స్థిరమైన ఆర్థిక విధానాలే దేశాభివృద్ధికి కీలకం!

అమరావతి ముచ్చట్లు:

దేశం ప్రస్థుతం ఎదుర్కొంటున్న ఆర్ధిక అనిశ్చితి మాటలలో వివరించలేనంత ఆందోళనకర స్థాయిలో ఉంది. డాలర్తో రూపాయి మారకం విలువ చరిత్రలో ఎన్నడూ లేనంతగా 80 రూపాయలకు చేరింది. రూపాయి పతనాన్ని ఆపడానికి 1.5 లక్షల కోట్లు మేర విదేశీ మారక ద్రవ్యాన్ని కుమ్మరించినా పరిస్థితిలో ఎటువంటి మెరుగుదల లేదు. ముడిచమురు, బొగ్గు, ఆహార ధాన్యాలు వంటి వస్తువుల దిగుమతులు గణనీయంగా పెరిగి దేశం నుండి జరిగే ఎగుమతులు తగ్గాయి. దాంతో, విదేశీ మారక ద్రవ్యం వేగంగా హరించుకుపోతోంది. విదేశీ రుణం రికార్డు స్థాయికి చేరింది. ఫలితంగా విదేశీ చెల్లింపుల సమతౌల్యం దెబ్బతిని కరెంట్ ఖాతా లోటును నిర్వహించడంలో ఆర్థిక శాఖ సమమతం అవుతోంది. దేశంలో చిల్లర విపణి ధరలు, వంట గ్యాస్, కిరోసిన్, బొగ్గు ధరలు అదుపు తప్పాయి. దేశంలో అన్ని సరుకుల టోకు ధరల సూచీ 15% పైకి ఎగబాకింది. కేంద్ర ప్రభుత్వ అనాలోచిత ఆర్ధిక విధానాల కారణంగా దేశంలో పేద, మధ్య తరగతి ప్రజల జీవనం దుర్భరంగా మారింది. చాలామంది కేంద్రం, రాష్ట్రాలు చేస్తున్న అప్పుల గురించే మాట్లాడుతున్నారుగానీ.. కుటుంబాలు చేస్తున్న అప్పుల గురించి మాట్లాడ్డం లేదు. కోవిడ్ కారణంగా ఉపాధి కోల్పోయి గత్యంతరంలేక తీసుకున్న అప్పులతో పేదలు, మధ్య తరగతి ప్రజలు అప్పుల ఊబిలో దిగిపోయారు.

 

