మధ్యప్రదేశ్‌లో పోలీసులను తప్పుదోవ పట్టించిన ఘటన

Date:14/01/2019
భోపాల్ ముచ్చట్లు:
ఓ యువతిని హత్యచేయడమే కాకుండా, పోలీసులను ‘దృశ్యం’ సినిమా తరహాలో తప్పుదోవ పట్టించిన ఘటన మధ్యప్రదేశ్‌లోని ఇండోర్‌లో చోటుచేసుకుంది. హత్యకు సంబంధించి ఎలాంటి సాక్ష్యాలు వదలకుండా రెండేళ్లపాటు పోలీసులను ముప్పుతిప్పలు పెట్టిన నిందితులు చివరికి నేరాన్ని ఒప్పుకోక తప్పలేదు. బ్రెయిన్ పోలీసులు తెలిపిన వివరాల ప్రకారం.. 2016లో కాంగ్రెస్ పార్టీకి చెందిన ట్వింకిల్ డాగ్రే అనే 22 ఏళ్ల మహిళా కార్యకర్త కనిపించకుండా పోయింది. ఈ కేసులో బీజేపీకి చెందిన జగదీష్ కటోరియా(65), అతని ముగ్గురు కుమారుల హస్తం ఉన్నట్లు పోలీసులు అనుమానించారు. అయితే, నిందితులు ముందు జాగ్రత్తతో సాక్ష్యాలు లేకుండా చేయడంతోపాటు పోలీసులను తప్పుతోవ పట్టించారు. దీంతో పోలీసులు మిస్సింగ్ కేసు నమోదు చేసి విచారణ కొనసాగించారు.  ట్వింకిల్ డాగ్రేతో జగదీష్ అక్రమ సంబంధం పెట్టుకున్నాడు. అయితే, ట్వింకిల్ పెళ్లి చేసుకోవాలని కోరింది. అయితే, జగదీష్ ఆమెను పెళ్లి చేసుకోడానికి ఇష్టపడేవాడు కాదు.
ఈ విషయం అతని కుటుంబ సభ్యులకు కూడా తెలిసింది. అయితే, ట్వింకిల్ పదేపదే జగదీష్‌పై ఒత్తిడి తేవడంతో ఆమెను హత్య చేయాలని ప్లాన్ చేశారు. నీ పేరు మీద ప్లాట్ కొంటున్నా, రావాలి’ అంటూ 2016, అక్టోబరు 16న జగదీష్ ట్వింకిల్‌ను ఓ ప్రాంతానికి తీసుకెళ్లాడు. అక్కడ తన కుటుంబ సభ్యులతో కలిసి ట్వింకిల్‌ను హత్య చేశాడు. అనంతరం ఆమె శవాన్ని ఎస్‌యూవీలో పెట్టుకుని మరో ప్రాంతానికి తీసుకెళ్లి దహనం చేశారు. ఆమె కనిపించకపోతే పోలీసులు తప్పకుండా తమనే అనుమానిస్తారని భావించిన జగదీష్.. తన ఇంటి వద్ద ఓ గొయ్యి తవ్వి చనిపోయిన ఓ కుక్కను పూడ్చిపెట్టాడు. తర్వాత కొన్ని రోజులకు హత్య జరిగిన రోజు రాత్రి అనుమానాస్పద ఘటన ఏదో జరిగిందని వారే అజ్ఞాతంగా పోలీసులకు ఉప్పందించారు. దీంతో పోలీసులు ఆ ప్రాంతంలో తవ్వి చూడగా పూడ్చిపెట్టిన కుక్క శవం లభ్యమైంది.అంతేకాదు, హత్య తర్వాత ఆమె మొబైల్ ఫోన్‌ సిగ్నల్స్‌తో పోలీసులను తప్పుతోవ పట్టించారు. బరవహా అనే ప్రాంతంలో ఆమె మొబైల్‌ను యాక్టివ్ చేశారు.
ట్వింకిల్‌కు బరవహాలోని ఓ యువకుడితో పరిచయం ఉన్నట్లు జగదీష్‌కు తెలుసు. అక్కడ ఫోన్ యాక్టివ్ చేస్తే పోలీసులు తప్పకుండా ఆ యువకుడిని అనుమానిస్తారని ప్లాన్ చేశాడు. ఊహించినట్లే పోలీసులు అక్కడికి వెళ్లి విచారణ జరిపారు. ఇలా దొరికిపోయారు: పోలీసులకు మొదటి నుంచి జగదీష్ కుటుంబం పైనే అనుమానం ఉంది. హత్యచేసి తమని తప్పుదోవ పట్టిస్తున్నారనే అనుమానంతో బ్రెయిన్ ఎలక్ట్రికల్ ఓస్కిల్లాషన్ సిగ్నేఛర్ ద్వారా పరీక్షించారు. జగదీష్‌తో పాటు అతని కుమారులు అజయ్ , విజయ్, వినయ్, వాళ్ల స్నేహితులు నీలేష్ కాశ్యప్ లను విచారించారు. ఈ ఘటనపై ఇండోర్ డీఐజీ హరినారాయణాచారి మిశ్రా మాట్లాడుతూ.. ‘‘బీఈవోఎస్ పరీక్ష చేయడం ఇదే తొలిసారి. దీనికి సంబంధించిన ల్యాబ్ అహ్మదాబాద్‌లో ఉంది. దీనివల్ల రెండేళ్లుగా మమ్మల్ని తప్పుదోవ పట్టిస్తున్న నిందితులు నిజాలు చెప్పారు. ట్వింకిల్‌కు హత్యకు సంబంధించిన ఆధారాలు మాకు లభించాయి’’ అని తెలిపారు.
Tags:The incident happened in Madhya Pradesh by the police

Leave a Reply

Your email address will not be published. Required fields are marked *