నష్టాలకు ఫుల్ స్టాప్ ఎప్పుడు

హైదరాబాద్ ముచ్చట్లు:

హైదరాబాద్ నగరవాసులకు ట్రాఫిక్ చికాకులు లేకుండా సౌకర్యవంతమైన ప్రయాణం అందించాలన్న సంకల్పంతో ఎంతో ఆర్భాటంగా ప్రారంభమైన మెట్రో రైల్ ప్రాజెక్టు నష్టాలతో కొట్టుమిట్టాడుతోంది. ప్రారంభమైన రెండేళ్లకే కరోనా రూపంలో సంస్థపై పిడుగు పడింది. ముందుగా లాక్‌డౌన్, ఆ తర్వాత కరోనా కఠిన నిబంధనలతో ప్రయాణీకులు అటువైపు చూడకపోవడంతో రెండేళ్ల పాటు హైదరాబాద్ మెట్రో తీవ్ర నష్టాలను ఎదుర్కొంది. ఈ క్రమంలోనే 2020-21లో రూ.1766 కోట్ల మేర నష్టాలు మూటగట్టుకుంది. అయితే 2021 నుంచి క్రమంగా ప్రయాణీకుల రద్దీ పెరుగుతుండటంతో అధికారులు ఊపిరి పీల్చుకున్నారు. ప్రస్తుతం రోజుకు 2.5-3లక్షల మంది మెట్రోరైళ్లలో రాకపోకలు నిర్వహిస్తున్నా నష్టాలు రావడం కలవరపరుస్తోంది. 2021-22 మార్చితో ముగిసిన ఆర్థిక సంవత్సరంలో రూ.1745 కోట్ల నష్టాలు రావడం గమనార్హం.లాక్‌డౌన్‌కు ముందు రోజులకు 4లక్షల మంది మెట్రోలో ప్రయాణించేవారు. దీంతో సంస్థ ఆపరేషన్స్‌ పరంగా లాభనష్టాలు లేని దశకు చేరుకుంది. ఏడేళ్లలో మొత్తం మెట్రోనే బ్రేక్‌ ఈవెన్‌కు వస్తుందని భావించగా… కరోనాతో అంచనాలు రివర్స్ అయ్యాయి. 2019-20లో కొవిడ్‌ ముందు ప్రయాణికుల టిక్కెట్ల రూ.598 కోట్లు వచ్చాయి. మరుసటి సంవత్సరం వెయ్యికోట్లపై అంచనా పెట్టుకున్నా కొవిడ్‌ దెబ్బతీసింది. 2020లో లాక్‌డౌన్‌ సమయంలో మెట్రోరైళ్లు 169 రోజులు డిపోలకే పరిమితం అయ్యాయి.

 

 

 

పునః ప్రారంభం అయినా ఏ దశలోనూ ప్రయాణికులు సంఖ్య 2.20 లక్షలు దాటలేదు. దీంతో ఆ ఏడాది ఏడు నెలలు మాత్రమే మెట్రో సేవలు అందించగా ప్రయాణికుల నుంచి రూ.346 కోట్ల ఆదాయం వచ్చింది. మెట్రో మాల్స్ తెరిచినా కస్టమర్లు రాక ఆదాయం పడిపోయింది. 2020-21 ఆర్థిక సంవత్సరంలో మెట్రో ఆదాయం రూ.386కోట్లు మాత్రమే రాగా,, ఖర్చు మాత్రం రూ.2152 కోట్లు అయ్యింది. ఇందులో వడ్డీ చెల్లింపుల వ్యయమే రూ.1412 కోట్లు ఉన్నాయి.అయితే 2021-22లో ఏడాది మొత్తం మెట్రో రైళ్లు నడిచినా రోజువారీ ప్రయాణికుల సగటు సంఖ్య 3 లక్షలు దాటలేదు. దీంతో ఆదాయం స్వల్పంగా మాత్రమే పెరిగింది. ప్రయాణికుల టిక్కెట్ల ద్వారా రూ.457 కోట్లు మాత్రమే రాగా… మాల్స్‌, ప్రకటనల ఆదాయం కొంత పెరిగింది. మొత్తంగా చూస్తే ఆ ఆర్థిక సంవత్సరంలో రూ.1745 కోట్లు నష్టం వచ్చిందని ఎల్‌ అండ్‌ టీ మెట్రో వెల్లడించింది. అయితే జూన్ నెల తర్వాత రోజువారీ ప్రయాణీకుల సంఖ్య 5లక్షలకు చేరుకుంటుందని మెట్రో అధికారులు అంచనా వేస్తున్నారు. ప్రస్తుతం రోజుకు సగటున 2.8లక్షల మంది ప్రయాణిస్తుండగా.. ఆ సంఖ్య క్రమంగా పెరుగుతోంది. సెలవు రోజుల్లో ప్రవేశపెట్టిన రూ.59 టిక్కెట్‌కు మంచి ఆదరణ దక్కుతోంది. ఐటీ కార్యాలయాలు వర్క్ ఫ్రమ్‌ హోమ్‌కు స్వస్తి పలుకుతుండటంతో ప్రయాణీకుల సంఖ్య రెట్టింపు అవుతుందని అంచనా వేస్తున్నారు. మెట్రో రైల్ ప్రాజెక్టు రోజుకు 15లక్షల మంది రాకపోకలు సాగించేలా నిర్మించగా.. కరోనా సహా పలు సమస్యల కారణంగా అందులో కనీసం 30శాతం కూగా చేరుకోలేకపోయింది.

 

Tags:When the full stop for losses