దేశం ఎదుర్కొంటున్న ఈ ఆర్థిక దుస్థితి హఠాత్తుగా వచ్చి పడింది కాదు. అలాగని కరోనా దెబ్బతోను, రష్యా-ఉక్రెయిన్ల యుద్ధంతోను పూర్తిగా ఈ స్థితి దాపురించలేదు. కేంద్రంలో అధికారంలో ఉన్న ఎన్డీఏ ప్రభుత్వానికి స్థిరమైన ఆర్ధిక విధానం లోపించడమే ఈ దుస్థితికి ప్రధాన కారణం. ప్రధాని నరేంద్రమోదీ 2014లో అధికారం చేపట్టేనాటికి దేశ ఆర్ధిక రంగం సుస్థిరంగా దేశ స్థూల ఉత్పత్తి (జీడీపీ) 7.4% వృద్ధిరేటుతో ఆరోగ్యకరంగానే ఉంది. పైగా, 2014 తర్వాత దాదాపు నాలుగేళ్లపాటు అంటే 2018 వరకు అంతర్జాతీయంగా ముడిచమురు ధరలు కనిష్టానికి పడిపోయాయి. ఫలితంగా.. కేంద్ర ఖజానాకు కొన్ని లక్షల కోట్ల రూపాయలు ఆదా అయ్యాయి. కానీ, ఈ అనుకూలతను ఆర్ధిక రంగ పటిష్టతకు వినియోగించుకోవడంలో ఎన్డీఏ ప్రభుత్వం విఫలం అయింది. 2016 నవంబర్లో నల్లధనం అరికట్టడం లక్ష్యంగా హఠాత్తుగా ప్రకటించిన పెద్దనోట్ల రద్దు ఓ విఫల కార్యక్రమంగా మిగిలిపోయింది. పెద్ద నోట్ల రద్దు వల్ల దేశంలోని అసంఘటిత రంగం, చిన్న, మధ్య తరహా పరిశ్రమలు దెబ్బతిన్నాయి. పారిశ్రామిక ఉత్పత్తి తగ్గింది. నిరుద్యోగం పెరిగింది. పెద్ద నోట్ల రద్దు తర్వాత భారత బ్యాంకింగ్ వ్యవస్థ విశ్వసనీయత సన్నగిల్లడంతో అనేక మంది డిపాజిట్ దారులు తమ డబ్బును బ్యాంకుల నుండి ఉపసంహరించుకొని డాలర్ల రూపంలో విదేశీ బాంకుల్లో దాచుకున్నారు. ఫలితంగానే, స్విస్ బ్యాంకుల్లో భారతీయలు దాచుకున్న డిపాజిట్ల విలువ 2017 తర్వాత ఇబ్బడిముబ్బడిగా పెరిగిందని పలు నివేదికలు వెల్లడిస్తున్నాయి. అంటే, భారత బ్యాంకుల్లో ఉండాల్సిన డిపాజిట్లు విదేశాలకు తరలడం వల్ల ‘రూపాయి’పై భారం పెరగడమే కాక.. దేశ ఆర్థిక ప్రగతికి గొడ్డలిపెట్టుగా పరిణమించింది. కోట్లాది మందికి ఉపాధి కల్పించే దేశీయ అసంఘటిత రంగాలను దెబ్బతీయడమే పెద్దనోట్ల రద్దు విజయంగా మిగిలిపోయింది.

 

స్థిరమైన పెట్టుబడులు మాత్రమే ఆర్థిక వ్యవస్థను బలోపేతం చేస్తాయి. కానీ, విదేశీ పెట్టుబడులను ఆకర్షించాలనే తాపత్రయంతో నిబంధనలను పూర్తిగా సరళీకృతం చేశారు. వివిధ రంగాల్లో విదేశీ పెట్టుబడులను 50% నుంచి 90% వరకు అనుమతి ఇస్తున్నారు. మరోపక్క స్టాక్ మార్కెట్లోకి విదేశీ సంస్థాగత పెట్టుబడులను (ఎఫ్ఎస్ఐలు) ప్రోత్సహిస్తున్నారు. విదేశీ ప్రత్యక్ష పెట్టుబడులు ఎంత ఎక్కువగా వస్తే పారిశ్రామిక రంగానికి అంత లాభం. కానీ, స్టాక్ మార్కెట్లోకి వచ్చే ఎఫ్ఎస్ఐఐల వల్ల తాత్కాలిక లాభాలున్నా నష్టాలే ఎక్కువ. ఎప్పుడైతే రూపాయి విలువ క్షీణిస్తుందో.. అప్పుడు స్టాక్ మార్కెట్ల నుండి ఎఫ్ఎస్ఐల ఉపసంహరణ ఊపందుకుంటుంది. ప్రస్థుతం జరుగుతున్నది ఇదే. అంతర్జాతీయంగా రిస్క్ సెంటిమెంట్ అధికంగా ఉండి, ప్రతికూల పరిస్థితులు ఏర్పడితే దేశ జీడీపీలో 3.2% అంటే సుమారు 7.8 లక్షల కోట్ల పెట్టుబడులు వెనక్కి తరలిపోయే ప్రమాదం ఉన్నదని స్వయంగా ఆర్బిఐ డిప్యూటీ గవర్నర్లయిన దేవవ్రతపాత్రా, హరేంద్ర బెహెరా, సెలుముదలిలు సంయుక్తంగా పేర్కొన్నారు.

