పెద్ద అల్లుడికి గౌరవం ఇస్తున్నారని..  చిన్నారుల హత్య

గుంటూరు ముచ్చట్లు:

 

రేపల్లెలో కలకలం రేపిన ఇద్దరు చిన్నారుల హత్య కేసులో షాకింగ్ విషయాలు వెలుగులోకి వస్తున్నాయి. అసూయతోనే వదిన కొడుకులను మరిది కిరాతకంగా హత్య చేసినట్లు తెలుస్తోంది. పెద్దల్లుడికే అత్త, బావమరిది మర్యాద ఇస్తున్నారని కోపంతో రగిలిపోయిన చిన్నల్లుడు ఘాతుకానికి తెగబడ్డాడు. అభం శుభం తెలియని చిన్నారులను అత్యంత దారుణంగా చంపేశాడు. సైకోగా మారిన లండన్ సాఫ్ట్‌వేర్ ఇంజనీర్ ఈర్ష్యాద్వేషాలతో చిన్నారులను పొట్టనబెట్టుకున్నాడు. పోలీసులు తెలిపిన వివరాల మేరకు..రేపల్లె 23 వార్డుకి చెందిన మోర్ల విజయలక్ష్మికి కొడుకు పళని కుమార్, ఇద్దరు కూతుళ్లు ఉమాదేవి, శారదా దేవి సంతానం. పెద్ద కూతురు ఉమాదేవిని చేబ్రోలు మండలం వేజండ్ల గ్రామానికి చెందిన కొండేటి కోటేశ్వరరావుకిచ్చి వివాహం చేశారు. వారికి ఇద్దరు పిల్లలు పార్థివ్ సాహసవత్(10), రోహిత్ తశ్విన్(8). చిన్న కూతురు శారదా దేవికి కర్లపాలేనికి చెందిన కాటూరి శ్రీనివాసరావుతో వివాహమైంది. వారికి కుమారుడు సంజీవ్ శ్రీసౌర్య, కూతురు ధన్విక్ ఉన్నారు.పెద్దల్లుడు కోటేశ్వరరావు, ఉమాదేవి బెంగళూరులో నివాసముండేవారు. చిన్నల్లుడు శ్రీనివాసరావు వివాహానికి ముందు లండన్‌లో సాఫ్ట్‌వేర్ ఇంజనీర్‌గా పనిచేసేవాడు. వివాహానంతరం లండన్‌లో ఉద్యోగం మానేసి బెంగళూరుకు మకాం మార్చాడు. కొడుకు పళని కుమార్ అమెరికాలో ఉద్యోగం చేస్తున్నాడు. కరోనా లాక్‌డౌన్ కారణంగా ఇద్దరు కూతుళ్లు కుటుంబంతో సహా రేపల్లెలోని పుట్టింటికి వచ్చారు. సోదరుడు పళని కుమార్ కూడా సెలవులకి ఇండియాకి రావడంతో అతను వెళ్లే వరకూ అందరూ అక్కడే కలసి ఉండాలని నిర్ణయించుకున్నారు.

 

 

 

అయితే బెంగళూరు నుంచి అత్తారింటికి వచ్చిన శ్రీనివాసరావు ఖాళీగా తిరుగుతుండేవాడు. చిన్నల్లుడి చేష్టలతో విసిగిపోయిన అత్త విజయలక్ష్మి, బావమరిది పళని కుమార్ అతన్ని దూరం పెట్టారు. పెద్దల్లుడు కోటేశ్వరరావుకి మర్యాద ఇస్తూ గౌరవంగా చూసుకునేవారు. దీంతో చిన్నల్లుడు శ్రీనివాసరావుకి తోడల్లుడిపై అసూయ పెరిగిపోయింది. ఈర్ష్యా ద్వేషాలతో రగిలిపోయాడు. అతని ఇద్దరు కొడుకులను అంతం చేయాలని నిర్ణయించుకున్నాడు. ఇంటి బయట ఆడుకుంటున్న పార్థివ్, రోహిత్‌లను ఇంట్లోకి తీసుకెళ్లి గడియపెట్టాడు.చిన్నారులపై కనీస కనికరం లేకుండా కర్రలతో కొట్టి కిరాతకంగా హతమార్చాడు. చిన్నారుల కేకలు విని అతని భార్య శారదా వచ్చి తలుపులు కొట్టడంతో కంగారుగా బయటికి వచ్చి అక్కడి నుంచి పరారయ్యాడు. ఇద్దరు అన్నలని నాన్న కర్రతో దారుణంగా కొట్టాడని భయంతో వణికిపోతూ సంజీవ్ తల్లి శారదకి చెప్పాడు. తన భర్తే అక్క కొడుకులను అమానుషంగా కొట్టి చంపేశాడని శారద వాపోయింది. తన కోసం వచ్చి మేనల్లుళ్లు ప్రాణాలు కోల్పోయారని పళని కుమార్ కన్నీటి పర్యంతమయ్యాడు. ఇద్దరు బిడ్డలను పోగొట్టుకున్న తల్లిదండ్రులు శోకసంద్రంలో మునిగిపోయారు. పోలీసులు నిందితుడిని అరెస్టు చేసి.. కేసు విచారణ జరుపుతున్నారు.

 

పుంగనూరులో పనిచేస్తున్న మాదవరాజుకు తహశీల్ధార్‌గా పదోన్నతి

 

Tags: Respecting the big brother-in-law .. Murder of children

Leave a Reply

Your email address will not be published. Required fields are marked *