బ్యాలెట్ తోనే ఎన్నికలు నిర్వహించాలి: బాబు

The elections should be conducted with the ballot: Babu

The elections should be conducted with the ballot: Babu

Date:15/04/2019
విజయవాడ ముచ్చట్లు :
బ్యాలెట్ పేపర్ పద్ధతిలో ఎన్నికలు నిర్వహించాలని ఏపీ సీఎం చంద్రబాబు నాయుడు ఎన్నికల సంఘాన్ని డిమాండ్ చేశారు. ఈవీఎంలు, వీవీప్యాట్ స్లిప్‌లపై తమకు అనుమానాలు ఉన్నాయన్నారు. ఉండవల్లిలో మీడియాతో మాట్లాడిన ఆయన.. ఈవీఎంల మొరాయింపు, అవకతవకల గురించి ఈసీని ప్రశ్నించారు. 50 శాతం వీవీప్యాట్ స్లిప్‌లను లెక్కించాల్సిందేనని ఈసీని డిమాండ్ చేశారు. తెల్లవారుజామున 4 గంటలకు వరకూ ఓటింగ్ జరగడం ఆంధ్రప్రదేశ్‌లో గతంలో ఎప్పుడైనా చూశామా? అని ఆయన ప్రశ్నించారు. వీవీప్యాట్ స్లిప్‌ 7 సెకన్ల పాటు చూపించాలి, కానీ 3 సెకన్లే చూపిస్తోంది. అలా కోడ్‌‌ను ఎవరు మార్చారని చంద్రబాబు ప్రశ్నించారు. మధ్యాహ్నం ఒంటి గంటకు పోలింగ్ ప్రారంభించడమేంటని ఆయన నిలదీశారు. ఎన్నికల సంఘం స్వయంప్రతిపత్తిని ఆయన ప్రశ్నించారు. అన్నీ సవ్యంగా ఉన్నాయని తప్పుడు లెక్కలు చూపిస్తున్నారని ఆరోపించారు. వీవీప్యాట్‌ల ఏర్పాటు కోసం రూ.9 వేల కోట్లు ఖర్చుపెట్టారు. కానీ వాటిని సమర్థవంతంగా ఉపయోగించుకోవడం లేదని సీఎం విమర్శించారు. 50 శాతం వీవీప్యాట్ స్లిప్‌లను లెక్కించాలని గతంలో సుప్రీంను ఆశ్రయించామన్న ఆయన.. వీవీప్యాట్ స్లిప్‌లను లెక్కించడానికి వారం రోజులు పడుతుందని సుప్రీంను తప్పుదోవ పట్టిస్తున్నారని బాబు విమర్శించారు. రిటర్నింగ్ ఆఫీసర్, అబర్జర్వర్ సమక్షంలో వీవీప్యాట్ స్లిప్‌లను లెక్కించాలంటున్నారు.
అలాంటప్పుడు ఎన్నికలనే రిటర్నింగ్ ఆఫీసర్ సమక్షంలో నిర్వహించొచ్చు కదా? అని బాబు ప్రశ్నించారు. గతంలో 24 గంటలు లేదా 36 గంటల్లోనే పేపర్ బ్యాలెట్ పద్ధతిలో కౌంటింగ్ ప్రక్రియ ముగిసిందని బాబు గుర్తు చేశారు. వీవీప్యాట్ స్లిప్‌లను లెక్కించడానికి మహా అయితే పది గంటల సమయం పడుతుంది. ఈసీకి ఆ మాత్రం సమయం కేటాయించడం కూడా కుదరదా అని చంద్రబాబు ప్రశ్నించారు. ఆలస్యం కావడం కంటే విశ్వసనీయత ముఖ్యమని చంద్రబాబు తెలిపారు. ఈవీఎంలపై గతంలో కేసులు వేసిన సుబ్రమణ్య స్వామి ఇప్పుడు నోరు మెదపడం లేదని బాబు విమర్శించారు. బ్యాలెట్ పద్ధతిలో ఎన్నికల నిర్వహణకు గడువు లేదు కాబట్టి 50 శాతం వీవీప్యాట్ స్లిప్‌లను లెక్కించమన్నాం. ఇందులో మీకు అభ్యంతరం ఏంటని ఆయన ఈసీని ప్రశ్నించారు. ఎన్నికల సంఘం నియంతలా వ్యవహరిస్తోందని బాబు విమర్శించారు.ప్రతిపక్షానికి డబ్బులు విపరీతంగా అందజేశారని చంద్రబాబు మోదీ సర్కారును విమర్శించారు. ప్రధాని మోదీనే హెలికాప్టర్‌లో డబ్బులు తరలిస్తున్నారనే వార్తలొస్తున్నాయి. మోదీకి ఎన్నికల కోడ్ వర్తించదా? అని బాబు ప్రశ్నించారు. ఏపీలో ఎన్నికలు ఎప్పుడు పెట్టాలో కూడా బీజేపీనే నిర్ణయించిందని చంద్రబాబు విమర్శించారు. ఏపీలో ఎన్నికలు ముందు పెట్టడానికి కారణమేంటని ఆయన ప్రశ్నించారు. ఈసీ ఆత్మపరిశీలన చేసుకోవాలని బాబు సూచించారు.
