చనిపోయిన ఇంట్లో ఉంచుకొనే క్రియలు 

   Date:06/03/2019
   టోరజన్‌ ముచ్చట్లు:
అక్కడంతే.. శవాలతోనే కలిసి జీవిస్తారు. వాటితోనే నిద్ర, వాటితోనే భోజనం కూడా. అక్కడ తమ ఆప్తులు చనిపోతే వెంటనే అంత్యక్రియలు జరపరు. వాటిని మమ్మీలుగా తమతోనే ఉంచేసుకుంటారు. అంతేకాదు, వాటిని రోజూ శుభ్రం చేస్తూ బతికి ఉన్న మనుషుల్లాగే చూస్తారు. ఔను, నిజం! అస్సలు నమ్మబుద్ధి కావడం లేదు కదూ. అయితే, మీరు తప్పకుండా ఇండోనేషియాలోని టోరజన్‌ కు వెళ్లాల్సిందే. టోరజన్స్‌గా పేరొందిన ఆ ప్రాంత ప్రజల వింత ఆచారాలు యావత్తు ప్రపంచాన్ని ఆశ్చర్యపరుస్తోంది. ఇండోనేషియాలో సులావేసి పర్వత శ్రేణుల్లో నివసించే టోరజన్స్.. తమ కుటుంబికులు ఎవరైనా మరణిస్తే.. వారిని బతికి ఉన్నవారి కిందే భావిస్తారు. వారు వ్యాధికి గురైనట్లు చెబుతారు. శవపేటికల్లో పెట్టి ప్రత్యేకమైన గదిలో శవాలను ఉంచుతారు. దీని వెనుక ఉన్న చిత్రమైన విషయం ఏమిటంటే.. వీరు చావును కూడా పండుగలా జరుపుకుంటారు. అంత్యక్రియలు కోసం భారీగా సొమ్మును ఖర్చు చేస్తారు. అయితే, అక్కడ అత్యధిక ప్రజలు పేదవారే కావడంతో అంత్యక్రియలకు సరిపడా సొమ్ములు సమకూర్చుకునే వరకు శవాలను తమ ఇళ్లలోనే ఉంచుకుంటారు.అంత్యక్రియల్లో భాగంగా వారు తమ కుటుంబికుల శవాలను ప్రత్యేకంగా తయారుచేసిన సమాధుల్లో ఉంచుతారు. ‘పూర్వీకుల సంరక్షణ’ పేరుతో వారు నిత్యం అక్కడికి వెళ్లి శవాలను శుభ్రం చేయడం, దుస్తులు మార్చడం వంటి పనులు చేపడతారు.
అంత్యక్రియల్లో భాగంగా చనిపోయిన వ్యక్తికి నచ్చిన వస్తువులను కూడా శవపేటికల్లో పెడతారు. కొంతమంది వజ్రాలను సైతం శవపేటికల్లో పెడతారు. దొంగతనాల నేపథ్యంలో వాటిని రహస్య ప్రాంతంలో భద్రంగా పెడతారు.  వ్యక్తులు చనిపోయినా.. వారి ఆత్మలు తమ చుట్టూనే తిరుగుతుంటాయని టోరజ ప్రజల విశ్వాసం. అందుకే, అంత్యక్రియలకు ముందు వారిని వ్యాధితో బాధపడుతున్నావారిగా భావిస్తామని స్థానికులు తెలిపారు. వారిని ఉంచిన శవపేటికల గదిలోకి ఆహారాన్ని తీసుకెళ్లి.. ‘‘ఆహారం తెచ్చాం, తినండి’’ అని వారికి చెబుతామన్నారు. వారిని ఇళ్లలోనే ఉంచుకోవడం వల్ల చనిపోయారనే భావన తమలో కలగదని చెప్పడం గమనార్హం. యులియస్ లాంగ్‌టంగ్ అనే వ్యక్తి మాట్లాడుతూ.. ‘‘మా నాన్న కంటే ముందే అమ్మ చనిపోయింది. అయితే, నాన్న తాను చనిపోయే వరకు ఆమెకు అంత్యక్రియలు జరపొద్దని, ఇద్దరికి కలిపి అంత్యక్రియలు జరపాలని కోరారు. నాన్న చనిపోయే వరకు అమ్మ శవాన్ని మాతోనే ఉంచుకున్నాం. త్వరలో ఇద్దరికి కలిపి అంత్యక్రియలు జరుపుతాం’’ అని తెలిపారు. మృత దేహాలను నిల్వ ఉంచడం అంటే మాటలు కాదు. కొన్ని గంటల వ్యవధిలోనే అవి కుళ్లిపోవడం మొదలవుతాయి. రోజులు పెరిగే కొద్ది దుర్వాసన పెరుగుతుంది. క్రిములు దాడి చేస్తాయి. వాటితో కలిసి ఉండేవారికి భయానకమైన వ్యాధులు కూడా వచ్చే అవకాశం ఉంటుంది. కానీ, టోరజన్స్‌కు మాత్రం అలాంటి సమస్యలే రాకపోవడం విశేషం. ఒకప్పుడు కొన్ని మూలికల మిశ్రమాన్ని మృతదేహాలకు రాసేవారు. ప్రస్తుతం ఫార్మాల్డిహైడ్ రసాయాన్ని ఇంజక్షన్ ద్వారా వాటికి అందిస్తున్నారు. శవాలను ఉంచే గదిలో నిత్యం సుగంధ ద్రవ్యాలను చల్లుతారు. అలా వారు శవాలను ఏళ్ల కొద్ది ఇళ్లలోనే ఉంచుకుంటూ వింతైన సాంప్రదాయాలను పాటిస్తున్నారు.
Tags: Dead works

Leave a Reply

Your email address will not be published. Required fields are marked *