 

డాలర్తో రూపాయి మారకం విలువ వేగంగా పతనం కావడంతో అనేక రంగాలలో ఈ దుష్పలితాలు కనపడుతున్నాయి. భారత ఆర్థిక వ్యవస్థ ఎక్కువగా అమెరికన్ డాలర్ చుట్టూ పరిభ్రమించడం వల్లనే ఈ దుస్థితికి ప్రధాన కారణం. అమెరికన్ డాలర్ ఆధారిత ఆర్థిక వ్యవస్థలతో భారత్ అధిక మొత్తంలో లావాదేవీలు నిర్వహిస్తోంది. ముఖ్యంగా.. బంగారం, ఇతర విలాస వస్తువులను పెద్ద ఎత్తున దిగుమతి చేసుకోవడం ఎక్కువైంది.

 

ఇక, దేశాన్ని పన్ను ఉగ్రవాదం నుండి విముక్తం చేయడం కోసమే వస్తు సేవల పన్ను (జీఎస్టీ) లక్ష్యం అని చెప్పుకున్న ఎన్డీఏ ప్రభుత్వం హేతుబద్ధత లోపించిన ఆచరణతో ప్రజలపై పెనుభారం మోపింది. జీఎస్టీ రేట్లు, వివిధ శ్లాబుల్లోకి వచ్చే వస్తువులను ఇష్టానుసారంగా మార్చివేస్తున్నారు. జీఎస్టీ అమలుతో పన్నుల విధానంలో పారదర్శకత వస్తుందంటూ చేసిన ప్రచారానికి విరుద్ధంగా అనేక వస్తువులు, శ్లాబుల విషయంలో ఇంకా అస్పష్టత కొనసాగుతూనే ఉంది. జీఎస్టీ అమలులోకి వచ్చిన తర్వాత ఇప్పటివరకు 1000 సార్లు సవరణలు చేశారంటే దానిని ఏవిధంగా అమలు చేస్తున్నారో అర్ధం చేసుకోవచ్చు. జీఎస్టీ వల్ల జరిగే నష్టాన్ని రాష్ట్రాలకు భర్తీ చేస్తామని కేంద్రం చెప్పినా.. దానిని పూర్తిస్థాయిలో నిలబెట్టుకోలేకపోతున్నారు.

 

కొండలా ప్రభుత్వ బ్యాంకుల మొండి బకాయిలు:-

 

