ఎంసెట్ ర్యాంకుల్లోనూ తప్పులే

Date:10/06/2019

హైద్రాబాద్  ముచ్చట్లు:

ఇంటర్ ఫలితాల గందరగోళం నుంచి బయటపడి ఊపిరి పీల్చుకున్న విద్యార్థులకు మరోసారి ఎంసెట్ ఫలితాల రూపంలో కొత్త చిక్కు వచ్చి పడింది. టెక్నికల్‌‌గా విద్యార్థుల వివరాలను నమోదు చేయడంలో తప్పులు దొర్లడంతో కొందరి ఫలితాలు వెల్లడి కాలేదు. దీంతో వారు ఎంసెట్‌లో అర్హత పొందామా లేదా అనే సందిగ్ధంలో పడ్డారు. ఇంజినీరింగ్‌ విభాగంలో ముగ్గురికి ర్యాంకుల స్థానంలో ‘నల్‌’ రావడం.. మరో నలుగురికి ‘అదర్స్‌’ అని రావడంతో వారు ఆందోళనకు గురయ్యారు. వీరితో పాటు ఒక విద్యార్థి ఫలితాన్ని విత్‌హెల్డ్‌‌లో పెట్టినట్లు జేఎన్‌టీయూ పేర్కొంది. అగ్రికల్చర్‌, ఫార్మసీ విభాగాల్లోనూ ఇలాంటి పరిస్థితే నెలకొంది. ఒక అభ్యర్థికి ర్యాంకు స్థానంలో ‘నల్‌’ అని రాగా, ఇద్దరికి ‘అదర్స్‌’ అని వచ్చింది. ఇదిలా ఉండగా.. ఇంటర్ ద్వితీయ సంవత్సరం హాల్‌టికెట్‌ నంబరు ఇవ్వని విద్యార్థులకు, సీబీఎస్‌ఈ, ఐసీఎస్‌ఈ పరీక్షల్లో ఉత్తీర్ణులైన విద్యార్థుల మార్కులు సేకరించకుండానే జేఎన్‌టీయూహెచ్ ఎంసెట్‌ ఫలితాలను ప్రకటించింది. దీనివల్ల ఇంజినీరింగ్‌, అగ్రికల్చర్‌, ఫార్మసీ విభాగాల్లో దాదాపు 5,281 మంది విద్యార్థులు ఎంసెట్‌లో అర్హత సాధించినప్పటికీ ర్యాంకులు పొందలేకపోయారు.

 

 

 

 

 

 

ఎందుకిలా జరిగింది..?
ఎంసెట్‌ దరఖాస్తులో కనీస అర్హత పరీక్షలైన ఇంటర్, సీబీఎస్‌ఈ, ఐసీఎస్‌ఈ ఒకేషనల్‌ తదితర కోర్సుల హాల్‌టికెట్‌ నెంబరును నమోదు చేయాల్సి ఉంటుంది. అయితే దాదాపు 2000 మంది విద్యార్థులు ఇంటర్ ద్వితీయ సంవత్సరం హాల్‌టికెట్‌ నెంబరుకు బదులుగా ప్రథమ సంవత్సరం హాల్‌టికెట్ నెంబరును నమోదు చేశారు. మరోవైపు సీబీఎస్‌ఈ, ఐసీఎస్‌ఈ పరీక్షలు రాసి.. ఎంసెట్‌‌ పరీక్షకు దరఖాస్తు చేసుకున్న దాదాపు 2,623 మంది విద్యార్థులు ‘ప్లస్‌టూ’ హాల్‌టికెట్‌ నంబరు నమోదు చేశారు. దీంతో విద్యార్థుల వివరాలు ఇవ్వాల్సిందిగా.. జేఎన్‌టీయూ అధికారులు పలుమార్లు సీబీఎస్‌ఈ బోర్డును కోరినా.. అక్కడి అధికారులు ఇవ్వలేదు. జేఎన్‌టీయూ అధికారులు కూడా తదుపరి ప్రయత్నాలు చేయకుండానే ఎంసెట్ ఫలితాలను ప్రకటించేశారు. దీంతో దాదాపు 5,281 మంది విద్యార్థులు ఎంసెట్‌లో ఉత్తీర్ణులైనప్పటికీ.. ర్యాంకులు తెలుసుకోలేని పరిస్థితి ఏర్పడింది.
వారికి ప్రత్యేక ర్యాంకులు-ఎంసెట్ కన్వీనర్
అయితే ఎంసెట్‌లో ఉత్తీర్ణులై ఇంటర్మీడియట్‌, సీబీఎస్‌ఈ, ఐసీఎస్‌ఈ మార్కుల కారణంగా ర్యాంకులు పొందని విద్యార్థులకు త్వరలోనే ప్రత్యేకంగా ర్యాంకులు ప్రకటిస్తామని ఎంసెట్‌ కన్వీనర్‌ ప్రొఫెసర్‌ ఎన్‌.యాదయ్య తెలిపారు. వారికి ఇప్పటికే ఎస్‌ఎంఎస్‌లు పంపించామని.. అందులో ఇచ్చిన ప్రత్యేక లింక్ ద్వారా వివరాలను నమోదు చేయాలని కోరారు. ఆ వివరాలను అప్‌లోడ్‌ చేసిన తర్వాత ర్యాంకులు ప్రకటిస్తామని తెలిపారు.

యువరాజ్ క్రికెట్ కు గుడ్ బై

Tags:The EAMCET rankings are also wrong

Leave a Reply

Your email address will not be published. Required fields are marked *