రాహుల్ పై సామ్నా విమర్శలు

ముంబై ముచ్చట్లు:

 

 

కాంగ్రెస్ నేత రాహుల్ గాంధీపై శివసేన విమర్శలు గుప్పించింది. ప్రధాని నరేంద్ర మోదీపై కేవలం ట్విట్టర్‌లో విమర్శలకే రాహుల్ గాంధీ పరిమితమయ్యారని పేర్కొంటూ అధికారిక పత్రిక సామ్నాలో సంపాదకీయం రాసింది. ప్రతిపక్షాలను ఒక్కతాటిపైకి తేవడంలో ఆయన విఫలమయ్యారని ఆరోపించింది. మహారాష్ట్రలో కాంగ్రెస్, ఎన్సీపీతో కలిసి శివసేన ప్రభుత్వాన్ని ఏర్పాటుచేసిన విషయం తెలిసిందే. విపక్షాలను ఏకం చేయడంలో నేషనలిస్ట్ కాంగ్రెస్ పార్టీ (ఎన్సీపీ) అధినేత శరద్ పవార్ విజయవంతమయ్యారని ప్రశంసలు కురిపించింది. ఢిల్లీ 6 జన్‌పథ్‌లోని పవార్ నివాసంలో విపక్షాలు, మేధావులతో జరిగిన సమావేశాన్ని సామ్నా ఉటంకించింది. ప్రస్తుతం ప్రధాని నరేంద్ర మోదీ వైఖరి పూర్తిగా మారిపోయిందని… దేశంలో పరిస్థితులు అస్సలు బాగాలేవని పేర్కొంది. ప్రభుత్వంపై ప్రజల్లో ఆగ్రహావేశాలు పెరిగినా తమ ప్రభుత్వానికి ఎటువంటి ఢోకాలేదన్న ఆత్మవిశ్వాసం బీజేపీలో కనిపిస్తోందని వ్యాఖ్యానించింది. దీనికి బలహీన, ఐక్యత లేని ప్రతిపక్షమే కారణమని దుయ్యబట్టింది. రాష్ట్రమంచ్‌కు కాంగ్రెస్ పార్టీ పెద్దగా ప్రాధాన్యం ఇవ్వలేదని విమర్శించింది.శరద్ పవార్ మాదిరిగా రాహుల్ గాంధీ కూడా ప్రతిపక్షాలను ఏకతాటిపైకి తెచ్చి ఉంటే ఆ ప్రతిపక్షం బలంగా ఉండి ఉండేదని వివరించింది. ప్రధాని నరేంద్ర మోదీ, ఆయన ప్రభుత్వానికి మునుపు ఉన్నంత ప్రజాదరణ ఇప్పుడు లేదని పేర్కొంది. మోదీ గ్రాఫ్ భారీగా పడిపోయినా, బలమైన ప్రతపక్షం లేకపోవడంతో దానిని సద్వినియోగం చేసుకోలేకపోతున్నామని చెప్పింది.

 

 

 

 

కొన్ని రాష్ట్రాల్లో ప్రతిపక్షాలు విజయం సాధించాయని, దానిని ఇప్పుడు సద్వినియోగం చేసుకోవడంపై దృష్టిసారించాలని సూచించింది.ప్రతిపక్షాలన్నింటినీ ఏకం చేయగల శక్తి శరద్ పవార్ కు ఉందని, కానీ, నాయకత్వ సమస్యే అతిపెద్ద సవాల్ అని వ్యాఖ్యానించింది. ఒకవేళ ఆ బాధ్యతను కాంగ్రెస్‌కు అప్పగిద్దామనుకున్నా.. ఆ పార్టీకే చాలా నెలల నుంచి ‘అధ్యక్షుడు’ లేక కొట్టుమిట్టాడుతోందని ఎద్దేవా చేసింది. పవార్‌కు రాహుల్ కూడా మద్దతునిస్తే బలమైన ప్రతిపక్షాన్ని తయారు చేయవచ్చని సూచించింది.మోదీ పనితీరు, విధానాలు, లోపాలపై రాహుల్ గాంధీ పోరాటం చేయడం వాస్తవమే.. కానీ, కేవలం ట్విట్టర్‌కే పరిమితమయ్యారు.. ట్విట్టర్ తమకు అనుకూలంగా పనిచేయడం లేదని కేంద్ర ప్రభుత్వం గ్రహించిన వెంటనే, దానిపై చర్యలు తీసుకోవడం ప్రారంభించారు’ అని పేర్కొంది. ఎన్నికల్లో ఒంటిరిగానే పోటీచేస్తామని మహారాష్ట్ర పీసీసీ అధ్యక్షుడు చేసిన వ్యాఖ్యలపై శివసేన విమర్శలు గుప్పించిన విషయం తెలిసిందే. అయితే, ఈసారి నేరుగా రాహుల్ గాంధీని టార్గెట్ చేయడంపై ఆ పార్టీ ఎలా స్పందిస్తుందో చూడాల్సి ఉంది.

 

పుంగనూరులో కరోనా మందును వినియోగించుకోండి- కమిషనర్‌ కెఎల్‌.వర్మ

Tags: Saamna criticizes Rahul

Leave a Reply

Your email address will not be published. Required fields are marked *