గత 8 ఏళ్లుగా ప్రభుత్వ రంగ బ్యాంకుల మొండి బకాయిలు కొండలా పెరిగిపోయాయి. 2014 జూన్ నాటికి దాదాపు 2 లక్షల కోట్లుగా ఉన్న ప్రభుత్వ రంగ బ్యాంకుల మొండి బకాయిలు ప్రస్థుతం 10 లక్షల కోట్లు చేరాయన్న నివేదికలు కేంద్ర ప్రభుత్వ వైఫల్యానికి అద్దం పడతాయి. నిజానికి, ప్రభుత్వ రంగ బ్యాంకుల (పిఎసిలు) వార్షిక పనితీరు, ప్రభుత్వ పథకాల్లో ఆయా బ్యాంకుల పురోగతిని కేంద్ర ఆర్థిక శాఖ ఎప్పటికప్పుడు సమీక్షించాలి. ఏయే రంగాలకు ఏ మేరకు రుణాలు అందిస్తున్నది, నిరర్ధక ఆస్తులు (మొండి బకాయిలు) ఏ మేరకు పెరిగిపోతున్నది తదితర అంశాలను ఎప్పటికప్పుడు రిజర్వ్ బ్యాంక్ పర్యవేక్షించాలి. పిఎ్బలు అందించే రుణాలలో వృద్ధి, ఆస్తుల నాణ్యత, వ్యాపార ప్రణాళికలు, రికవరీ స్థితి మొదలైన అంశాలను పర్యవేక్షించే బాధ్యత ఆర్బిఐతో పాటు ఆర్థిక శాఖదే. మొండి బకాయిలు పేరుకుపోతున్నాయంటే అర్ధం.. ఆర్బిఐ తన బాధ్యతను సక్రమంగా నిర్వర్తించలేకపోవడమే. అదేవిధంగా ఆర్బిఐపై రాజకీయ ఒత్తిళ్లు పనిచేయడం. నరేంద్రమోదీ ప్రధాని అయిన తర్వాత ఆర్బిఐకు గవర్నర్లుగా పనిచేసిన రఘురామరాజన్, ఉర్జిత్పటేల్ ఇద్దరూ తమ గడువు పూర్తవకముందే బాధ్యతల నుండి తప్పుకోవడం గమనార్హం. ముఖ్యంగా, నరేంద్రమోదీ ఏరికోరి తెచ్చుకున్న ఉర్జిత్పటేల్ కూడా అర్థాంతరంగా తప్పుకోవడం చూస్తే ఆర్బిఐపై రాజకీయ ఒత్తిళ్లు ఏవిధంగా పనిచేస్తున్నాయో అర్ధం చేసుకోవచ్చు. ప్రభుత్వ రంగ బ్యాంకుల నుండి భారీగా రుణాలు తీసుకొని విదేశాలకు పారిపోయిన పారిశ్రామిక వేత్తలను వెనక్కి రప్పించి వారి ఆస్థులను జప్తు చేయించడంలో కూడా కేంద్రం విఫలం అయింది. కాగా, నష్టాల్ని తగ్గించుకోవడానికి ప్రభుత్వ రంగ బ్యాంకులను విలీనం చేసే ప్రక్రియ చేపట్టడం అనేక విమర్శలకు గురైంది. తాజాగా, ఎస్బిఐ మినహా దేశంలోని అన్ని బ్యాంకులను ప్రైవేటీకరణ చేసేందుకు కేంద్ర ప్రభుత్వ పెద్దలు ఆలోచిస్తున్నారన్న వార్త ఆందోళన కలిగిస్తోంది. అందుకు సంబంధించిన బిల్లును త్వరలోనే పార్లమెంట్లో ప్రవేశపెడతారన్న వాదన బలంగా వినిపిస్తోంది. ప్రభుత్వ రంగ బ్యాంకులకు సంబంధించి ఎన్డీఏ ప్రభుత్వ తీరును గమనిస్తే కొండనాలుకకు మందేస్తే ఉన్న నాలుక ఊడిన చందంగా ఉంది. ప్రభుత్వ రంగ బ్యాంకుల్ని ప్రైవేటీకరిస్తే కలిగే అనర్థాలు అనేకం. ఉద్యోగ భద్రత లోపించడంతోపాటు ఎస్సీ, ఎస్టీ వర్గాలకు రిజర్వేషన్లు వర్తించవు.

 

ఎప్పటికప్పుడు ఆకర్షణీయమైన విధానాలు ఇవ్వడంలో ప్రధాని నరేంద్రమోదీ కనబరిచే ఉత్సాహం దేశంలో సుస్థిరమైన ఆర్ధిక విధానాలను అమలు చేయడంలో చూపడం లేదు. ప్రధాని నరేంద్రమోదీ ‘డబుల్ ఇంజన్ గ్రోత్ ‘ వంటి పసలేని నినాదాలకు తాత్కాలికంగానైనా స్వస్తి పలికి ఆర్థిక వ్యవస్థను బలోపేతం చేయడంపై దృష్టి పెట్టాలి. జీఎస్టీని సరళతరం చేయాలి. రూపాయిని బలోపేతం చేసే చర్యలు చేపట్టాలి. నల్లధనాన్ని వెనక్కు రప్పించాలి. అధిక వ్యయంతో కూడిన దిగుమతులను నిలుపుదల చేసి వైవిధ్యమైన ఎగుమతులపై దృష్టి పెట్టాలి. దేశంలోని మానవ వనరులను సద్వినియోగపర్చుకొని పారిశ్రామిక, వ్యవసాయ ఉత్పత్తులను పెంచడం, ఉద్యోగ ఉపాధి అవకాశాలను విసృత్తం చేయడంపైనే దృష్టి పెట్టాలి. రాష్ట్రాలను కలుపుకొని ఉమ్మడిగా దేశం ఎదుర్కొంటున్న ఈ అసాధారణ ఆర్ధిక సంక్షోభాన్ని నివారించడానికి స్థిరమైన ఆర్థిక విధానాలతో తగిన కార్యాచరణ రూపొందించాలి.

 

Tags: Stable economic policies are the key to national development!

Leave A Reply

Your email address will not be published.