ఈసీ వైఖరిపై అన్ని పార్టీలతో కలిసి పోరాడతామన్నారు. రూ.5 కోట్లు ఇస్తే ఈవీఎంలు ట్యాంపరింగ్ చేసి ఎమ్మెల్యేగా గెలిపిస్తామంటున్నారు. ఈవీఎం చిప్స్‌ను మార్చొచ్చని చంద్రబాబు ఆరోపించారు. ధన ప్రవాహం తగ్గాలంటున్నారు.. కానీ మీరేం చేస్తున్నారో చెప్పండని ఈసీని విమర్శించారు. సాక్షి టీవీలో చూసి చర్యలు తీసుకొనే స్థాయికి వచ్చారని ఆయన ఈసీ వైఖరిని విమర్శించారు. ‘నేను పిలుపునివ్వడంతో.. హైదరాబాద్ నుంచి వేలాది మంది వచ్చారు. వాళ్లు తిరిగి వెళ్లడానికి సరైన బస్సులు కూడా లేవు. వాళ్లకు రవాణా సదుపాయం కల్పించే అధికారం నా చేతుల్లో లేకపోయింది. వాళ్లందరికీ చేతులెత్తి నమస్కరిస్తున్నా’నని చంద్రబాబు తెలిపారు. రాహుల్ ద్రావిడ్ ఇంటి అడ్రస్ మారిందని ఓటు తీసేశారని బాబు విమర్శించారు. 2014లో నేను ఈవీఎంలను సపోర్టు చేశానని, ఇప్పుడు వ్యతిరేకిస్తున్నానని కేటీఆర్ అంటున్నారు. కానీ నేనెప్పుడూ ఈవీఎంలను ఎప్పుడూ సపోర్ట్ చేయలేదని బాబు స్పష్టం చేశారు. 50 శాతం వీవీప్యాట్ స్లిప్‌లను లెక్కించాల్సిందేనన్న ఆయన.. ఈ పోరాటం ఇక్కడితో ఆగదన్నారు. ఎన్నికల సంఘం, దానికి అండగా ఉన్న పార్టీలు బదులివ్వాలన్నారు. ప్రజాస్వామ్యాన్ని, ప్రజాస్వామ్య వ్యవస్థలను కాపాడాల్సి ఉందన్నారు. ఢిల్లీలో మీడియా కూడా భయంతో కవరేజ్ చేయలేకపోతోందని చంద్రబాబు విమర్శించారు.
నాకు 34 ఏళ్ల అనుభవం ఉంది
ఏపీ సీఎం చంద్రబాబునాయుడు కేంద్ర ఎన్నికల సంఘం కమిషనర్ కు సవాల్ విసిరారు. ఈవీఎంలను హ్యాక్ చేయడానికి…  పోలింగ్ ముగిసిన తర్వాత ఈవీఎంలలోకి ఓట్లను అప్ లోడ్ చేయడం, ఈవీఎం కంట్రోల్ యూనిట్ డిస్ ప్లేను ఎక్కడ్నించో నియంత్రించడం, మెమరీ తారుమారు, ఈవీఎంలోని మైక్రో కంట్రోలర్ ను గానీ, మెమరీ చిప్ ను గానీ రీప్లేస్ చేయడం, సాఫ్ట్ వేర్ కోడ్ ను సవరించడం వంటి అనేక మార్గాలు ఉన్నాయని తాను చెప్పానని చంద్రబాబు అన్నారు.”నేను ఇంత స్పష్టంగా చెబితే, ఆయన ఎంతో సింపుల్ గా “ఇదసలు వీలే కాదు” అన్నాడు. వీలేకాదంటున్నారు, మీ టెక్నాలజీ బ్యాక్ గ్రౌండ్ ఏంటి? ఏం తెలుసు మీకు?  సూటిగా అడుగుతున్నాను, ఎన్నికల కమిషనర్ గా ఎప్పుడొచ్చారు మీరు? నేను చాలెంజ్ చేస్తున్నా! ఇండియాలో గత 34 ఏళ్లుగా టెక్నాలజీలో పండిపోయాను. రాజకీయవేత్తల్లో సాంకేతిక పరిజ్ఞానాన్ని ప్రమోట్ చేసినవాళ్లలో నేను అందరికంటే ముందున్నా. ఈరోజు మీరు అన్నీ మాకు తెలుసు, ఏం కాలేదు అని బుకాయిస్తే కుదరదు. ఎవరికి కావాలి మీ బుకాయింపులు? ఈవీఎంలో పడిన ఓట్లు, వీవీ ప్యాట్లలో వచ్చిన స్లిప్పులు సరిచూడమంటున్నాం, ఇందులో మీకొచ్చిన నొప్పేంటి?” అంటూ చంద్రబాబునాయుడు కేంద్ర ఎన్నికల సంఘం కమిషనర్ ను నిలదీశారు.
Tags:The elections should be conducted with the ballot: Babu

Leave a Reply

Your email address will not be published. Required fields are marked *