The tiger is killing ..

పులి చంపేస్తోంది…

Date:30/11/2020

హైదరాబాద్ ముచ్చట్లు

కుమ్రంభీం ఆసిఫాబాద్‌ జిల్లా ప్రజలను ఓ పులి వణికిస్తోంది. కొద్ది రోజుల కిందట యువకుడిపై దాడి చేసిన చంపేసిన పులి.. తాజాగా అదే రీతిలో ఓ యువతిపై దాడి చేసింది. పొలంలో పత్తి చేనులో పనిచేస్తున్న యువతిపై దాడి చేసి చంపేసింది. మృతదేహాన్ని అటవీ ప్రాంతంలోకి ఈడ్చుకెళ్లింది. ఆసిఫాబాద్ జిల్లా పెంచికలపేట మండలం కొండపల్లి గ్రామంలో ఆదివారం ఈ ఘటన చోటు చేసుకుంది.కుటుంబ సభ్యులు తెలిపిన వివరాల ప్రకారం.. నిర్మల అనే యువతి తమ వ్యవసాయ బావి వద్ద పత్తి చేనులో పనిలో నిమగ్నమై ఉంది. పంటచేనులో పత్తి ఏరుతుండగా ఆమెపై పులి అమాంతంగా దాడి చేసి హతమార్చింది. ఆ తర్వాత ఆమెను అటవీ ప్రాంతంలోకి ఈడ్చుకెళ్లింది. పులి దాడి చేసిన సమయంలో అక్కడే పనిచేస్తున్న ఇతర కూలీలు భయంతో పరుగులు తీశారు. అనంతరం కుటుంబసభ్యులు కొంత మంది గ్రామస్థులతో కలిసి ఆ పరిసర ప్రాంతాల్లో గాలించారు. నిర్మల మృతదేహాన్ని స్వాధీనం చేసుకున్నారు.నవంబర్ 11న దహెగాం మండలం దిగిడలో పులి దాడిలో గిరిజన యువకుడు మరణించాడు. దిగిడకు చెందిన యువకుడు సిడాం విఘ్నేశ్ (22) తన మిత్రులు శ్రీకాంత్, నవీన్‌తో కలసి పత్తి చేనులో పత్తి ఏరుతుండగా అక్కడ పొదలమాటున ఉన్న పులి ఒక్కసారిగా దాడి చేసింది. విఘ్నేశ్‌ను నోటకరుచుకుని అడవిలోకి లాక్కెళ్లింది. విఘ్నేశ్‌తో వెళ్లిన ఇద్దరు యువకులు భయంతో ఇంటికి గ్రామంలోకి పరుగెత్తుకొచ్చారు. విషయాన్ని కుటుంబ సభ్యులు, స్థానికులకు తెలిపారు.పంట చేను సమీపంలోని అటవీ ప్రాంతంలో వెతకగా యువకుడి మృతదేహం లభ్యమైంది. విఘ్నేశ్ తల, ఇతర శరీర భాగాలపై పులి తీవ్రంగా గాయపర్చింది. గ్రామస్థుల ఫిర్యాదు మేరకు జిల్లా అటవీ అధికారుల, పోలీసులు ఘటనా స్థలానికి వెళ్లి పరిశీలించారు.పులిని బంధించడానికి అటవీ శాఖ సిబ్బంది కొన్ని రోజులుగా ప్రయత్నిస్తున్నారు. అయినా, ఫలితం లేకుండా పోయింది. తాజాగా మరో పులి దాడిలో మరొకరు బలయ్యారు. అయితే.. విఘ్నేశ్‌ను, నిర్మలను చంపిన పులి ఒకటేనా అనే విషయంపై స్పష్టత రావాల్సి ఉంది.మరోవైపు.. పులి దాడుల్లో వరుసగా మనుషులు మృతి చెందుతుండటంతో గ్రామస్థులు భయాందోళన వ్యక్తం చేస్తున్నారు. పులి బారి నుంచి తమను రక్షించాలంటూ అటవీ శాఖ అధికారులను వేడుకుంటున్నారు.

 

రాజాసింగ్ సిరియస్

Tags:The tiger is killing ..

Leave a Reply

Your email address will not be published. Required fields are marked *