరు ముస్లిం కుటుంబాల ఇళ్లను మాత్రమే లక్ష్యంగా చేసుకుని, దాడిచేసి సర్వం దోచుకెళ్లారని మహ్మద్ రషీద్ అనే బాధితుడు వాపోయాడు. తాము ఇక్కడ నుంచి వెళ్లిపోవాలని భావిస్తుంటే, ఇరుగు పొరుగున ఉండే హిందూ సోదరులు తమకు సాయం చేశారు. తమకు బాసటగా నిలిచి వారి ఇళ్లలో ఆశ్రయం కల్పించారు.. గత 25 ఏళ్లుగా ఇక్కడ నివాసం ఉంటున్నా ఇలాంటి పరిస్థితి ఎప్పుడు ఎదురవ్వలేదు.. హిందూ ముస్లింలు అంతా ఒకే కుటుంబం మాదిరిగా కలిసుంటున్నాం’ అని రషీద్ ఆవేదన వ్యక్తం చేశారు.‘బాధితులకు మద్దతుగా నిలవడం పెద్ద విషయం కాదు.. తాము హిందువులమైనా వారికి హానితలపెట్టాలనే, వారి ఆస్తులను నాశనం చేయాలనే ఆలోచన తమకు ఏనాడూ కలగలేదు.. ఈ కుటుంబాలకు చెందిన దుకాణాలను ధ్వంసం చేసి, నిప్పంటించారు.. వారి ఇళ్లతోపాటు జీవనోపాధిని కూల్చేశారు.. కష్టకాలంలో వారిని తాము ఒంటరిగా వదిలిపెట్టం’ అంటూ పింటు అనే వ్యక్తి వ్యాఖ్యానించాడు. హింస తర్వాత తమ ప్రాంతంలోని ప్రజలు ఒకరికొకరు సహరించుకుంటున్నారని నీజర్ కుమార్ అనే వ్యక్తి అన్నారు. దుండగుల్లో ఎవర్నీ తాము గుర్తించలేదు..మేము అనేక ఏళ్లుగా ఇక్కడ శాంతియుతంగా జీవిస్తున్నాం.. ఒకరినొకరిపై ఒకరం ఎప్పుడూ దాడిచేసుకున్న ఘటనలు లేవు. రెండు దఫాలుగా దాడులు జరిగాయి. ఒకటి మధ్యాహ్నం 1 గంటకు, మరొకటి సాయంత్రం 4 గంటలకు అని తెలిపారు. మూక దాడి తర్వాత తాము నిస్సాహయులుగా మిగిలిపోయామని, అనేక సార్లు పోలీసులకు ఫోన్‌చేస్తే గంట తర్వాత స్పందించారని ఈ ఘటనలో బాధితుడైన డానిష్ వాపోయాడు. అప్పటికే భారీ నష్టం జరిగిందని, ఇళ్లను దోచుకున్నారని అన్నారు. రక్షణ కోసం పోలీసులు తమ కుటుంబాలను పోలీస్ స్టేషన్‌కు తీసుకెళ్లారని, రాత్రంతా తమకు అక్కడే ఆశ్రయం కల్పించారన్నాడు. ఈ మూక దాడిలో కేవలం ముస్లిం సోదరులే నష్టపోలేదని, తన దుకాణం కూడా లూటీచేశారని రాజ్ కుమార్ అనే చెప్పుల వ్యాపారి ఆవేదన వ్యక్తం చేశారు. మసీదు సమీపంలో చెప్పుల దుకాణం నిర్వహించే రాజ్‌కుమార్.. గత కొద్ది రోజులుగా మూసివేసినట్టు తెలిపారు. దుండగులు ఎవర్నీ వదలిపెట్టలేదు.. గత కొద్ది రోజులుగా దుకాణం మూసి ఉంది.. అశోక్‌నగర్‌లో ఇలాంటి ఘటన జరుగుతుందని ఎప్పుడూ ఊహించలేదు.. బుధవారం ఉదయం ఇక్కడకు వచ్చిన తర్వాతే దుకాణం తగలబెట్టినట్టు గుర్తించానని అన్నారు.
హైకోర్టు న్యాయమూర్తి జస్టిస్‌ ఎస్‌.మురళీధర్‌ను బదిలీ చేయడంపై పెద్ద ఎత్తున విమర్శలు వెల్లువెత్తుతున్న నేపథ్యంలో కేంద్ర ప్రభుత్వం స్పష్టతనిచ్చింది. సాధారణ బదిలీ ప్రక్రియలో భాగంగా సుప్రీంకోర్టు కొలీజియం సిఫార్సుల మేరకే ఆయనను పంజాబ్‌-హరియాణా హైకోర్టుకు మార్చామని, ఇందుకు జడ్జీ నుంచి ముందస్తు సమ్మతి కూడా తీసుకున్నట్లు కేంద్ర న్యాయశాఖ మంత్రి రవిశంకర్‌ ప్రసాద్‌ వెల్లడించారు. మురళీధర్‌ బదిలీపై స్పందించిన కాంగ్రెస్‌ నేత రణ్‌దీప్‌ సుర్జేవాలా కేంద్రంపై ఘాటు విమర్శలు చేశారు. ‘ఈ చర్యతో భాజపా ప్రతీకార రాజకీయాలు బహిర్గతమవుతున్నాయి. దిల్లీలోని భాజపా నేతలను కాపాడేందుకే న్యాయమూర్తిని బదిలీ చేశారు’ అని సుర్జేవాలా ఆరోపించారు.

Tags;Raging Delhi

Leave a Reply

Your email address will not be published. Required fields are marked *